Read Pahari, Mahasu गल 2 Bible Online

गल 2 - Pahari, Mahasu bible

गल 2

¹चौदह बौरशा बासिऐ हाऊं पौलुस बरनबासा आइलै तौंइऐ यरुशलेम शैहरा लै डैऔ, और आपु आइलै तितुस भी नींऔ।

²हाऊं तिऐ एथीलै डैऔ कैलैकि परमेश्‍वरै मुलै तिऐ डेउणा लै बोलौ थौ। ज़ेबी हाऊं तिऐ थौ, ता हाऊं एखुलै दी मुख्येऊ कु मिलौ और तिउंकै खुशी री खौबर सौमझ़ाई ज़ो हाऊं दुजी ज़ातीऊ मांझ़िऐ परचार कौरा थौ। ताकी इणौ ना च़ांई हुऔ कि मेरी पिछ़ली मैहनत कौरणी बेकार हुआ।

³मैरौ साथी तितुस, ज़ो युनानी आ, ज़ासरौ केबी भी खतनौ नाईं हुऔ। पर यरुशलेमा री कलिसिया रै तिऊं मुख्येउऐ सेऊ अपणाऔ। तिंउऐ सेऊ खतना कौरना लै मज़बूर नाईं कियौ।

⁴तितुसा रौ खतनौ ना कौराउणौ एक सवाल बौणी गौ ज़ेबी कुछ़ झ़ुठै भाई च़ुटुकच़ार आमारै गुटा दी गुसड़ै और आमारी आज़ादी खातम कौरणै री कोशिश कौरदै थै लागै औन्दै ज़ो आमुकै आमारै छ़ुटकारै कौरणै वाल़ै यीशु दी आ ताकी सै आमु तौंइऐ यहुदी कानूना रै दास चाणा आ।

⁵एकी घौड़ीऐ भी आमुऐ तिउंरी नाईं मानी, ताकी तुमै खुश खौबरी री सौच़्च़ाई दी लगातार बौणी रौआ।

⁶ज़ेज़ै लोग मुख्य सौमझ़ावा थै (सै च़ाऊ किणै भी थै मुकै तिऊंकु कुछ़ काम नाईं। परमेश्‍वर कासी री तौरफदारी नाईं कौरदौ) तिऊंकु मुकै कुछ़ भी नौंवौ नाईं मिलौ।

⁷पर एथरै बौदलै ज़ेबी तिऊं मुख्येउऐ देखौ कि परमेश्‍वरै ज़िणौ यहुदी लोगु लै खुशी री खौबरी रै परचारा रौ काम पतरसा कै थौ सांबौ औन्दौ तिणौ ई दुज़ी ज़ाती रै लोगु लै खुशी री खौबरी शुणाउणी मुकै सांबी थी।

⁸कैलैकि ज़ेज़ै परमेश्‍वरै पतरस यहुदी लोगु लै प्रेरित हुणा लै च़ुनौ आ, तिणीऐ ई हाऊं भी दुज़ी ज़ातीऊ लै प्रेरित हुणा लै च़ुनौ ऊ।

⁹ज़ेज़ै लोगु कलिसिया दी खास मुख्यै सौमझ़ा थै मतलब कि याकूब, पतरस, और यहुन्ना, तिंउऐ बौड़ी दया रौ सेज़ौ वरदान रवाऔ आ ज़ो मुकै मिलौ आ। तिंउऐ हाऊं और बरनबास आपणै साथी सौमझ़ियौ इणौ देखाऔ कि सै आमु आइलै राज़ी ई। सै एज़ी बुशा लै राज़ी हुऐ कि आमै दुज़ी ज़ातीऊ काऐ डेऊ लै सै डेवा लै यहुदिऊ काऐ।

¹⁰तिंउऐ आमुकु सिरफ इणी औरज़ कि आमै यरुशलेमा रै गरीब विश्वासिऊ री मज़द कौरी, और इणै काम कौरणै री मेरी आपणी भी बौड़ी इच़्छ़ा थी।

