Read Pahari, Mahasu 2 कुरि 8 Bible Online

2 कुरि 8 - Pahari, Mahasu bible

2 कुरि 8

¹आबै ओ मैरै प्यारै साथी विश्वासिउओ आमै तुमुलै परमेश्‍वरा री तिऐं बौड़ी दया री खुश खौबर देई ई ज़ो मकिदुनीया परदेशा री कलिसिया रै लोगु माथै हुई आ।

²कि ज़ेबी भौरी दुःखा दी तिऊंरौ इम्तहान हुऔ ता सै भौरी खुश हुऐ और भौरी गरीबी दी तिंउऐ खुलै ज़िवा कौरीऐ ओरी विश्वासिऊ री मज़द कौरना लै पैसै दै।

³तिंउरै बारै दी मेरी इऐ गवाही आ तिंउऐ आपणी शक्ति कु यानी के शक्ति कु भी ज़ादौ दैऔ आ।

⁴एस दाणा दी और पवित्र लोगु री सेवा दी ज़ुण यहुदिया परदेशा दी ई, साथी हुणै री मज़दा रै बारै दी, आमुकु घौड़ी-घौड़ी औरज़ की,

⁵और ज़िणी आमुऐ आश की थी, तिणी ई नाईं बल्कि पैहलै आपणौ ज़िऊ प्रभु लै, तैबै परमेश्‍वरा री मौरज़ी कौरी बासिऐ आमुलै भी दैऔ।

⁶एथीलै आमुऐ तितुस सौमझ़ाऔ कि ज़िणौ तिणीऐ पैहलै शुरु कियौ थौ तिणौ ई तुमु मांझ़िऐ एस दाण दैणा रौ काम पुरौ भी कौरालौ।

⁷एथीलै ज़िणौ तुमै सारी बुशु दी मतलब के विश्वास, वचना रौ परचार कौरणै दी ज्ञान और सारी रौंगा री कोशिषा दी, और तेस प्यारा दी ज़ो आमु आइलै छ़ाड़ाई, बौड़दै लागै औन्दै और तिणौ ई ज़ुरतमंद विश्वासिऊ लै दाण दैणै रै कामा दी भी बौड़दै थाकौ लागी।

⁸हाऊं इऐं बूश तुमुलै हुकमा रै रुपा दी नाईं दैंदै लागौ औन्दौ पर दुजै रै हौसला कु तुमारै प्यारा री सौच़्च़ाई परखुणा लै भी ऊ बोलदै लागौ औन्दौ।

⁹तुमै आमारै प्रभु यीशु मसीहा री बौड़ी दया ज़ाणाई कि सेऊ अमीर हुइयौ भी तुमुलै गरीब बौणौ आ ताकी तेसरै गरीब हुइयौ तुमै अमीर हुऔ।

¹⁰पिछ़लै बौरशा दी तुमै सारेऊ कु पैहलै थै ज़ुण दाण दैणौ च़ाहा थै, और तुमै थै ज़ुणिऐ सारेऊ कु पैहलै दाण दैणौ शुरु कियौ, इऐं बुशा दी मेरी सलाह एज़ी आ कि, एऊ तुमुलै आच़्छ़ौ आ।

¹¹एथीलै आबै एस काम पुरौ कौरौ कि ज़िणौ तुमैं देणा री इच़्छ़ा लै तुमैं तैयार थै, तिणी ई आपणै-आपणै खौरच़ै रै मुताबिक पुरौ भी कौरौ।

¹²कैलैकि अगर तुमै च़ाहा लै ता दाण तेथरै मुताबिक कबूल भी हुआ सा ज़ो तेसकै आसती आ, ना कि तेथरै मुताबिक ज़ो तेसकै नाईं आ।

¹³हाऊं इणौ नाईं च़ाहांदौ कि दुजेऊ लै सुख और तुमुलै मिला दुःख।

¹⁴पर बराबरी रै बिच़ारा कु एज़ै बौगतै तुमारी ज़ादी कौमाई कम कौमाई वाल़ै री ज़रूरत पुरी कौरा ताकी तिउंरी ज़ादी कौमाई तुमारौ काठौ बौगत सौंभाल़ा कि तुमारौ हिसाब किताब बराबर हुआ।

¹⁵ज़िणौ पवित्रशास्त्रा दी आ लिखौ औन्दौ, “ज़ुणिऐ भौरी कौमाऔ आ तेसरौ कुछ़ भी ना निकल़ौ, और ज़ुणिऐ थोड़ौ कौमाऔ तेसरौ कुछ़ भी कामत्ती ना निकल़ौ।”

¹⁶परमेश्‍वरा रौ धन्यबाद आ, ज़ुणिऐ तुमुलै सेज़ौ जोश तितुसा रै ज़िवा दी पाई ऐरौ आ ज़ो मुंदी थौ।

¹⁷कि तिणीऐ आमारौ सौमझ़ाउणौ मानी ऐरौ तैबै ई भौरी खुश हुइयौ सेऊ आपणी मौरज़ी कौरी तुमु काऐ आशदै लागौ औन्दौ।

¹⁸आमै तेस आइलै तेस विश्वासी भाई भी भेज़दै लागै औन्दै ज़ासरौ नाऊं खुशी री खौबर शुणाउणै रै बारै दी सारी कलिसिया रै विश्वासिऊ दी आ फौइलौ औन्दौ।

¹⁹और एती ई नाईं, पर सेऊ कलिसिया रै विश्वासिउऐ मानी भी ऐरौ कि एस दाणा रै कामा लै आमु आइलै डिया। आमै इऐं सेवा एज़ी ताइंऐ कौरी आ कि प्रभु री महिमा और आमारै मौना री तैयारी मज़द कौरना लै पौगड़ी हुई बौल़ा।

²⁰आमै एज़ी बुशु दी खौबरदार रौई ई कि एस खुलै ज़िवा कौरी दैणै रै कामा रै बारै दी ज़ासरी सेवा आमै कौरी ई, कोई भी आमु माथै बौदी ना लाई बौल़ा।

²¹कैलैकि ज़ो बुशै सिरफ प्रभु री नौज़री दी नाईं, पर लोगु री नौज़री दी भी भौली ई कि आमै तिऊं ठीक कौरना लै ध्यान देई।

²²आमुऐ तिऊं आइलै आपणौ एक विश्वासी भाई भी भेज़दै लागै औन्दै ज़ो आमुऐ घौड़ी-घौड़ी पौरखियौ भौरी बुशु दी जोशिलौ देखौ आ। पर आबै तुमु माथै तेसरौ बौड़ौ भरोसौ आ, एज़ी वज़ाह कु तेसदी तौंइऐ भी भौरी जोश आ।

²³अगर कुण तितुसा रै बारै दी पुछ़ा लौ, ता सेऊ मैरौ साथी और तुमुलै मैरै साथा दी कामा कौरणै वाल़ौ आ। और अगर कुण आमारै विश्वासी भाईऊ रै बारै दी पुछ़ा लौ, ता सै कलिसिया कु भेज़ै औन्दै कि सै यीशु मसीहा री महिमा कौरा ई।

²⁴एथीलै कि आपणौ प्यार और आमारौ सेऊ घमण्ड ज़ो तुमारै बारै दी आ, कलिसिया रै सामनै साबित कौरीयौ तिउंकै देखाल़ौ।