Read Pahari, Mahasu 2 कुरि 13 Bible Online

2 कुरि 13 - Pahari, Mahasu bible

2 कुरि 13

¹आबै चीजी बारै हाऊं तुमु काऐ आशणौ ऊ, पवित्रशास्त्रा दी आ लिखौ औन्दौ कि, “दुई या चीन गवाह रै मुंआ कौरी सारी बुशै पाकी कौरा ई।”

²ज़िणौ हाऊं ज़ेबी दुजी बारै तुमु आइलै थौ, तिणी ई आबै दूर रौइयौ तिऊं लोगु कु ज़ुणिऐ पैहलै पाप कियौ, और ओरी सारेऊ लोगु कु पैहलै बोलाऊ कि अगर हाऊं तौंइऐ आशु लौ ता नाईं छ़ाड़दौ।

³हाऊं तुमुलै बोलाऊ कि तुमै ता एथरौ सबूत च़ाहा ई, कि मसीह मैरै ज़ौरिऐ बोला सा, ज़ेबी मसीह तुमु ठीक कौरा सा ता मसीह कमज़ोर नाईं पर तुमु मांझ़िऐ शक्ति वाल़ौ आ।

⁴सेऊ कमज़ोरी री वज़ाह कु क्रुसा माथै टांगी ता ऐरौ आ। तैबै भी परमेश्‍वरा री शक्ति कौरी ज़िउंदौ आ। आमै भी मसीह ज़िणै कमज़ोर ई, पर परमेश्‍वरा री शक्ति कौरी ज़ो तुमुलै आ तेस आइलै ज़िवी ई।

⁵आपु पौरखियौ कि विश्वासा दी आसती कि नाईं। आपणी ज़ांच़ कौरौ। का तुमैं आपणै बारै दी इणौ नाईं ज़ाणदै कि यीशु मसीह तुमु दी आ? नाईं ता तुमैं पौरखुइयौ निकामै निकल़ी गोऐ ई।

⁶पर मेरी आश आ कि तुमैं पोरु ज़ाणाई कि आमै निकामै नाईं आसतै।

⁷आमै आपणै परमेश्‍वरा कु प्राथना कौरी कि ज़ो तुमै आच़्छ़ौ कौरा। एथलै नाईं कि आमै ठीक दिशी गोऐ, पर एथलै कि तुमैं भौलाई कौरौ, च़ाऊ आमै निकामै ई कैलै ना औलै।

⁸कैलैकि आमै सौच़्च़ाई रै विरोधा दी कुछ़ नाईं कौरी बौल़दै, पर सिरफ सौच़्च़ाई लै ई कौरी ई।

⁹ज़ैबै आमै कमज़ोर ई, और तुमैं शक्ति वाल़ै ई, ता आमै खुश हुई ई, और इणी प्राथना भी कौरी ई कि तुमै विश्वासा दी पाक्कै बौणौ।

¹⁰एज़ी वज़ाह कु हाऊं तुमारी पीठी पिछ़ु इऊं बुशै लिखाऊ, कि हाज़िर हुइयौ मुकै तेस हक्‍का कौरीऐ ज़ो प्रभुऐ बिगाड़णा लै नाईं पर चाणना लै मुकै दैऔ आ, सौखती कौरी कुछ़ ना जा लौ कौरणौ।

¹¹पर ओ मैरै प्यारै साथी विश्वासिउओ, खुश रौऔ, और पाकै थाकौ बौणदै लागी, एकी दुजै लै हौसलौ दैऔ, एक ई मन छ़ाड़ौ, मेल मिलापा कौरी रौऔ। प्यार और शान्ति दैणै वाल़ौ परमेश्‍वर तुमु आइलै हुआ।

¹²एकी दुजै आइलै पवित्र ज़िवा कौरी गौल़ै मिलियौ ढाल कौरौ।

¹³सारै परमेश्‍वरा रै लोग तुमुकै ढाल कौरा ई।

¹⁴प्रभु यीशु मसीह री बौड़ी दया और परमेश्‍वरा रौ प्यार और पवित्र आत्मा रौ साथ तुमु सौभी आइलै औन्दै थाका लौ लागी।