¹¹पर ज़ैबै पतरस अन्ताकिया शैहरा दी आशौ, ता मुंइऐ सेऊ सारै लोगु रै सामनै धौमकाऔ कैलैकि सेऊ गलत थौ लागौ औन्दौ कौरदै।

¹²याकुबा री तौरफा कु कुछ़ लोग आशणै कु पैहलै ता पतरस दुजी ज़ातीऊ आइलै खा पिआ थौ, पर ज़ैबै सै आशै ता खतना किऐ औन्दै लोगु रै डौरा रै मारै सेऊ पिछ़ाऊं फिरी गौऔ और अलग औन्दै लागौ।

¹³तेस आइलै कुछ़ यहुदी विश्वासिउऐ भी कपट कियौ, इदरा झ़ांऊ कि बरनबासै भी तिउंरै डौरै दुज़ी ज़ाती रै विश्वासिऊ आइलै मिलणौ पोरु छ़ाड़ौ।

¹⁴पर ज़ैबै मुंइऐ देखौ कि सै खुशी री खौबरी री सौच़्च़ाई माथै सिधी च़ाल नाईं च़ालदै, ता मुंइऐ सारेऊ रै सामनै पतरसा लै बोलौ, “ज़ैबै तू यहुदी हुइयौ दुजी ज़ातीऊ बाशीऐ च़ाला ई और यहुदी बाशीऐ नाईं च़ालदौ, ता तू दुजै ज़ातीऊ लै यहुदी बाशीऐ च़ालणा लै कैलै बोलाई?”

¹⁵आमै ता ज़नमा कु यहुदी ई, और दुजी ज़ातीऊ ज़िणै पापी नाईं।

¹⁶तैबै भी इणौ ज़ाणियौ कि आदमी मुसा रै नियमा मानणै कु नाईं, पर सिरफ यीशु मसीह माथै विश्वास कौरणै कु धौर्मी बौणा आ, एथीलै आमुऐ आपु भी मसीह यीशु माथै विश्वास कियौ आ। आमै मुसा रै नियमा मानणै कु नाईं, पर यीशु मसीह माथै विश्वास कौरीयौ धौर्मी बौणै ई। कैलैकि कोई भी परमेश्‍वरा री नौज़री दी मुसा रै नियमा मानणै कु धौर्मी नाईं बौणदौ।

¹⁷आमै ज़ो मसीह दी धौर्मी बौणनै च़ांई, अगर आपु ई पापी निकल़ालै ता का मसीह पापा रौ सेवक आ? नाईं बिल्कुल भी नाईं।

¹⁸कैलैकि ज़ो कुछ़ मुंइऐ फोकी ऐरौ आ अगर तेसीई खौड़ी च़ुंगु लौ, ता हाऊं आपुलै आरोपी बौणा ऊ।

¹⁹हाऊं सौमझ़ी गोअऊ कि मुसा रै नियमा मानणै कु हाऊं धौर्मी नाईं बौणी बौल़दौ। ता हाऊं मुसा रै नियमा लै मौरी गोअऊ ताकी परमेश्‍वरा लै ज़िऊ।

²⁰इयौ इणौ आ ज़िणौ कि ज़ेबी यीशु मसीह क्रुसा माथै मौरौ, ता हाऊं भी तेस आइलै मौरी गौ, आबै हाऊं तिणौ नाईं ज़िउंदौ ज़िणौ पैहलै ज़िवा थौ पर मसीह मुंदी ज़िवा आ। और आबै हाऊं परमेश्‍वरा रै छ़ोहरु माथै विश्वास कौरीयौ ऊ ज़िउंदै लागौ औन्दौ, ज़ुणिऐ मुं आइलै एती प्यार कियौ और मेरी खातिर आपणी ज़ान देई गोई।

²¹हाऊं परमेश्‍वरा री बौड़ी दया बेकार नाईं औणै दैंदौ। कैलैकि अगर लोग मुसा रै नियम मानणै रै ज़ौरिऐ धौर्मी बौणा थै, ता मसीह कै मौरणै री कोई ज़ुरत नाईं थी।