Read Pahari, Mahasu 2 कुरि 2 Bible Online

2 कुरि 2 - Pahari, Mahasu bible

2 कुरि 2

¹मुंइऐ आपणै मौना दी इणौ ई ठाणी ऐरौ थौ कि एकी बारै तुमु काऐ तौंइऐ आशीयौ तुमुलै दु:ख ना देऊ।

²कैलैकि अगर हाऊं तुमु दु:खी कौरु, ता मुलै खुशी दैणै वाल़ौ कुण हुआ सा, सिरफ सेई ज़ुण मुंइऐ दु:खी कियौ आ?

³और मुंइऐ एज़ी ई बूश तुमुलै एथलै लिखी आ कि किऐ इणौ ना च़ांई हुऔ कि मैरै आशणै कु, ज़ासकु मुलै खुशी मिलणी च़ांई हाऊं तिऊंकु दु:खी औऊ। कैलैकि मुकै तुमु सौभी माथै एज़ी बुशा रौ भरोसौ आ कि ज़ो मेरी खुशी आ कि सेज़ी ई खुशी तुमु सौभी री भी आ।

⁴भौरी दु:ख और मौना रै कौष्टा कु मुंइऐ भौरी लेरी-लेरीयौ तुमुलै सै चिट्ठी लिखी थी, मुंइऐ एथलै ना लिखी कि तुमैं दु:खी हुआ, पर एथीलै लिखौ कि तुमैं तेस बौड़ौ प्यार ज़ाणौ, ज़ो प्यार मैरौ तुमु आइलै आ।

⁵अगर कुणिऐ दुःख दैऔ आ सेऊ सिरफ मुंई लै ना दैऔ, पर अगर ज़ादौ ना बोलु ता थोड़ौ-भौरी दुःख तुमुलै भी दैऔ आ।

⁶इणै आदमी लै भौरी सौज़ा ज़ो तेसलै मिली गोई आ सै तेसलै काफी आ।

⁷एथीलै एथकु आच़्छ़ौ इणौ आ कि तेसरौ पाप माफ कौरौ, और तेसलै सुख-शान्ति दैऔ, इणौ ना च़ांई हुऔ कि सेऊ आदमी भौरी दुःखा दी डुबा।

⁸एज़ै मतलबै हाऊं तुमु कु औरज़ कौराऊ कि तुमैं तेस आदमी लै आपणौ प्यार देखाऔ।

⁹कैलैकि मुंइऐ तुमुलै एथलै भी लिखौ थौ कि हाऊं तुमु पौरखु कि तुमैं मेरी बुशु मानणा लै तैयार आसती भी, कि नाईं।

¹⁰ज़ासरौ तुमैं कुछ़ माफ कौरा ई ता हाऊं भी तेस माफ कौराऊ। कैलैकि ज़ो कुछ़ मुंइऐ माफ कियौ आ ज़ो माफ हुणौ च़ांई थौ, ता मसीह रै हक्‍का कौरीऐ तुमारै फाइदै लै हाऊं माफ कौराऊ,

¹¹कि शैताना रौ आमु माथै कोई भी हक्क ना च़ाला। कैलैकि ज़ो कुछ़ शैतान कौरा सा तेथरै बारै दी आमै अणज़ाण नाईं आसतै।

¹²ज़ेबी हाऊं यीशु मसीहा रौ खुशी री खौबर शुणाउंदै त्रोआस शैहरा दी आशौ, ता प्रभुऐ मुलै दार खोलौ सा।

¹³मुकै आपणौ विश्वासी भाई तितुस तिऐ नाईं मिलौ ता मैरै मौना लै च़ैन ना मिलौ। एथीलै तिऊंकु मिलियौ हाऊं मकिदुनीया परदेशा लै वापिस च़ाल पौड़ौ।

¹⁴पर परमेश्‍वरा रौ धन्यबाद आ कैलैकि मसीह री एकता री वज़ाह कु सेऊ आमु सौदा आपु आइलै औंडावा आ। आमु ज़ितावा सा और आपणै ज्ञाना री खुशबु आमारै ज़ौरिऐ सौभी ज़ागाह दी फैलावा सा।

¹⁵कैलैकि आमै परमेश्‍वरा रै नज़दीक छ़ुटकारौ पाइणा वाल़ै और नाश हुणै वाल़ै, मांझ़िऐ मसीह री खुशबु ई।

¹⁶ज़ुण नाश हुणै री बाटा दी ई तिउंलै मौरणै री गन्ध और ज़ुण ई छ़ुटकारै री बाटा दी तिऊं मांझ़िऐ आ ज़िउणै री खुशबु। पर एज़ी बुशा लायक कुण आ?

¹⁷कैलैकि आमै तिऊं सारेऊ ज़िणै नाईं आसतै ज़ुण परमेश्‍वरा रै वचन लेण-देण कौरीयौ आपणै फाइदै लै शुणावा ई। पर आमै मौना री सौच़्च़ाई कु परमेश्‍वरा री मौज़ूदगी ज़ाणियौ मसीह दी बोली ई।