Read Pahari, Mahasu 1 कुरि 4 Bible Online

1 कुरि 4 - Pahari, Mahasu bible

1 कुरि 4

¹आच़्छ़ौ ता इणौ आ कि लोग आमु सिरफ यीशु मसीह रै खज़ान्च़ी सौमझ़ा, ज़ासकै परमेश्‍वरा रै भेदा री ज़िम्मेबारी आ सांबी ऐन्दी।

²खज़ान्च़ी सौच़्च़ौ और विश्वास वाल़ौ औणौ च़ांई।

³मुलै एज़ी बुशा री कोई ज़ुरुरी नाईं कि तुमै मतलब लोगु रौ कोई कोरट मुं लायक ना सौमझ़ा। हाऊं आपु भी आपणौ फैसलौ नाईं कौरदौ।

⁴कैलैकि मैरौ मन मुं केज़ी भी बुशा दी दोषी नाईं चाणदौ, पर इणै कौरी हाऊं बिणा गौलती वाल़ौ नाईं बौणदौ कैलैकि मुं पौरखणै वाल़ौ प्रभु आ।

⁵एथीलै प्रभु रै आशणै झ़ाऊं कोई भी कासी ना पौरखा। प्रभु लोगु रै विच़ार साफ-साफ बोला आ ज़ासरै बारै दी कोई ना ज़ाणदौ। और सेऊ तिउंरै ज़िवा रै मकसद पौगड़ै कौरा आ। तैबै परमेश्‍वरा री तौरफा कु हर एकी री बौड़ाई हुणी आ।

⁶ओ मैरै प्यारै साथी विश्वासिउओ, मुंइऐ आपणै और अपुल्लोसा रै बारै दी तुमुकै बोलौ थौ ताकी तुमुलै आमारै औनैणै कु इणी शिक्षा मिला, कि ज़ो कुछ़ पवित्रशास्त्रा दी आ लिखौ औन्दौ तेथकु औगांऊ ना बौड़णौ। और इणौ आच़्छ़ौ नाईं कि अगर तुमै एकी री इज़्ज़त कौरा ई और दुजेऊ रौ विरोधा कौरा ई।

⁷कैलैकि तुमु दी और दुजेऊ दी कुण भेद कौरा सा? और ताउंकै का सा ज़ो ताइंऐ (दुजेऊ कु) नाईं पाऔ? और ज़ैबै कि ताइंऐ (दुजेऊ कु) पाऔ आ, ता इणौ घमण्ड कैलै कौरा ई कि मानौ नाईं पाऔ?

⁸तुमारै ता पेट भौरुई गौऐ आ, सेठ हुई गौऐ, तुमुऐ बिण आमुऐ राज़ कियौ। पर आच़्छ़ौ हुआ थौ कि तुमै राज़ कौरा थै कि आमै भी तुमु आइलै राज़ कौरा थै।

⁹मेरी सौमझ़ी दी परमेश्‍वरै आमै प्रेरित सारेऊ कु आखरी ज़ागाह दी तिऊं लोग बाशीऐ छ़ाड़ै ई, ज़ासरी मौरणै री हुकम हुई गोई आ। कैलैकि आमै धौतरी रै लोगु लै और सौरगदूत और लोगु लै एक तौमाशौ बौणै ई।

¹⁰आमै मसीहा लै मुर्ख ई, पर तुमै मसीहा दी बुद्धी वाल़ै ई। आमै कमज़ोर ई पर तुमै शक्ति वाल़ै ई। तुमुलै इज़्ज़त मिला सा, पर आमारी बेइज़्ज़ती हुआई।

¹¹आमै एज़ै दिना झ़ांऊ भोखै चिशै और फाटै-पुराणै जुड़कै दी रौऐ, और मार खाई और आमुकै घौर नाईं ई।

¹²और मैहनत कौरी ई, और आपणै ई हाथा री कौमाई खाई ई। लोग आमुलै बुरौ बोलाई, आमै तिउंलै आशीष देई ई। सै आमु सतावा ई, आमै सहन कौरी ई।

¹³सै आमु बदनाम कौरा ई पर आमै तिऊं आइलै नौरमाइऐ बुशै लाई ई। इबी झ़ाऊं लोग आमारी इज़्ज़त नाईं कौरदै तिउंरी नौज़रीऐ आमारी कोई किम्मत नाईं आसती।

¹⁴हाऊं तुमारी बेइज़्ज़ती कौरना लै इऊं बुशै नाईं लिखदौ, पर आपणै प्यारै लोल़डै ज़ाणियौ तुमु सौमझ़ावा ऊ।

¹⁵कैलैकि अगर मसीहा दी तुमारै शिखाउणै वाल़ै भौरी सारै भी औलै, तैबै भी तुमारै बाब भौरी नाईं। एथीलै कि मसीह यीशु दी खुशी री खौबरी रै ज़ौरिऐ हाऊं तुमारौ बाब हुऔ।

¹⁶एथीलै हाऊं तुमु कु औरज़ कौराऊ कि मुं ज़िणी च़ाल च़ालौ।

¹⁷मुंइऐ तीमुथियुस ज़ो प्रभु दी प्यारौ और विश्वास वाल़ौ छ़ोहरु आ, तुमु काऐ भेज़ौ आ। सेऊ तुमु मसीहा दी मैरौ च़ाल-च़लण याद कौरावा, ज़िणौ कि हाऊं हर ज़ागाह दी और एक कलिसिया दी शिक्षा दियाऊ।

¹⁸कुण ता इणै फूली गौऐ आ, मानौ कि हाऊं तुमु काऐ आशदौ ई नाईं।

¹⁹पर प्रभुऐ च़ाऔ ता हाऊं तुमु काऐ शिगरी आशाऊ, तैबै ना सिरफ तिऊं घमण्डिऊ री शिक्षा, पर तिउंरी तागत भी ज़ाणाऊ।

²⁰कैलैकि परमेश्‍वरा रौ राज़ बुशु दी नाईं पर शक्ति दी आ।

²¹तुमै का च़ाहा ई? का हाऊं डिंगै कौरीऐ तुमु काऐ आशु, या प्यार और निउलै री आत्मा आइलै?