Read Pahari, Mahasu 2 कुरि 6 Bible Online

2 कुरि 6 - Pahari, Mahasu bible

2 कुरि 6

¹आमै ज़ो परमेश्‍वरा आइलै काम कौरी ई, तुमु कु इणी औरज़ भी कौरी कि प्रभु री बौड़ी दया ज़ो तुमु माथै हुई आ, तिऐं बेकार ना दैऔ डेउणै।

²कैलैकि पवित्रशास्त्रा दी परमेश्‍वर बोला सा, “ठीक बौगता दी मुंइऐ तेरी प्राथना शुणी आ, और छ़ुटकारै रै दिनै मुंइऐ तेरी मज़द की आ।” देखौ इबी एऊ ठीक बौगत आ। देखौ इबी एऊ छ़ुटकारै रौ दीन आ

³परमेश्‍वरा रै साथी ज़िणै, आमै केज़ी भी बुशा दी ठोकर खाणै रौ कोई भी मोकौ नाईं दैंदै, ताकी आमारी सेवा दी कोई भी आरोप ना लागा।

⁴पर सारी बुशु कु परमेश्‍वरा रै सेवकु ज़िणौ आपणै सारै आच़्छ़ै गुण साबित कौरी ई। आमै बौड़ी हिम्मती कौरी दुःखा झ़ेलणै दी, गरीबी दी, कौष्टा दी,

⁵कोड़ै खाइयौ, कैदा दी पौड़ीयौ ज़िऐ शान्ति नाईं औन्दी तिदरु, मैहनती कौरी, उज़ीई रौइऔ, ब्रौता छ़ाड़ियौ,

⁶पवित्रता कौरी, ज्ञाना कौरी, धीरजा कौरी, दया देखाल़ियौ, पवित्र आत्मा कौरी,

⁷सौच़्च़ै प्यारा कौरी, सौच़्च़ाई रै वचना कौरी, परमेश्‍वरा री शक्ति कौरी। और भौलाई रै औज़ारा कौरी ज़ो उल़टै सुल़टै हाथा दी ज़ो आमुकै बौच़णा लै और हामलै कौरना लै लागा ई।

⁸इज़्ज़त और बेइज़्ज़ती कौरी, आच़्छ़ै नावां कौरी और बुरै नावां कौरी यानी के आमु बिशवाशणै वाल़ै सौमझ़ा ई पर तैबै भी सौच़्च़ै ई।

⁹कुछ़ लोग आमु अणज़ाण ज़ाणाई, ज़ैबै कि आमु सौभी लोग ज़ाणाई और आमै मशहूर ई, और इणै ज़ाणाई ज़िणै मौरै औन्दै ई, देखौ तैबै भी आमै ज़िउंदै ई। पिटीयौ आमु झ़ांगणै च़ाहा ई पर ज़ानिऐ नाईं झ़ांगदै,

¹⁰आमै आपणै कौष्टा भौरी दु:खी ई पर तैबै भी सौदा खुशी मौनाई। हालांकी आमै गरीबु लोगु ज़िणै ई पर आमै भौरी लोगु आदमी आत्मिक्ता दी सेठ चाणी ई। आमै इणै ई ज़िणौ कि आमुकै कुछ़ भी नाईं तैबै भी आमुकै सब कुछ़ आ।

¹¹ओ कुरिन्थिऊ रै विश्वासिउओ, आमुऐ ज़िवा खोलियौ तुमु आइलै बुशै लाई आ, आमुऐ तुमु आइलै खुलै ज़िवा कौरी प्यार कियौ आ।

¹²तुमुलै आमारै ज़िवा दी कोई भी खोट नाईं, पर तुमारै ज़िवा दी आमुलै खोट आ।

¹³पर हाऊं आपणै छ़ोहरु ज़ाणियौ तुमु आइलै बोलाऊ कि तुमै भी तेथरै बौदल़ै तिणी ई आमु आइलै खुलै ज़िवा कौरी प्यार कौरौ।

¹⁴अविश्वासिऊ आइलै शौमाई दी ना जोचियौ। कैलैकि धौर्मा रौ और अधर्मा रौ का मेल मिलाप? या प्याशै और न्यारै री का संगती?

¹⁵इणौ ई का मसीहा रौ शैताना आइलै तालमेल औआ सा? या विश्वासिऊ रौ अविश्वासिऊ आइलै का नातौ?

¹⁶और मुर्तिऊ आइलै परमेश्‍वरा रै घौरा रौ का रिश्तौ? कैलैकि आमै ता ज़िउंदै परमेश्‍वरा रौ घौर ई। ज़िणौ परमेश्‍वरै पवित्रशास्त्रा दी बोलौ आ, “हाऊं तिऊंदी बौसाऊ और तिऊंदी हांडदै-फिरदै थाकाऊ लागी। और हाऊं तिऊंरौ परमेश्‍वर हुआ ऊ, और सै मैरै लोग हुआई।”

¹⁷एथीलै प्रभु पवित्रशास्त्रा रै ज़ौरिऐ आमुलै बोला सा, “तिऊं अविश्वासिऊ मांझ़िया कु पोरु निकल़ौ और अलग रौ। और गान्दी बुशेऊ कु दूर रौ, तैबै तुमु हाऊं आपुलै अपणावा ऊ।

¹⁸और हाऊं तुमारौ बाब हुआ ऊ, और तुमै मैरै छ़ोटी और छ़ोहरु हुआई। और एऊ सौभी कु शक्ति वाल़ै परमेश्‍वरा रौ वचन आ।”