Read Pahari, Mahasu गल 1 Bible Online

गल 1 - Pahari, Mahasu bible

गल 1

¹हाऊं पौलुस तुमुलै इऐं चिट्ठी लिखाऊ और हाऊं एक प्रेरित ऊ, हाऊं कास लोगु रै ज़ौरिऐ नाईं ऊ च़ुनौ औन्दौ। पर यीशु मसीह और बाबा परमेश्‍वरा रै ज़ौरिऐ ऊ च़ुनौ औन्दौ ज़ुणिऐ यीशु मौरै औन्दै मांझिया कु ज़िउंदौ कियौ आ।

²हाऊं इऐं चिट्ठी गलातिया परदेशा री सारी कलिसिया लै सारै भाईऊ री तौरफा कु लिखाऊ ज़ुण मुं आइलै ई।

³परमेश्‍वर और आमारै प्रभु यीशु मसीह री तौरफा कु तुमुलै बौड़ी दया और शान्ति मिलदै थाकाली लागी।

⁴यीशु मसीह ऐ आपणी ज़िन्दगी आमारै पापा री ताईं आमुलै देई ताकी आमारै परमेश्‍वर और बाबा री मौरज़ी रै मुताबिक आमु आज़ काला री इऐं बुरी दुनिया कु छ़ुड़ावा।

⁵हाऊं प्राथना कौराऊ कि लोग परमेश्‍वरा री स्तुति और बड़ाई जुगा-जुगा दी कौरा। आमीन।

⁶हाऊं हैरान ऊ कि परमेश्‍वरै तुमै मसीहा री बौड़ी दया रै ज़ौरिऐ आपणै लोग हुणा लै औटाऐ ई। तेसकु तुमुऐ एती शिगरी पिछ़ाऊं बौदल़ियौ दुजैऐ रौंगा री शिक्षा मानदै लागी गोऐ

⁷सिरफ एका सौच़्च़ी खुशी री खौबर आ पर बूश इणी आ कि कुण इणै भी ई कि ज़ुण तुमारौ ज़िऊ घौबरावा ई, और मसीह यीशु री खुशी री खौबरी बिगाड़णै च़ाहा ई।

⁸पर अगर आमै, या सौरगा कु केज़ौ दूत भी तिऐं खुशी री खौबरी छ़ाड़ियौ ज़ो आमुऐ तुमुकै शुणाई आ, और केज़ी दुजी शिक्षा तुमुकै शुणाऊ लौ ता परमेश्‍वर तेसलै श्राप दिया।

⁹ज़िणौ आमुऐ पैहलै ई बोली ऐरौ आ, तिणी ई हाऊं आबै दुजी बारै बोलाऊ कि तिऐं खुशी री खौबरी छ़ाड़ियौ ज़ो तुमुऐ मानी आ, अगर कुण दुजी शिक्षा शुणाउवा सा ता परमेश्‍वर तेसलै श्राप दिया।

¹⁰आबै का हाऊं आदमी मानाऊं या परमेश्‍वर? का हाऊं लोगु खुश कौरणौ च़ाहा ऊ? अगर हाऊं इबी झ़ांऊ लोगु खुश कौरा थौ ता हाऊं मसीह रौ सेवक नाईं हुआ थौ।

¹¹ओ मैरै प्यारै साथी विश्वासिउओ, हाऊं तुमुकै बोली छ़ाड़ाऊ कि ज़ो खुशी री खौबरी मुंइऐ शुणाई आ सै लोगु रै चाणी ऐन्दी नाईं आ।

¹²कैलैकि सै मुकै स्याणै री तौरफा कु नाईं मिली, और ना मुकै शास्त्रिउऐ शिखाई, पर यीशु मसीह ऐ मुं माथै पौगड़ी की आ।

¹³यहुदी रै मुताबिक ज़ो पैहलै मैरौ च़ाल च़लण थौ तेथरै बारै दी ता तुमुऐ शुणी ऐरौ आ कि हाऊं परमेश्‍वरा री कलिसिया भौरी परेशान कौरा थौ और नाश कौरणै री कोशिश कौरा थौ।

¹⁴हाऊं यहुदी धौर्मा दी आपणी उमरी रै यहुदिऊ कु भौरी आगै थौ और आपणै बाब-दादा री रीती रिवाज़ा लै भौरी ई खुश रौआ थौ।

¹⁵पर परमेश्‍वरा री, ज़ुणिऐ हाऊं मेरी मां रै गौरबा दी च़ुनौ, और आपणी बौड़ी दया कौरी औटाई ऐरौ ऊ,

¹⁶ज़ेबी इच़्छ़ा हुई कि मुकै आपणौ छ़ोहरु पौगड़ौ कौरा कि हाऊं दुजी ज़ातीऊ दी तेसरी खुशी री खौबरी शुणाऊं, तैबै ना ता मुंइऐ लोगु कु सलाह नींई,

¹⁷और ना यरुशलेमा लै तिऊंकु मिलदै डैऔ ज़ुण मुकु पैहलै प्रेरित थै चुनै औन्दै, पर एकदम अरब देशा लै डैऔ और तेथ बासिऐ तिदरु दमिश्का शैहर लै वापिस आशौ।

¹⁸तैबै चिया बौरशा बासिऐ पतरसा (कैफा) कु मिलदै यरुशलेमा लै डैऔ, और तेस काऐ पौन्दरा दिना झ़ांऊ रौऔ।

¹⁹पर प्रभु रै भाई याकुबा छ़ाड़ियौ कासी प्रेरिता कु नाईं मिलौ।

²⁰देखौ, परमेश्‍वर एज़ी बुशा रौ शाजत आ कि ज़ो बुशै हाऊं तुमुलै लिखाऊ सै झ़ुठी नाईं आसती।

²¹तेथ बासिऐ हाऊं यरुशलेम शैहरा छ़ाड़ियौ सीरिया और किलकिया रै इलाकेउ दी आशौ।

²²पर यहुदिया री कलिसिया रै लोगुऐ ज़ो मसीह दी थै, सै मुकु केबी नाईं मिलै थै।

²³पर तिंउऐ इणौ बार-बार थौ शुणौ औन्दौ कि ज़ो आमु पैहलै सतावा थौ, सेऊ आबै सेज़ैऐ विश्वासा री खौबर शुणावा सा ज़ास पैहलै नाश कौरणै री कोशिश कौरा थौ।

²⁴ता सै परमेश्‍वरा री बड़ाई कौरा थै कैलैकि परमेश्‍वरै हाऊं सौताउणै वाल़ै कु बौदलियौ मसीह रौ च़ेलौ चाणी गौ आ।