Read Pahari, Mahasu गल 6 Bible Online

गल 6 - Pahari, Mahasu bible

गल 6

¹ओ मैरै प्यारै साथी विश्वासिउओ, अगर कुण आदमी केज़ै गुनाह दी पाकड़िया लौ भी ता तुमै ज़ो आत्मिक ई निउलै कौरीऐ तिऊं सुधारौ, और आपणी देखभाल़ भी छ़ाड़ौ ताकी तुमै इम्तहान दी ना पौड़ा।

²एकी दुजेऊ री मुसीबता दी मज़द कौरौ, और इणै कौरीऐ तुमै मसीह रै नियम माना ई।

³कैलैकि अगर तुमै कासी री मज़द कौरना लै आपुलै खास सौमझ़ा ई ता तुमै सिरफ आपुलै धोखौ दिआई। तुमै तेती खास नाईं आसतै।

⁴पर हर एक आदमी आपणै-आपणै काम जांच़ौ-पौरखौ, और तैबै दुजै बारै दी नाईं पर आपणै ई बारै दी तेसलै घमण्ड कौरणै रौ मौकौ हुआ सा।

⁵कैलैकि हर एक आदमी आपणै बरताव लै ज़िम्मेबार आ।

⁶ज़ो वचना री शिक्षा पा सा, सेऊ सारी आच़्छ़ी च़िज़ेऊ दी आपणौ शिखाउणै वाल़ौ शामिल कौरा।

⁷आपुलै धोखौ ना दैऔ, और कोई भी आदमी इणौ सुंच़ौ कि तुमै परमेश्‍वरा लै धोखौ देई बौल़ा ई, कैलैकि आदमी ज़ो कुछ़ बौआ सा तेसीई लौआ सा।

⁸कैलैकि ज़ो आदमी आपणै शरीरा लै बौआ सा, सेऊ शरीरा रै ज़ौरिऐ विनाशा री फौसल लौआ सा। पर ज़ो आत्मा लै बौआ सा, और सेऊ आत्मा रै ज़ौरिऐ सौदा री ज़िन्दगी री फौसल लौआ सा।

⁹आमु भौलै कामा कौरना लै हिम्मत ना च़ांई हारनी, कैलैकि अगर आमै ढीलै ना हुइलै ता परमेश्‍वरा रै ठीक बौगता दी फौसल लौई सा।

¹⁰एथीलै ज़िऐ भी मौकौ मिला लौ आमु सारेऊ आइलै भौलाई च़ांई कौरणी, खास कौरीऐ विश्वासी भाई-बौइणिऊ आइलै

¹¹देखौ मुंइऐ किणौ बौड़ै-बौड़ै आखरु दी तुमुलै आपणै हाथा कौरी लिखौ आ।

¹²ज़ो लोग आपणी बौड़ाई कौराउणा लै च़ाहा ई सेई ई तुमारौ खतनौ कौराउणा लै दबाव पा ई सिरफ एथलै कि सै यीशु मसीह रै क्रुसा री वज़ाह कु नाईं सौताइया।

¹³कैलैकि खतना कौरणै वाल़ै आपु ता नियमा माथै नाईं च़ालदै, पर तुमारौ खतनौ कौराउणौ च़ाहा ई ताकी तुमारै शरीरा रै हालता माथै घमण्ड कौरा।

¹⁴पर इणौ ना च़ांई हुऔ कि हाऊं ओरी केज़ी बुशु रौ घमण्ड कौरु, सिरफ आमारै यीशु मसीह रै क्रुसा रौ, ज़ेथरै ज़ौरिऐ दुनिया री च़िज़ेऊ रौ मुं माथै कोई भी हक्क नाईं और मुकै दुनिया री च़िज़ेऊ बुशै लाइणै री कोई भी इच़्छ़ा नाईं आसती।

¹⁵कैलैकि ना खतना और ना बिण खतना वाल़ौ कुछ़ खास आसतौ, पर परमेश्‍वरै तुमै पवित्र आत्मा रै कामा रै ज़ौरिऐ नौईं सृष्टी चाणी गौऐ।

¹⁶परमेश्‍वर तिऊं लोगु लै आपणी शान्ति और आशीष दिया ज़ुण एस हुकम माना लै। सै परमेश्‍वरा रै लोग ई।

¹⁷एथ बासी कोई मुलै दु:ख ना दिआ लौ, कैलैकि ज़ो दाग मैरै शरीरा दी आ सेऊ इणौ देखावा कि हाऊं यीशु रौ सेवक ऊ।

¹⁸ओ मैरै प्यारै साथी विश्वासिउओ, आमारै प्रभु यीशु मसीहा री बौड़ी दया तुमु सौभी आइलै औआ। आमीन।