Read Pahari, Mahasu 2 कुरि 3 Bible Online

2 कुरि 3 - Pahari, Mahasu bible

2 कुरि 3

¹का आमै तौंइऐ आपणी बौड़ाई कौरदै थाकी लै लागी? या आमै ओरी लोगु बाशीऐ सिफारिशा री चिट्ठी आणनी या तुमु कु निणी आ?

²आमारी चिट्ठी ता तुमैं ई आ, ज़ो आमारै ज़िवा दी आ लिखी औन्दी और तिऐं चिट्ठी सारै आदमी प्राणा और पौढ़ाई।

³इणौ पौगड़ौ आ कि तुमैं यीशु मसीहा री तौरफा कु एक चिट्ठी ज़िणै ई, इऐ चिट्ठी आमारी सेवा कौरणै रौ फल़ आ, ज़ो स्याई कौरी नाईं पर ज़िउंदै परमेश्‍वरा री आत्मा कौरी, पात्थरा री पट्टी माथै नाईं पर ज़िवा रै मांसा ज़िणी पट्टी माथै लिखी औन्दी।

⁴आमै मसीह रै ज़ौरिऐ परमेश्‍वरा माथै इणौ ई भरोसौ छ़ाड़ी आ।

⁵इणौ नाईं कि आमै आपु ई इणै जोगी आ कि आमै आपणी तौरफा कु केज़ी बुशु रौ बिच़ार कौरी बौल़ी, पर ज़ो कुछ़ आमारै शिखौ औन्दौ आ, और औकल आ, सब कुछ़ परमेश्‍वरा री तौरफा कु आ।

⁶तिणीऐ आमै नौंवै वायदा रै सेवक हुणै रै लायक भी किऐ ई। इऐ मुसा रै नियमा रै सेवक नाईं पर पवित्र आत्मा रै। कैलैकि मुसा रै नियम नाईं मानियौ आमुलै सौज़ा मिला आ, पर पवित्र आत्मा सौदा री ज़िन्दगी दिया आ।

⁷ज़ेबी मुसा रै नियम ज़ाण्टै माथै लिखै थै, तेबी परमेश्‍वरा री महिमा पौगड़ी हुई। इस्राइली लोग मुसा रौ मूंह काफी बौगता झ़ाऊं नाईं देखी बौल़ै, कैलैकि तेसरौ मूंह भौरी थौ च़मकदै लागौ औन्दौ हालांकी सै च़ौमक ज़ादै बौगता झ़ाऊं नाईं रौई। एथीलै अगर सै सेवा ज़ो मुसा रै नियमा रै मुताबिक मौउता भिलै निंआ आ ज़ेथदी सेज़ी महिमा थी, ता नौऐं वायदै रै मुताबिक सेवा कौरणी ज़िणौ पवित्र आत्मा अगुवाई कौरा आ तेथकु भी ज़ादौ च़ौमकिलौ हुणौ आ।

⁹कैलैकि ज़ैबै आरोपी चाणनै वाल़ौ वायदौ च़ौमकिलौ थौ, ता धौर्मी चाणनै वाल़ौ वायदौ एथकु ज़ादौ च़ौमकिलौ कैलै ना औन्दौ?

¹⁰और ज़ो मुसा रै नियमा री च़ौमक थी, सै भी तेस नौऐं वायदै रै च़ौमकिलै री वज़ाह कु ज़ो च़ौमक तेथाकु ज़ादी थी, कुछ़ भी ज़ादी च़ौमक नाईं रौई।

¹¹कैलैकि मुसा रै नियमा री च़ौमक थोड़ै बौगता लै रौई। पर नौऐं वायदै री च़ौमक तेथकु भी ज़ादी च़ौमकिली आ कैलैकि सै सौदा लै पाकौ रौआ आ।

¹²एथीलै एज़ी आश छ़ाड़ियौ आमै हिम्मत कौरी बोली ई।

¹³और आमै मुसा बाशीऐ नाईं, ज़ुणिऐ आपणै मुंआ माथै पौरदौ पाऔ थौ ताकी इस्राइली लोग तिऐं घौटणै वाल़ी च़ौमका रौ आखरी बौगत ना देखा।

¹⁴तिंउरै मन काठै हुई गोऐ, कैलैकि आज़ झ़ांऊ पुराणौ नियम पौढ़दी बारै तिंउरै ज़िवा दी सेज़ौ पौरदौ आ पौड़ौ औन्दौ। पर सेऊ पौरदौ यीशु मसीह माथै विश्वास कौरीयौ उठा सा।

¹⁵आज़ झ़ांऊ ज़ैबै भी मुसा री किताब पौढ़ाई, ता तिंउरै ज़िवा माथै पौरदौ पौड़ी थाका आ ताकी सै आच़्छ़ा कौरीऐ ना सौमझ़ा।

¹⁶पर ज़ैबै-केबी तिऊंरौ ज़िऊ प्रभु भिलै फिरा लौ, तैबै सेऊ पौरदौ पोरु टौल़ा आ।

¹⁷प्रभु और पवित्र आत्मा एका आ। और ज़िऐ-किऐ प्रभु रौ आत्मा सा, तिऐ आज़ादी आ।

¹⁸पर ज़ैबै आमै सारै आपणै खुलै मुंआ कौरी शिशे दी प्रभु री च़ौमका रौ ध्यान कौरी ई, ता आमै भी तिणी ई लागी ई, और आमारी च़ौमक भी प्रभु री आत्मा कौरी बौड़दै थाका लागी।