Read Pahari, Mahasu 2 कुरि 12 Bible Online

2 कुरि 12 - Pahari, Mahasu bible

2 कुरि 12

¹अगर घमण्ड कौरणौ मुलै ठीक नाईं आ तैबै भी कौरणौ जा सा। एथीलै हाऊं प्रभु रै दैऔ औन्दै दर्शण और परमेश्‍वरा री देखाल़ी ऐन्दी बुशै बोलाऊ।

²हाऊं चौदह बौरश पैहलै सौरगा दी उठाऔ ऊ। हाऊं आपणै शरीरा दी या शरीरा कु बाइरै थौ मुकै कोई पौतौ नाईं आसतौ सिरफ परमेश्‍वर ज़ाणा सा।

³ओ, सिरफ परमेश्‍वर ई ज़ाणा सा। कि हाऊं शरीरा दी थौ, या शरीरा कु बाइरै। पर हाऊं ज़ाणाऊ

⁴कि हाऊं सौरगा दी उठाऔ थौ और इणी बुशै शुणी ज़ो बोलणै री नाईं। और ज़ो मुंआ दी आणनी आदमी लै ठीक नाईं।

⁵इणी घटना माथै घमण्ड कौरणौ ठीक आ, पर हाऊं इणौ नाईं कौरणै वाल़ौ। हाऊं सिरफ आपणी कमज़ोरी माथै घमण्ड कौराऊ।

⁶कैलैकि अगर हाऊं घमण्ड कौरणौ च़ाऊ लौ ता मुर्ख नाईं औन्दौ, कैलैकि सौच़्च़ौ बोलाऊ। तैबै भी आपु घमण्डा कौरणै कु रोका ऊ, कैलैकि हाऊं नाईं च़ांहादौ कि कुण मेरी एथकु ज़ादी बौड़ाई कौरा ज़ो सै मेरी ज़िन्दगी देखा और मुकु वचन शुणा आ।

⁷एथीलै कि हाऊं परमेश्‍वरा री बोली औन्दी नोखी बुशु माथै घमण्ड ना कौरु, मैरै शरीरा दी एक काँडौ खुबाऔ आ यानी के शैताना रौ एक दूत ज़ो मुलै तकलीफ दिया आ, ताकी हाऊं घमण्ड ना कौरु।

⁸एथरै बारै दी मुंइऐ प्रभु कु चिआ बारै औरज़ की मुकाऐ कु एऊ दूर च़ांई हुऔ।

⁹प्रभुऐ मुंलै बोलौ, “मेरी बौड़ी दया ताउंलै भौरी आ, कैलैकि मेरी तागत कमज़ोरी दी पाकी हुआ आ।” एथीलै हाऊं बौड़ी खुशी कौरीऐ आपणी कमज़ोरी माथै घमण्ड कौराऊ कि मसीह री तागत मुं माथै बौणी रौआ।

¹⁰एज़ी वज़ाह कु हाऊं मसीहा लै कमज़ोरी दी, और बेइज़्ज़ती दी, और गरीबी दी, और झ़ौगड़ै दी, और मुसीबता दी खुश ऊ। कैलैकि ज़ेबी हाऊं कमज़ोर हुआ ऊ तेबी हाऊं मसीह री शक्ति दी मज़बूत हुआ ऊ।

¹¹हाऊं मुर्खता बौणौ पर तुमुऐ ई हाऊं इणौ कौरना लै मज़बूर कियौ ऊ। तुमुऐ ता मेरी तारीफ कौरणी च़ांई थी, कैलैकि अगर हाऊं कुछ़ भी नाईं, तैबै भी तिऊं ज़ुण आपुलै बौड़ै कु बौड़ै प्रेरित सौमझ़ा ई केज़ी भी बुशा कु कम नाईं आसतौ।

¹²सौच़्च़ै प्रेरिता रै लौछ़ण भी तुमु मांझ़िऐ सारै रौंगा रै धीरजा आइलै निशाण, और च़मत्कार, और शक्ति वाल़ै कामु दी देखाल़ै ई।

