Read Pahari, Mahasu 2 कुरि 9 Bible Online

2 कुरि 9 - Pahari, Mahasu bible

2 कुरि 9

¹आबै यरुशलेमा रै विश्वासिऊ लै दाण दैणै री सेवा रै बारै दी मुकै तुमुलै लिखणौ ज़ुरुरी नाईं।

²कैलैकि हाऊं तुमारै ज़िवा री त्यारी ज़ाणाऊ, ज़ेथरी वज़ाह कु हाऊं तुमारै बारै दी मकिदुनीया परदेशा रै विश्वासिऊ रै सामनै घमण्ड देखाल़ा ऊ कि तुमै कुरिन्थिया रै लोग अखाया परदेशा दी एकी बौरशा ओउलै त्यार ई हुऐ औन्दै, और तुमारै हौसलै तौंइऐ भी भौरी लोग उकसाऐ ई।

³पर मुंइऐ सै चीन विश्वासी भाई एथलै भेज़ै ई कि आमुऐ ज़ो घमण्ड तुमारै बारै दी देखाल़ौ आ, सेऊ घमण्ड एज़ी बुशा दी बेकार ना बौणा। पर ज़िणौ मुंइऐ बोलौ तिणी ई तुमैं यरुशलेमा रै विश्वासिऊ लै दाण भेज़णा लै त्यार रौऔ।

⁴इणौ ना च़ांई हुऔ कि अगर कुण मुं आइलै मकिदुनीया परदेशा कु कुछ़ विश्वासी आशा और तुमु दाणा आइलै तैयार ना देखा, ता हुई बौल़ा आ कि एज़ै भरोसै री वज़ाह कु आमारी बेइज़्ज़ती हुआ, पर तुमारी तेथकु भी ज़ादी बेइज़्ज़ती हुणी।

⁵एथीलै मुंइऐ विश्वासी भाईऊ कु इणी औरज़ कौरणी ज़रूरी सौमझ़ौ कि सै पैहलै कु ई तुमु काऐ आशा, और तुमारै ज़िवा खोलियौ दैणै रौ फौल़ ज़ेथरै बारै दी पैहलै कु वचन देई गौ थौ, तयार कौरीयौ छ़ाड़ा कि एऊ ज़ौबरिऐ नाईं पर ज़िवा खोलियौ दैणै रै फौल़ा बाशीऐ त्यार हुआ

⁶पर बूश एज़ी आ, ज़ुण थोड़ौ बौआ सा, सेऊ थोड़ौ लौआ भी आ। और ज़ो भौरी बौआ सा, सेऊ भौरी का लौआ सा।

⁷हर एक आदमी ज़िणौ मौना दी ठाणा तिणौ दाण कौरा। ना ता कुड़-कुड़ाइयौ और ना ज़ौबरी ऐ, कैलैकि परमेश्‍वर खुशी कौरी दैणै वाल़ेऊ आइलै प्यार छ़ाड़ा सा।

⁸परमेश्‍वर सारै रौंगा री बौड़ी दया भौरी का दिआ सा ज़ेथ कौरी हर बुशु दी और हर बौगतै, सारौ कुछ़ ज़ो तुमुकै ज़रूरी औली, तुमु काऐ रौआ। और हर एक भौलै कामा लै तुमुकै भौरी कुछ़ च़ांई हुऔ।

⁹ज़िणौ पवित्रशास्त्रा दी आ लिखौ औन्दौ, “परमेश्‍वर ज़ुरतमंद लोगु लै खुलै ज़िवा कौरी दिया आ, तिणीऐ गरीबु लै दाण दैऔ, तेसरी भौलाई सौदा लै बौणी रौआ।”

¹⁰परमेश्‍वर आ ज़ुण बौइणै वाल़ेऊ लै बीज और खाणा लै रोटी दिआ सा, सेऊ तुमुकै बीज दिआ, और तेस कामयाब कौरा। और तुमारी भौलाई रै फौल़ बौड़ाउवा सा।

¹¹तुमुकै हर रौंगा री आशीष मिला ताकी तुमै सौदा खुलै ज़िवा कौरीऐ दाण देई बौल़ा। और ज़ेबी आमै तुमारै दाण गरीब लोगु काऐ नीईंयौ डेउलै, ता सै लोग परमेश्‍वरा रौ धन्यबाद कौरा ई।

¹²कैलैकि इऐं सेवा पुरी कौरणै कु ना सिरफ परमेश्‍वरा रै लोगु री ज़रूरत पुरी औन्दी, पर लोगु री तौरफा कु परमेश्‍वरा रौ भी भौरी धन्यबाद हुआ सा।

¹³कैलैकि इऐं सेवा रौ सबूत मानियौ सै परमेश्‍वरा री महिमा पौगड़ी कौरा ई कि तुमैं यीशु मसीह री खुशी री खौबर मानियौ तेथरै अधीन रौआ ई, ज़ुरतमंद विश्वासिऊ और सारेऊ री मज़द कौरणै दी खुलै ज़िऊ पौगड़ै कौरदै थाका ई लागी।

¹⁴और सै तुमुलै प्राथना कौरा ई, कैलैकि तुमु माथै परमेश्‍वरा री बौड़ी दया आ, और तुमु कु मिलणै री आश कौरदै थाका ई लागी।

¹⁵परमेश्‍वरा रौ, तेसरै दाणा लै ज़ो हिसाबा कु बाइरै आ, तेसरौ धन्यबाद च़ांई हुऔ।