Read Pahari, Mahasu गल 5 Bible Online

गल 5 - Pahari, Mahasu bible

गल 5

¹मसीह ऐ आमै आज़ाद किएई ताकी आमै मुसा रै नियम मानणै कु आज़ाद रौई सौकी। एथीलै आज़ादी दी अटल रौऔ और कासी कै हक्क नाईं दैऔ कि सेऊ तुमु मुसा रै नियम मानणा लै तुमु गुलाम चाणा।

²ध्याना कौरी शुणौ, ज़ो हाऊं तुमुलै बोलणै वाल़ौ ऊ, कि अगर परमेश्‍वरा आइलै धौर्मी बौणना लै खतनौ कौरावा लै, ता ज़ो मसीह ऐ तुमुलै कियौ आ तेथकु तुमुलै कुछ़ भी लाभ नाईं हुंदौ।

³हाऊं तुमुलै तौंइऐ काट्ठै कौरीऐ बोलाऊ कि हर एक आदमी ज़ुण आपणौ खतना कौराउआ तिणीऐ यहुदिऊ रै सारै नियम मानणै जा ई।

⁴तुमै ज़ुण मुसा रै नियम मानणै रै ज़ौरिऐ धौर्मी बौणनौ च़ाहा ई, मसीह कु अलग और बौड़ी दया कु लोटी गौऐ ई।

⁵कैलैकि पवित्र आत्मा री वज़ाह कु आमै विश्वासा कु, आश की ऐन्दी धार्मिकता री बाट लोड़ी ई।

⁶मसीह यीशु दी ना खतना, और ना बिण खतनै वाल़ै कुछ़ कामा रै ई, पर सिरफ विश्वास, ज़ो प्यारा रै ज़ौरिऐ असर पा ई।

⁷तुमै ता मसीह रै रिश्तै दी आच़्छ़ा कौरी थै बौड़दै लागै औन्दै, आबै कुणिऐ रोकै ई कि तुमै सौच़्च़ाई नाईं मानौ।

⁸इणी शिक्षा परमेश्‍वरा री तौरफा कु नाईं आसती ज़ुण तुमु आपणै लोल़डै हुणा लै चुना आ।

⁹इऐ एक कहावत आ! थोड़ौ ज़ेई सौंज़ेड़ौ सारौ मुछ़ौ औन्दौ पिठौ ओसारा सा।

¹⁰हाऊं प्रभु माथै तुमारै बारै दी भरोसौ छ़ाड़ाऊ कि तुमारौ केज़ौ भी दुजौ बिच़ार नाईं औलौ। पर ज़ो तुमु घबरावा सा, सेऊ च़ाऊ केज़ौ भी औलौ परमेश्‍वरा कु सौज़ा पा सा।

¹¹ओ मैरै प्यारै साथी विश्वासिउओ, अगर हाऊं इबी झ़ांऊ खतना रौ परचार कौराऊ, ता इबी झ़ाऊं कैलै सतावा ई? तैबै ता क्रुसा रौ विरोध भी खातम हुणौ थौ।

¹²भौलौ ता इणौ हुआ थौ कि ज़ुण तुमु घबरावा ई, सै आपणौ आंग ई पोरु काटा थै।

¹³ओ मैरै प्यारै साथी विश्वासिउओ परमेश्‍वरै तुमै आज़ाद हुणा लै ई औटाऐ औन्दै। एथीलै आबै तुमै मुसा रै नियम बिल्कुल नाईं मानौ और ना इऐं आज़ादी आपणै शरीरा री इच़्छ़ा पुरी कौरणै ज़ौरियौ चाणौ, बल्कि एकी दुजै आइलै प्यार और सेवा कौरौ।

¹⁴कैलैकि सारै नियम इऐं एक ई बुशा दी पुरी हुआ सा, “तू आपणै पड़ोसी आइलै आपु ज़िणौ प्यार छ़ाड़।”

¹⁵पर अगर तुमै एकी दुजेऊ जानवरा ज़िणै दांदा कौरी चाकाई और च़िराई ता च़ोकसिऐ रौ! कि एकी दुजै रौ सत्यनाश ना कौरौ।

¹⁶पर हाऊं बोलाऊ पवित्र आत्मा रै मुताबिक च़ालौ ता तुमै शरीरा री इच़्छ़ा केज़ै भी तरिकै कौरी पुरी ना कौरालै।

¹⁷कैलैकि शरीर आत्मा रै विरोधा दी और आत्मा शरीरा रै विरोधा दी इच़्छ़ा कौरा सा, और इऐ एकी दुजै रै विरोधी ई, एथीलै कि ज़ो तुमै कौरणौ च़ाहा ई तेस नाईं कौरी सौका।

¹⁸और अगर तुमै पवित्र आत्मा रै मुताबिक च़ालालै ता नियमा री गुलामी दी नाईं रौ।

¹⁹शरीरा रै काम ता पौगड़ै ई यानी कि गान्दै काम, बुरै काम, लुचपन,

²⁰मुर्तिपूज़ा, टूणौ, दुश्मनी, झ़ौगड़ौ, ईर्ष्या, रोश, विरोध, फूट, विधर्म,

²¹डाह, च़ाखणौ-माच़णौ, लीलाक्रीड़ा और इऊं ज़िणै ओर भी काम ई एथरै बारै दी हाऊं तुमुकै पैहलै छ़ाड़ाऊ बोली, ज़िणौ पैहलै भी बोलौ औन्दौ, कि इणै-इणै काम कौरणै वाल़ै परमेश्‍वरा रै राज़्य रै वारीस नाईं औन्दै।

²²पर आत्मा रौ फल़ “प्यार, आनन्द, शान्ति, धीरज,

²³कृपा, भौलाई, विश्वास, नम्रता, और संयम ई।” इणै-इणै कामा रै विरोधा ई केज़ौ भी नियम नाईं आसतौ।

²⁴और ज़ुण यीशु मसीह रै ई, तिंउऐ शरीर लालसा और इच़्छ़ा समेत क्रुसा माथै च़ौड़ाई गौऐ।

²⁵अगर आमै आत्मा कौरी ज़िउंदै ई, ता आत्मा कौरीऐ च़ालणै भी च़ांई।

²⁶आमै घमण्डी हुइयौ एकी-दुजै नाईं च़ांई छ़ेड़नै, और ना एकी-दुजै कु ज़ौल़नौ च़ांई।