Read Pahari, Mahasu 1 कुरि 6 Bible Online

1 कुरि 6 - Pahari, Mahasu bible

1 कुरि 6

¹तुमु मांझ़िऐ इणौ कुण आ ज़ुण आपसी झ़ौगड़ै रै फैसलै लै अधर्मी फैसलै कौरणै वाल़ै काऐ डिआ और परमेश्‍वरा रै लोगु काऐ नाईं लै डिआ?

²का तुमै नाईं ज़ाणदै कि परमेश्‍वरा रै लोग इऊं दुनिया रै लोगु रौ फैसलौ कौरा ई? एथीलै ज़ैबै तुमुऐ धौतरी रै लोगु रौ फैसलौ कौरणौ आ, तैबै का तुमै छ़ोटै कु छ़ोटै झ़ौगड़ै रौ भी फैसलै कौरणै लायक नाईं?

³का तुमै नाईं ज़ाणदै कि आमै परमेश्‍वरा रै दूता रौ फैसलौ कौरी? तैबै का इऐं ज़िन्दगी री बुशु रौ फैसलौ नाईं कौरुलै?

⁴अगर तुमुऐ ज़िन्दगी री बुशु रौ फैसलौ कौरणौ औलौ, का तिऊं बोशाल़ाई ज़ास कलिसिया दी कुछ़ नाईं सौमुझ़दै?

⁵हाऊं तुमु बेइज़्ज़त कौरना लै इणौ बोलाऊ। का सौच़्च़ी तुमु मांझ़ी एक भी बुद्धिमान नाईं मिलदौ, ज़ो आपणै विश्वासी भाईऊ रौ फैसलौ कौरी बौल़ा?

⁶तुमु विश्वासिऊ रौ आपु मांझ़िऐ मुकदमौ हुआ, और सेऊ भी अविश्वासी लोगु रै सामनै।

⁷ज़ेबी तुमु मांझ़िऐ एक विश्वासी दुजै विश्वासी कोरटा दी निंआई ता ज़िणौ एक विश्वासी ऐ मिली-ज़ुलियौ ज़िन्दगी ज़िउणी च़ांई तेथदी तुमै नाकाम हुई गौऐ ई। तुमुऐ ता इणौ कौरणौ च़ांई कि तुमै दुजेऊ री बुराई सहन कौरा, और आपणौ नुकसान औणै दैऔ।

⁸पर तुमै ता आपणै ई विश्वासी भाई आइलै बुराई कौरा ई और तेसलै धोखौ दियाई।

⁹का तुमै नाईं ज़ाणदै कि बुराई कौरणै वाल़ै लोग परमेश्‍वरा रै राज़ा रै हक्की नाईं औन्दै? कोई भी तुमुलै धोखौ ना दिया, कैलैकि ना गान्दै काम कौरणै वाल़ै, ना मूर्ती पुज़णै वाल़ै, ना दुजै री छ़ेउड़ी आइलै रौइणै वाल़ै, ना लुच्च़ै, ना गान्दै आदमी आइलै रौइणै वाल़ै,

¹⁰ना च़ोर, ना लोभी, ना सुरी पिणै वाल़ै, ना गाल़ी देणै वाल़ै, ना बुराई कौरणै वाल़ै, परमेश्‍वरा रै राज़ा रै वारीस औन्दै।

¹¹और तुमु मांझ़ी केती ता इणै थै। पर प्रभु यीशु मसीह रै नावां कौरी और आमारै परमेश्‍वरा री आत्मा कौरी तुमारै पाप धोउई गौऐ, और तिणीऐ तुमै पवित्र और आपणी नौज़री दी धौर्मी चाणै।

¹²तुमु मांझ़िऐ कुछ़ इणौ बोलालै कि, “मुकै सब कुछ़ कौरणै री इज़्ज़ाज़त आ।” ओ पर सब कुछ़ फाइदै री नाईं। हाऊं इणौ बोली सौका ऊ, “मुकै सब कुछ़ कौरणै इज़्ज़ाज़त आ,” पर हाऊं केज़ी भी च़िज़ा रौ गुलाम नाईं बौणदौ।

¹³काइऐ इणै भी बोलाई कि, रोटी पेटालै और पेट रोटी लै आ, इऐ सौच़्च़ी बूश आ। पर परमेश्‍वर शरीर और रोटी दुइया नाश कौरा सा। शरीर गान्दै कामा लै नाईं बल्कि आमुऐ आपणै शरीरा कु तिणौ कौरणौ च़ांई ज़िणौ प्रभु च़ाहा सा। और आमारौ शरीर प्रभु लै आ।

¹⁴परमेश्‍वरै आपणी शक्ति कौरी प्रभु ज़िउंदौ कियौ, और आमु भी ज़िउंदौ कौरा सा।

¹⁵का तुमै नाईं ज़ाणदै कि तुमारौ शरीर मसीह रौ आंग आ? तैबै का हाऊं मसीहा री आंग नीईंयौ गांदी छ़ेउड़ी आइलै ज़ोड़ु? नाईं केबी भी नाईं।

¹⁶का तुमै नाईं ज़ाणदै कि ज़ुण-कुण गांदी छ़ेउड़ी आइलै रिश्तौ छ़ाड़ा सा, सेऊ तिंआ आइलै एक शरीर औआ? कैलैकि पवित्रशास्त्रा दी आ लिखौ औन्दौ, “सै दुई एक शरीर औआ ई”

¹⁷और ज़ुण प्रभु आइलै रिश्तौ छ़ाड़ा सा, सेऊ तेस आइलै एक आत्मा हुआ सा।

¹⁸गान्दै काम बिल्कुल नाईं कौरौ। ज़ेती भी दुजै पाप आदमी कौरा ई सै शरीरा कु बाहरै आ, पर गान्दै काम कौरणै वाल़ै आपणै ई शरीरा रै खिलाफ पाप कौरा ई।

¹⁹का तुमै नाईं ज़ाणदै कि तुमारौ शरीर पवित्र आत्मा रौ घौर आ। ज़ो तुमु दी बौसौ औन्दौ आ, और सेऊ तुमुलै परमेश्‍वरा री तौरफा कु आ मिलौ औन्दौ। और तुमै परमेश्‍वरा रै ई।

²⁰कैलैकि तुमै किमत्ती देइऔ ई खरीदै औन्दै, एथीलै आपणै शरीरा कौरीऐ परमेश्‍वरा री महिमा कौरौ।