Read Pahari, Mahasu गल 4 Bible Online

गल 4 - Pahari, Mahasu bible

गल 4

¹मैरै बोलणै रौ मतलब आ कि ज़ेबी झ़ांऊ वारीस लोल़डौ आ, तेबी झ़ाऊं तेसदी और नुकरा दी कोई फर्क नाईं, हालांकी सेऊ सारी च़िज़ा रौ मालिक आ।

²पर बाबा रै तय किऐ औन्दै बौगता झ़ांऊ सेऊ छ़ोहरु देखभाल़ कौरणै वाल़ेऊ और भण्डारीऊ रै वशा दी रौआ सा।

³तिणी ई आमै भी सौच़्च़ाई आच़्छ़ा कौरी सौमझ़णै कु पैहलै धौतरी रै बेकार नियमा रै नुकर थै।

⁴पर ज़ैबै ठीक बौगत आशौ ता परमेश्‍वरै आपणौ छ़ोहरु भेज़ौ ज़ुण छ़ेउड़ी कु पैदौ हुऔ, और तिणीऐ आपणी ज़िन्दगी मुसा रै नियमा मानियौ ज़ीई

⁵ताकी ज़ुण मुसा रै नियमा रै वशा दी ज़िउंदै लागै औन्दै तिऊं आज़ाद कौरा, और आमै परमेश्‍वरा रै सन्तान बौणी बौल़ा,

⁶एथीलै कि तुमै सन्तान ई, परमेश्‍वरै आपणै छ़ोहरु री आत्मा आमारै ज़िवा दी भेज़ी आ, ज़ो “ओ अब्बा,” “ओ बाब बोलीयौ औटावा सा।”

⁷एथीलै आबै तू नुकुर नाईं, पर छ़ोहरु ई। और ज़ैबै छ़ोहरु बौणौ, ता परमेश्‍वरा रै ज़ौरिऐ वारीस भी बौणौ।

⁸पैहलै ता तुमै परमेश्‍वर नाईं ज़ाणा थै तेबी तुमै तिंउरै नुकुर थै ज़ो सौच़्च़ी रै परमेश्‍वर नाईं थै,

⁹पर आबै तुमुऐ परमेश्‍वर प्राणी ऐरौ आ, या इणौ बोलौ कि परमेश्‍वरै तुमै प्राणी गौऐ, ता तिऊं कमज़ोर और निकामी शिक्षा री बुशु री तौरफा दी कैलै बौदल़िया ई, ज़ेथरै तुमै दुजी बारै नुकुर हुणै च़ाहा ई?

¹⁰तुमै खास दीन मिहनै ठीक बौगत और बौरश मुसा रै नियमा रै मुताबिक माना ई।

¹¹मुकै तुमारै बारै दी भौरी झ़ौरी आ कि इणौ ना च़ांई हुऔ कि ज़ो मैहनत मुंइऐ तुमुलै की आ सै बेकार हुआ।

¹²ओ मैरै प्यारै साथी विश्वासिउओ, हाऊं तुमुलै औरज़ कौराऊ, कि तुमै मुं ज़िणै हुऔ। कैलैकि हाऊं भी तुमु ज़िणौ हुई गो ऊ। तुमुऐ मैरौ आच़्छ़ा कौरी ख्याल छ़ाड़ौ आ।

¹³पर तुमुकै याद हौणौ कि मुंइऐ शरीरा री कमज़ोरी री वज़ाह कु तुमुकै खुशी री खौबर शुणाऔ।

¹⁴और तुमुऐ मेरी बिमारी री हालता दी, ज़ेथ कौरी तुमुलै भौरी कौष्ट हुऔ बेकार नाईं ज़ाणी और ना नफरत की। पर तुमुऐ हाऊं तिणौ अपणाऔ ज़िणौ तुमै सौरगदूतु और यीशु मसीह अपणावा ई।

¹⁵तुमै तेबी भौरी खुश थै! आबै तुमारी सै खुशी किऐ डेई आ? मुकै पाक्कौ पौतौ आ की तुमुऐ मेरी खातिर आपणी सारी च़िज़ै देई थी इदरा झ़ाऊं की आपणी आखी भी।

¹⁶तैबै का तुमु कु सौच़्च़ौ बोलणै री वज़ाह कु हाऊं तुमारौ दुश्मन बौणी गौ?