¹³तुमै केज़ी बुशु दी दुजी कलिसियाऊ कु कम थै, सिरफ एथदी कि मुंइऐ तुमु माथै भार नाईं पाऔ। मैरौ एस अन्याय माफ कौरौ।

¹⁴देखौ हाऊं चीजी बारै तुमु काऐ आशणा लै तैयार ऊ, और हाऊं तुमु माथै केज़ौ भी भार नाईं छ़ाड़दौ। कैलैकि हाऊं तुमारी धन-ज़यदाद नाईं बल्कि तुमु ई च़ाहा ऊ। कैलैकि छ़ोहरुऐ आमा-बाबा लै धन-ज़यदाद कौठै नाईं च़ांईं कौरणी, पर आमै-बाबै छ़ोहरु लै धन-ज़यदाद कौठै कौरणी च़ांई।

¹⁵हाऊं तुमुलै भौरी खुशी कौरी खौर्च़ कौराऊ यानी कि आपु भी खौर्च़ियाउ। हाऊं तुमु आइलै भौरी प्यार कौराऊ, पर इणौ ज़ाणिया कि तुमैं मुं आइलै सिरफ थोड़ौ ज़ेई प्यार कौरा ई।

¹⁶तैबै भी तुमुऐ मानणौ जा कि मुंइऐ तुमु माथै भार नाईं पाऔ, पर हुई बौल़ा आ कि कुछ़ लोग इणौ बोला कि, “मुइंऐ तुमु आइलै च़तुराई की आ और तुमै धोखै देइयौ फौसाऐ ई।”

¹⁷शुणौ ज़ो मुंइऐ तुमु काऐ भेज़ै ई, का तिऊं मांझ़िया कु कास कौरीऐ मुंइऐ ठौगाइयौ तुमु कु कुछ़ नीं ऐरौ आ?

¹⁸मुंइऐ तितुस सौमझ़ाइयौ तेस आइलै सेऊ भाई भेज़ौ, ता का तितुसै ठौगाइयौ तुमु कु कुछ़ नींऔ आ? का आमुऐ एक ई पवित्र आत्मा नाईं मानी? का आमुऐ एकी तरिकै कौरी काम नाईं किऐ?

¹⁹ओ मैरै प्यारै साथी विश्वासिउओ, तुमैं इबी झ़ांऊ सौमुझ़दै औलै लागै औन्दै कि आमै तुमु काऐ आपणी तौरफदारी देखाल़ी आ। पर आमै ता परमेश्‍वरा री मौज़ूदगी ज़ाणियौ मसीह दी बोली ई, और इऐ सारी बुशै तुमारै विश्वासा दी बौड़णा लै बोली ई।

²⁰कैलैकि मुकै डौर आ कि, किऐ इणौ ना च़ांई हुऔ कि हाऊं आशीयौ ज़िणौ च़ाहा ऊ, तिणौ मुकै तुमु दी ना दिशा। और ज़िणौ तुमैं नाईं च़ाहांदै तिणौ ई दिशु। हाऊं डौराऊ कि तुमु मांझ़िऐ झ़ौगड़ौ, डाह, रोश, बिरोध, ईर्ष्या, च़ुगली, घमण्ड और बखेड़ै हुआ।

²¹और किऐ इणौ ना च़ांई हुऔ कि ज़ेबी हाऊं दुजी बारै तुमु काऐ आशु, ता मैरौ परमेश्‍वर मुं तुमु काऐ शर्मिंदौ ना कौरा। और मुं भौरी सारेऊ लै तौंइऐ दु:ख कौरणौ जा लौ, ज़ुणिऐ पैहलै पाप कियौ थौ और गान्दै काम और बुरै बिच़ार और लाल़च़ ज़ो तिंउऐ कियौ, तेथकु मन ना बौदल़ौ।