Read Pahari, Mahasu 1 कुरि 9 Bible Online

1 कुरि 9 - Pahari, Mahasu bible

1 कुरि 9

¹का हाऊं आज़ाद नाईं ऊ? का हाऊं प्रेरित नाईं ऊ? का मुंइऐ यीशु ज़ुण आमारौ प्रभु आ नाईं देखौ? का तुमै प्रभु दी मैरै चाणै औन्दै नाईं आ?

²अगर हाऊं दुजेऊ लै प्रेरित नाईं, तैबै भी तुमुलै ता आसती ऊ। कैलैकि तुमारौ मसीह माथै विश्वास कौरणौ इणौ साबित कौरा सा कि हाऊं प्रेरित ऊ।

³ज़ुण मुं पौरखा ई, तिउंलै मैरौ ज़वाब एज़ौ आ।

⁴का आमुलै खाणै-पिणै रौ हक्क नाईं आ?

⁵का आमुलै एज़ौ हक्क नाईं आ, कि कास मसीह छ़ोटुड़ी आइलै शादी कौरीयौ तिंया आइलै रौई, ज़िणौ दुजै प्रेरित और प्रभु रै भाई याकूब, यहुदा और पतरस बोलाई।

⁶का सिरफ हाऊं और बरनबास ई इणै, ज़ुण आपु आपणी कौमाई कौरना लै मज़बूर ई?

⁷सेना दी इणौ कुण हुआ ज़ुण आपणै ई खौरच़ै माथै एक फौज़ी रै रुपा दी काम कौरा? मतलब कि इणौ हुआ कुण कि ज़ुण अंगुरा रौ बौगिच़ौ लाइऔ तिदरा कु अंगूर ना खा? और कुण ऐ आ इणौ ज़ुण भेरी च़ारियौ तिऊंरौ दूध ना पिया?

⁸हाऊं इऊं बुशु लोगु रै तरिकै कौरीऐ नाईं बोलदौ। मुसा रै नियम भी एज़ी बुशै बोलाई।

⁹कैलैकि मुसा रै नियमा दी इणौ आ लिखौ औन्दौ, “बाइंदी बारै बौल़दा रै मुं नाईं च़ांई बानणै।” का परमेश्‍वरा कै सिरफ बौल़दा री ई फिकर कौरा सा?

¹⁰या खास कौरीऐ आमुलै ई बोला सा? ओ, आमुलै ई लिखौ औन्दौ, कैलैकि ठीक आ कि बौल़दा जोचणै वाल़ौ आशी कौरीऐ बौल़द जोचा और बाइणै वाल़ौ भागीदार भी आशी कौरीऐ हौल़ च़लावा।

¹¹आमुऐ तुमु मांझ़िऐ आत्मिक च़िज़ै बौई, एथीलै एज़ी कोई बौड़ी बूश नाईं आसती कि तुमु कु शरीर वाल़ी च़िज़ेऊ री फौसल लौई।

¹²अगर दुजेऊ रौ तुमु माथै हक्क आ, तैबै का तुमु माथै आमारौ हक्क तिऊंकु ज़ादौ नाईं आसतौ? तैबै भी आमुऐ एस हक्‍का रौ इस्तेमाल नाईं कियौ। पर आमुऐ सब कुछ़ सौबरा कौरीऐ सहन कौरौ आ ताकी मसीह री खुशी री खौबरी रै परचारा दी कोई रुकावट ना हुआ।

¹³का तुमै नाईं ज़ाणदै ज़ुण परमेश्‍वरा रै घौरा दी सेवा कौरा ई, सै परमेश्‍वरा रै घौरा कु खा पिया ई। और ज़ुण बेदी री सेवा कौरा ई, सै बेदी आइलै भागीदारी हुआई?

¹⁴इणै कौरीऐ प्रभु रै भी ठहराऔ औन्दौ आ कि ज़ो लोग खुशी री खौबर शुणाउवाई तेसरौ खौरच़ौ भी खुशी री खौबरी कौरीऐ औआ।

¹⁵पर मुइंऐ इऊं हक्‍का रौ इस्तेमाल नाईं कियौ और एस हाऊं एथरी ताइंऐ नाईं ऊ लिखदै लागौ औन्दौ कि आबै तुमै मुलै इणौ कौरौ। हाऊं च़ाऊ रौंगै मौरुलै पर हाऊं एज़ै गर्वा कु दूर नाईं औणौ च़ांहादौ।

¹⁶अगर हाऊं खुशी री खौबर शुणाऊं ता मुलै कुछ़ भी गर्वा री बूश नाईं, कैलैकि एऊ ता मैरौ फर्ज़ आ। अगर हाऊं खुशी री खौबर नाईं शुणाउलौ, ता मुलै फिटकार आ!