¹⁷सै झ़ुठै गुरु तुमु आपणी तौरफा दी कौरना लै भौरी उताउल़ै ई, पर तिऊंरौ मकसद तुमारी भौलाई लै नाईं आसतौ। तिऊंरौ मतलब ता तुमु मुकु अलग कौरणौ आ कि तुमै तिउंरै च़ेलै बौणा।

¹⁸सौदा आच़्छ़ै मकसदा लै उताउल़ौ हुणौ आच़्छ़ौ हुआ आ। ना सिरफ सेज़ै बौगतै ज़ेबी हाऊं तुमु आइलै औआ ऊ।

¹⁹ओ मैरै लोल़डेउओ ज़ेबी झ़ांऊ तुमु दी मसीह रौ रूप ना बौणा लौ, तेबी झ़ांऊ हाऊं तुमुलै इणौ दु:ख सहन कौराऊ ज़िणौ औल़खिंदी बारै छ़ेउड़ी लै हुआ सा।

²⁰हाऊं च़ाहा ऊ कि एज़ै बौगतै हाऊं तुमु काऐ हुआ थौ और कौउंल़िऐ तुमु आइलै बुशै ला थौ कैलैकि मेरी सौमझ़ी दी ना आशदौ की हाऊं तुमु आइलै का बोलु।

²¹तुमै ज़ो मुसा रै नियमा रै वशा दी हुणौ च़ाहा ई, मुकै बोलौ, का तुमै नाईं सौमझ़दै कि नियमा री बुशै का बोलाई?

²²पवित्रशास्त्रा दी इणौ आ लिखौ औन्दौ कि, अब्राहमा रै दुई छ़ोहरु थै! एक हाज़िरा नावां री छ़ेउड़ी कु ज़ुण नुकराणी थी और दुजौ सारा कु ज़ुण आज़ाद छ़ेउड़ी थी।

²³पर ज़ेज़ौ छ़ोहरु नुकराणी कु हुऔ सेऊ शरीरा री रीती कु ज़ौन्मौ। और ज़ो आज़ाद छ़ेउड़ी कु ज़ौन्मौ सेऊ वायदा रै मुताबिक ज़ौन्मौ।

²⁴इयौ एक औनैणौ आ इऐ दुई छ़ेउड़ी दुई वायदै ई सीन्नै पहाड़ी रौ वायदौ हाज़िरा आ, ज़ासकु नुकरा री सन्तान पैदी हुआ आ।

²⁵हाज़िरा अरबा रौ सीन्नै पहाड़ी आ, ज़ो आज़कालकौ यरुशलेमा रौ रूप आ, कैलैकि सेऊ सन्तानु समेत गुलामी दी आ।

²⁶पर सौरगा रौ यरुशलेम अब्राहमा री छ़ेउड़ी सारा रौ रूप आ, और तिंयारै लोल़डै नुकर नाईं ई। सै आमारी मां ज़िणी आ।

²⁷ज़िणौ यशायाह भविष्यवक्तै पवित्रशास्त्रा दी थौ लिखौ औन्दौ, “ओ बिण लोल़डेऊ री, तू ज़ो नाईं ज़ाणदी खुश औऊ। तू ज़ासलै बेदण नाईं उठाउंदी, हाकै मारीयौ ज़य-ज़यकार कर। कैलैकि ठुकराई औन्दी री सन्तान सुहागिणी री सन्ताना कु भी ज़ादी आ”

²⁸ओ मैरै प्यारै साथी विश्वासिउओ आमै इसहाका बाशीऐ वायदै री सन्तान आ।

²⁹और ज़िणौ सेज़ै बौगतै शरीरा कु जौन्मौ औन्दौ छ़ोहरु आत्मा कु जौन्मै औन्दौ छ़ोहरु सतावा थौ, तिणी ई आबै भी हुआ सा।

³⁰एथरै बारै दी पवित्रशास्त्र का बोला सा? “नुकराण और तिंआरौ छ़ोहरु पोरु गाड़ौ, कैलैकि नुकराणी रौ छ़ोहरु आज़ाद छ़ेउड़ी रै छ़ोहरु आइलै वारीस नाईं औन्दौ।”

³¹मैरै बोलणै रौ मतलब इणौ आ कि आमै नुकराणी छ़ेउड़ी री सन्तान नाईं ज़ो मुसा रौ नियम आ पर आज़ाद छ़ेउड़ी री सन्तान ई ज़ो विश्वास आ।