Read Pahari, Mahasu 1 कुरि 7 Bible Online

1 कुरि 7 - Pahari, Mahasu bible

1 कुरि 7

¹आबै हाऊं तुमारी बुशु रौ ज़वाब दियाऊ ज़ो तुमुऐ आपणी चिट्ठी दी लिखौ थौ। तुमुऐ पुछ़ौ थौ कि, “का एक आदमी लै इणौ आच़्छ़ौ आ कि सेऊ शादी ना कौरा?”

²पर मेरी सलाह इऐ आ कि गान्दै कामा कु बौच़णा लै हर एक आदमी री आपणी बोउटी हुआ, और हर एक छ़ेउड़ी रौ बोउटौ च़ांई हुऔ।

³बोउटौ आपणी बोउटी रौ हक्क पुरौ कौरा। और तिणी ई बोउटी भी आपणै बोउटा रौ हक्क पुरौ कौरा।

⁴बोउटी रौ आपणै शरीरा माथै कोई हक्क नाईं पर तिंआरै बोउटै रौ हक्क आ। तिणी ई बोउटै रौ भी आपणै शरीरा माथै कोई हक्क नाईं, पर तेसरी बोउटी रौ आ।

⁵तुमै एकी दुजै कु अलग नाईं रौ। पर सिरफ आपु मांझ़िऐ चौपड़ुइयौ कुछ़ बौगता झ़ांऊ आपणी सौमझ़िऐ प्राथना लै अलग रौ तेथ बासिऐ रौ एकी साथाई। इणौ ना च़ांई हुऔ कि तुमारै बिण सबरा री वज़ाह कु शैतान तुमु मुसीबता दी पा।

⁶पर हाऊं ज़ो इणौ बोलदै ऊ लागौ औन्दौ, इऐ सिरफ मेरी सलाह सा ना कि हुकम।

⁷हाऊं ता इणौ च़ाहा ऊ कि ज़िणौ हाऊं ऊ तिणी सारै आदमी रौआ। पर हर एक आदमी लै परमेश्‍वरा री तौरफा कु अलग-अलग वरदान ई मिलै औन्दै। कासलै केज़ै रौंगा रौ और कासलै केज़ै रौंगा रौ।

⁸आबै हाऊं तिउंलै बोलाऊ, ज़ुण बिण शादी रै ई और ज़ुण विधवा ई कि तिऊं लै इणौ ई रौइणौ आच़्छ़ौ आ ज़िणौ हाऊं आ।

⁹पर अगर सै सबर नाईं कौरी सौका लै, ता सै शादी कौरालै। कैलैकि शादी कौरणी बुरै बिच़ारा कु आच़्छ़ी आ।

¹⁰ज़ासरी शादी हुई गोई आ, तिउंलै हाऊं नाईं पर प्रभु हुकम दिआ कि बोउटी आपणै बोउटै कु अलग ना हुआ।

¹¹और ज़ैबै अलग भी हुआ लै बिणा शादीऐ रौएऊ। या ता पैहलकै बोउटै आइलै डेवेऊ-और ना बोउटौ आपणी बोउटी कु अलग रौआ।

¹²आबै हाऊं तिऊं विश्वासिऊ लै बोलाऊ ज़ुणिऐ अविश्वासी लोगु आइलै शादी की आ। इयौ हुकम मुकै प्रभु कु नाईं मिलौ: अगर कासी विश्वासी भाई री छ़ेउड़ी आमारै प्रभु माथै विश्वास नाईं कौरदी पर आपणै बोउटै आइलै रौउणौ च़ाहा सा ता तिणी विश्वासी भाईऐ सै पोरु नाईं च़ांई गाड़नी।

¹³ज़ास छ़ेउड़ी रौ बोउटौ भी विश्वास नाईं छ़ाड़ा लौ, और आपणी बोउटी आइलै रौइणा लै खुश औलौ। तियांऐ आपणौ बोउटौ नाईं च़ाई छ़ाड़णौ।

¹⁴कैलैकि इणौ बोउटौ ज़ुण विश्वास नाईं कौरदौ, सेऊ आपणी बोउटी रै ज़ौरिऐ पवित्र कौरीया। और इणी बोउटी ज़ो विश्वास नाईं कौरदी, सै आपणै बोउटै रै ज़ौरिऐ पवित्र कौरीया सा। अगर इणौ ना हुआ थौ ता तुमारी सन्तान अशुद्ध रौउणी थी; पर आबै सै परमेश्‍वरा लै अलग कौरी गौऐ ई।

