Read Pahari, Mahasu 1 कुरि 16 Bible Online

1 कुरि 16 - Pahari, Mahasu bible

1 कुरि 16

¹आबै हाऊं तुमारै तेस सवाला रै बारै दी ज़वाब दियाऊ ज़ो तुमुऐ पुछ़ौ थौ। तुमुऐ दाणा रै बारै दी पुछ़ौ थौ ज़ो यरुशलेमा दी रौइणै वाल़ै परमेश्‍वरा रै लोगु लै कौट्ठै कियौ थौ। ज़िणौ हुकम मुंइऐ गलातिया री कलिसिया लै दैऔ, तिणौ तुमै भी कौरौ।

²हौफ्तै रै पैहलै दिनै तुमु मांझ़िया कु हर एक आपणी-आपणी आमदानी रै मुताबिक कुछ़ आपुकै छ़ाड़ा लै कि ज़ेबी हाऊं आशु लौ ता दाण ना जा लौ मांगणौ।

³ज़ेबी हाऊं तुमु काऐ आशु लै, ता ज़ास तुमै च़ाहा ई तिऊं हाऊं चिट्ठी देइयौ भेज़ाऊ कि सै तुमारौ दाण यरुशलेमा दी पहुंच़ावा।

⁴अगर मैरौ डेउणौ ज़ुरुरी हुआ लौ ता, सै मुं आइलै आशालै।

⁵अगर प्रभु री इच़्छ़ा हुआ ली ता हाऊं तुमु आइलै लाम्बै बौगता लै रुका ऊ। पर आबै ज़ेबी हाऊं मकिदुनीया लै डेउलौ ता हाऊं तुमु आइलै नाईं ज़ादै बौगता झ़ाऊं नाईं रुकदौ। तिऐ डेउणै बासिऐ हाऊं तुमु काऐ आशाऊ। तैबै हाऊं कुछ़ बौगता लै या पुरै हिऊंदा दी तुमु आइलै रौआऊ। तेथ बासिऐ तुमै मुं मैरै आगलै सफरा दी भेज़ी सौका ई, सेऊ च़ाऊ किऐ भी औलौ।

⁸पर हाऊं पिन्तेकुस्ता रै साज़ै झ़ांऊ इफिसुस शैहरा दी रौआऊ।

⁹कैलैकि मुकै तिऐ असरदार काम कौरणै रौ बौड़ौ मौकौ आ। तिऐ मैरै विरोध कौरणै वाल़ै भौरी आ।

¹⁰अगर तीमुथियुस तिऐ आशी जा लौ, ता तेस आइलै इज़्ज़ता कौरी बरताव कौरेऊ। कैलैकि सेऊ मुं ज़िणौ प्रभु रौ काम कौरा सा।

¹¹एथीलै कोई भी तेस बेकार ना ज़ाणालौ, पर तेस सही-सलामत एज़ी भिलै पहुंच़ाइयौ कि मुं काऐ आशा, कैलैकि हाऊं तेस पौखदै लागौ औन्दौ कि सेऊ विश्वासिऊ आइलै आशा।

¹²साथी विश्वासी भाई अपुल्लोसा कु मुंइऐ भौरी औरज़ की आ कि तुमु काऐ विश्वासिऊ आइलै आशा। पर तिणीऐ एज़ै बौगतै डेउणा री कुछ़ भी इच़्छ़ा नाईं की, पर ज़ैबै ठीक बौगत औलौ तैबै सेऊ तुमु काऐ आशा लौ।

¹³च़ोकसिऐ रौएऊ, विश्वासा दी टेकी रौएऊ, हिम्मत वाल़ै बौणौ, विश्वासा दी मज़बूत रौ।

¹⁴ज़ो कुछ़ तुमै कौरा ई तेस प्यारा कौरी कौरौ।

¹⁵ओ मैरै प्यारै साथी विश्वासिउओ, तुमै स्तिफनुसा रै टौबर ता ज़ाणाई कि सै अखाया परदेशा री फौसली रै पैहलै विश्वासी ई, और परमेश्‍वरा रै लोगु री सेवा लै सौभी कु पैहलै तैयार रौआ ई।

¹⁶एथीलै हाऊं तुमु कु औरज़ कौराऊ कि इणै लोगु रै अधीन रौ, यानी के हर एकी रै ज़ो एज़ै कामा दी मैहनती और साथ दिआई।

¹⁷हाऊं स्तिफनुस और फूरतूनातुस और अखइकुस रै आशणै कु भौरी खुश ऊ, कैलैकि तिउंरी वज़ाह कु तुमारी कामी-घौटी पुरी हुई आ।

¹⁸तिंउऐ मैरै और तुमारै मौना लै आराम दैऔ आ। एथीलै इणै लोगु री इज़्ज़त कौरौ।

¹⁹आसिया परदेशा री कलिसियाऊ री तौरफा कु तुमुलै ढाल। अक्विला और तेसरी बोउटी प्रिसका रौ और तिंउरै घौरा री कलिसिया रौ भी तुमुलै प्रभु दी भौरी भौरी ढाल।

²⁰सारै विश्वासिऊ री तौरफा कु तुमुलै ढाल। आपु मांझ़िऐ गौल़ै मिलियौ ढाल कौरौ

²¹मुंइऐ किणै बौड़ै-बौड़ै आखरु दी आपणै हाथा कौरी तुमुलै ढाल लिखौ आ।

²²अगर कुण प्रभु कु प्यार ना कौरालौ ता सेऊ शापित आ। ओ आमारै प्रभु, आश!

²³आमारै प्रभु यीशु री बौड़ी दया तुमु माथै औन्दै थाकाली लागी।

²⁴मैरौ प्यार मसीह यीशु दी तुमु सौभी आइलै बौणी रौआ। आमीन।