¹⁷अगर हाऊं आपणी मौरज़ी कौरी परचार कौराऊ ता मुलै तेथरी मज़दुरी मिला सा, पर अगर हाऊं परचार आपणी मौरज़ी कौरी नाईं कौरदौ ता एऊ सिरफ आपणी ज़िम्मेबारी पुरी कौरणी आ।

¹⁸ता मेरी केज़ी मज़दुरी आ? एऊ कि हाऊं खुशी री खौबरी रौ परचार मुफ्तिऐ कौरुलौ, इदरा झ़ांऊ कि खुशी री खौबरी दी ज़ो मैरौ हक्क आ तेस भी हाऊं पुरी रीती कौरी इस्तेमाल नाईं कौरु।

¹⁹कैलैकि सौभी कु आज़ाद हुइयौ भी हाऊं सौभी रौ सेवक बौणौ, एथीलै कि हाऊं ज़ादै कु ज़ादै लोगु मसीह काऐ आणु।

²⁰हाऊं यहुदिऊ लै यहुदी बौणौ कि हाऊं यहुदिऊ मसीह दी आणु। ज़ो लोग यहुदी नियमा रै अधीन थै दौबै औन्दै, तिऊं मसीह काऐ आणना लै हाऊं नियमा रै अधीन हुऔ। असली दी ता हाऊं नियमा रै अधीन नाईं थौ।

²¹इणी ई ज़ेबी हाऊं दुज़ी ज़ातीऊ आइलै थौ ज़ुण यहुदिऊ रै नियम नाईं मानदै, ता हाऊं तिऊं ज़िणौ बौणौ ताकी तिऊं मसीह दी आणु। एथरौ इणौ मतलब नाईं आसतौ कि हाऊं परमेश्‍वरा रै नियम नाईं मानदौ बल्कि हाऊं सौदा मसीह रै हुकम माना ऊ।

²²और ज़ेबी हाऊं तिऊं आइलै थौ ज़ुण विश्वासा दी कमज़ोर ई, ता मुइंऐ तिऊं आइलै तिणी बरताव कियौ ज़िणौ सै कौरा थै। ताकी हाऊं तिउंरी मसीह पिछ़ु हाण्डणा लै मज़द कौरु। हाऊं सब लोगु लै सब कुछ़ बौणौ ताकी हाऊं किणै ना किणै कोरीऐ कुछ़ लोगु रौ छ़ुटकारौ कौराऊ।

²³हाऊं एस सब कुछ़ मसीह री खुशी री खौबरी रौ परचारा लै कौराऊ ताकी मुकै सै आशीषै मिला ज़ेथरौ वायदौ परमेश्‍वरै आ कियौ औन्दौ।

²⁴का तुमै नाईं ज़ाणदै कि फेटै रै मुकाबलै दी ता सब फेटे मारा ई, पर इनाम एक ई आदमी निआं सा? तुमै इणी ई फेटै मारौ कि तुमै ज़िता।

²⁵हर एक पहलवान सारौ कुछ़ सौबर कौरा सा। सै ता एक मुरझ़ाणै वाल़ै ताज़ ज़ितणा लै इणौ सब कुछ़ कौरा ई, पर आमै ता तेस ताजा लै कौरी सा ज़ो केबी ना मुरझ़ाअंदौ।

²⁶एथीलै हाऊं ता एज़ी ई रीती कौरीऐ फेटै मारा ऊ पर बिणा मतलबा री फेटै नाईं मारदौ। हाऊं भी इणी रीती कौरीऐ मुकुऐ कौरीऐ पिटिआ ऊ, पर तेस बाशीऐ नाईं ज़ो बागुरा दी मुकुऐ लाइयौ पिटिआ सा।

²⁷हाऊं आपणौ शरीर आपणै बौशा दी आणाऊ, ताकी इणौ ना च़ांई हुऔ कि ओरीउलै परचार कौरीयौ हाऊं केज़ी रीती माथै निकामौ बौणु।