¹⁵पर ज़ो आदमी विश्वास नाईं कौरदौ, अगर सेऊ अलग औलौ ता अलग औणै दैऔ, इणी हालतीऐ कोई भाई या बौइण बानणा दी नाईं आ। कैलैकि परमेश्‍वरै आमै मेल मिलापा कौरना लै ई औटाऐ औन्दै।

¹⁶का पौतौ आ इणौ भी हुई सौका आ कि छ़ेउड़ी आपणै बोउटै रै छ़ुटकारै री वज़ाह बौणा और बोउटौ आपणी बोउटी रै छ़ुटकारै री वज़ाह बौणा।

¹⁷परमेश्‍वरै ज़ुण ज़िणै हालता दी छ़ाड़ै औन्दै और ज़िणै औटाऐ ई, सेऊ तेथी दी बौणी रौआ। सारी कलिसिया लै मैरौ एज़ौ हुकम आ।

¹⁸अगर कासी रौ यीशु मसीह माथै विश्वास कौरदी बारै खतनौ औलौ कियौ औन्दौ ता सेऊ इऐं बूश ना च़ोरा और अगर तेसरौ खतनौ नाईं हुऔ औलौ ता सेऊ आपणौ खतनौ ना कौरावा।

¹⁹कैलैकि ना खतना वाल़ौ कुछ़ आ और ना बिणा खतनै वाल़ौ, पर परमेश्‍वरा रौ हुकम मानणौ ई सारेऊ कु ज़ुरुरी आ।

²⁰हर एक आदमी ज़ो ज़ेज़ी हालती दी आ औटाऔ औन्दौ सेऊ सेज़ी हालती दी रौआ।

²¹अगर तू सेवका री हालती दी आ औटाऔ औन्दौ ता फिकर ना कौरै। पर अगर तू आज़ाद हुई बौल़ा ई, ता इणौ ई काम कर।

²²कैलैकि ज़ो सेवा कौरणै री हालती दी प्रभुऐ औटाऔ औन्दौ आ, सेऊ प्रभु रै आज़ाद कियौ औन्दौ आ। तिणौ ई ज़ो आज़ादी री हालती आ औटाऔ औन्दौ, सेऊ मसीह रौ सेवक आ।

²³परमेश्‍वरै तुमै बौड़ी किमत्ती देइयौ ई खरीदै औन्दै। लोगु रै सेवक ना बौणौ, पर परमेश्‍वरा रै बौणौ।

²⁴ओ मैरै प्यारै साथी विश्वासिउओ, ज़ुण कुण ज़ेज़ी हालती आ औटाऔ औन्दौ, तिणीऐ सेज़ी हालती दी परमेश्‍वरा आइलै रौ।

²⁵बिण ब्याई छ़ोटुड़ी रै बारै दी मुकै प्रभु यीशु रै कोई भी हुकम नाईं मिली, पर विश्वास वाल़ौ हुणा लै ज़िणी दया प्रभुऐ मुं माथै की आ, तेथी रै मुताबिक हाऊं तुमुलै हुकम दिआऊ।

²⁶आज़कल विश्वासिऊ लै काट्ठौ बौगत आ एथीलै मेरी सौमझ़िऐ इणौ आच़्छ़ौ आ कि आदमी ज़िणौ आसा सा तिणी रौआ।

²⁷अगर तुमै शादी शुदा ई ता आपणी बोउटी कु अलग हुणै री कोशिश ना कौरौ। और अगर तू शादी-शुदा नाईं ता आपुलै बोउटी लोड़दै नाईं डेऊ।

²⁸पर अगर तू शादी कौरालौ और अगर बिण ब्याई छ़ोटूड़ भी शादी कौरा ली, ता कुछ़ भी पाप नाईं आसतौ। पर इणेउऐ आपणी ज़िन्दगी दी दु:ख जा ई झेलणै, एथीलै हाऊं तुमु तिऊं दु:खा कु बौच़ाउणौ च़ाहा ऊ।

²⁹ओ मैरै प्यारै साथी विश्वासिउओ, हाऊं इणौ बोलाऊ कि आमुकै इऐं दुनिया दी ज़ादौ बौगत नाईं आ बौच़ौ औन्दौ, एथरी वज़ाह कु इणी झ़ौरी ना कौरौ कि आमुकै बोउटी आ या नाईं, पर प्रभु री सेवा कौरणै रै बारै दी सुंच़ौ।

³⁰और लेरणै वाल़ै इणै हुऔ, मानौ कि सै केबी भी लेरदै नाईं। और खुशी कौरणै वाल़ै इणै हुऔ, मानौ कि सै कोई खुशी ना कौरा। और खरीदणै वाल़ै इणै हुऔ कि, मानौ कि तिऊं कै कुछ़ भी नाईं आसतौ।

³¹और ज़ो कुछ़ आमुकै इऐं दुनिया दी आ, आमुऐ सै च़िज़ै भौरी खास नाईं च़ांई सौमझ़णी। कैलैकि इऐ च़िज़ै सौदा लै नाईं रौउंदी।

³²पर हाऊं इणौ च़ाहा ऊ कि तुमुलै फिकर ना हुआ। बिणा शादी रौ आदमी प्रभु री सेवा री फिकरा दी रौआ सा कि प्रभु किणै कौरी खुश छ़ाड़ुलै।

³³पर शादी शुदा आदमी धौतरी री बुशु री फिकरी दी रौआ कि आपणी बोउटी किणै कौरीऐ खुश छ़ाड़ुलै।

³⁴शादी शुदा और बिण शादी शुदा छ़ेवड़िउ दी भी फर्क आ: बिण शादी शुदा वाल़ी छ़ोटी प्रभु री सेवा री फिकरी दी रौआ कि सै शरीर और आत्मा दी दुइया दी पवित्र च़ांई, पर शादी शुदा वाल़ी छ़ेउड़ी दुनिया री च़िज़ु री फिकरी दी लागी रौआ सा कि आपणौ बोउटौ किणै कौरीऐ खुश छ़ाड़ी।

³⁵हाऊं इऐं बूश तुमारी भौलाई लै बोलाऊ ना कि तुमु फौसाउणा लै, इणौ कि एथीलै ज़िणौ शोभा-ढौभा आ तिणी ई च़ांई कौरणौ, कि तुमै एकी मौना हुइयौ प्रभु री सेवा दी लागी रौआ।

³⁶अगर कासकै इणौ लागा कि आपणी छ़ोटुड़ी री शादी दी बेरी पाइणै रै ज़ौरिऐ तिंया आइलै गलत आ कौरदै लागौ औन्दौ, कैलैकि तियांरी उमर आ डेउंदै लागी ऐन्दी, ता सेऊ तिणी कौरालौ ज़िणौ तेसकै ठीक लागा सा। सेऊ तिऐं शादी कौरणै दिया लौ एऊ कोई पाप नाईं आसतौ।

³⁷पर ज़ुण मौना दी पाकौ रौआ और तेसकै ज़रूरत नाईं औली, यानी की आपणी इच़्छ़ा काबु कौरालौ, और आपणै मौना दी इऐ बूश ठाणी एरी कि आपणी बिण ब्याई छ़ोटी री शादी नाईं कौरदौ, ता सेऊ आच़्छ़ौ कौरा सा।

³⁸एथीलै कि ज़ुण आपणी छ़ोटुड़ी री शादी कौरालौ, सेऊ आच़्छ़ौ कौरा सा, और ज़ुण शादी नाईं कौरदौ, सेऊ तेथकु भी आच़्छ़ौ कौरा सा।

³⁹ज़ेबी झ़ांऊ कास छ़ेउड़ी रौ बोउटौ ज़िउंदौ रौआ सा, तेबी झ़ांऊ सै तेस आइलै बानुई ऐन्दी आ, पर अगर तिंआरौ बोउटौ मौरी जाआ लौ ता सै ज़ास आइलै च़ाहा ली शादी कौरी सौका सा, पर सिरफ मसीह विश्वासी आइलै।

⁴⁰पर अगर ज़िणी आसा सा तिणी ई रौआ ली ता मैरै बिच़ारा दी ओर भी आच़्छ़ौ आ। और हाऊं सौमझ़ाऊ कि परमेश्‍वरा री आत्मा मुंदी भी आ।