Read Pahari, Mahasu इफि 1 Bible Online

इफि 1 - Pahari, Mahasu bible

इफि 1

¹हाऊं पौलुस ज़ुण परमेश्‍वरा री मौरज़ी कौरी यीशु मसीह रौ प्रेरित ऊ। तुमुलै इऐं चिट्ठी लिखाऊ ज़ुण इफिसुसा री कलिसिया दी परमेश्‍वरा रै लोग और यीशु मसीह दी विश्वासी ई।

²आमारै बाब परमेश्‍वर और प्रभु यीशु मसीहा री तौरफा कु तुमुलै बौड़ी दया और शान्ति थाकाली मिलदै लागी।

³आमारै प्रभु यीशु मसीहा रै बाब और परमेश्‍वरा रौ धन्यबाद च़ांई हुऔ। कि ज़िणौ आमै मसीह आइलै एक ई, ता परमेश्‍वरै आमुलै सारी आत्मिक आशीषै देइयौ ज़ो सौरगा दी ई आशीषित किऐ ई।

⁴ज़िणौ परमेश्‍वरै आमै धौतरी चाणनै कु पैहलै मसीह दी छ़ाँटी ऐरै, कि आमै तेसरै नौज़री दी पवित्र और बेदाग औलै।

⁵कैलैकि परमेश्‍वरै आमु आइलै प्यार कियौ और आपणी इच़्छ़ा रै भौलै मकसदा रै मुताबिक, आमै आपुलै यीशु मसीह रै ज़ौरिऐ पैहला कु आपणी सन्तान हुणा लै छ़ांटी गौऐ।

⁶कि परमेश्‍वरा री तिऐं नोखी बौड़ी दया री बौड़ाई च़ांई हुई, ज़ो तिणीऐ आमुलै तेसरै प्यारै छ़ोहरु रै ज़ौरिऐ मुफ्त देई।

⁷आमुलै मसीह दी तेसरै लोऊ रै ज़ौरिऐ छ़ुटकारौ, मतलब कि बुरै कामा री माफी, तेसरी तिऐं भौरी बौड़ी दया रै मुताबिक मिलौ आ

⁸परमेश्‍वरै सारै ज्ञान और सौमझ़ा आइलै आमु माथै ज़रुरता कु ज़ादौ कियौ आ।

⁹कि परमेश्‍वरै आपणी इच़्छ़ा रौ भेद भौलै इरादै रै मुताबिक आमु माथै पौगड़ौ कियौ आ ज़ो तिणीऐ मसीह दी ठाणी ऐरौ थौ।

¹⁰और परमेश्‍वरै इणौ विच़ार कियौ कि बौगत पुरै हुणै माथै दी ज़ो सौरगा दी और ज़ो कुछ़ धौतरी माथै आ, तेस सारौ कुछ़ कौठै कौरीयौ मसीह कै राज़ कौरना लै देऊ।

¹¹तेथी दी ज़ेथदी आमै भी परमेश्‍वरा री मौरज़ी कौरी पैहला कु च़ुनै औन्दै री वज़ाह कु वारीस बौणै, ज़ुण आपणी मौरज़ी रै चुनाव रै मुताबिक सब कुछ़ कौरा आ।

¹²कि आमु ज़ुणिऐ मसीह माथै पैहला ओउलै आश छ़ाड़ी आ, तेसरी महिमा री बौड़ाई हुआ।

¹³मसीही दी परमेश्‍वरै तुमु माथै वायदै किऐ औन्दै पवित्र आत्मा री छ़ाप लाई आ। ज़ेबी तुमुऐ सौच़्च़ाई रौ वचन शुणौ आ, ज़ो तुमारै छ़ुटकारै री खुश-खौबरी आ, और ज़ेथ माथै तुमुऐ विश्वास भी कियौ आ।

¹⁴कैलैकि परमेश्‍वरै आमुकै पवित्र आत्मा देई आ, ताकी आमै पाक्कौ कौरुलै कि परमेश्‍वर आमुलै औज़ौ भी आच़्छ़ी च़िज़ै दिया आ ज़ो तिणीऐ वायदौ आ कियौ औन्दौ। एऊ तेबी हुणौ आ ज़ेबी परमेश्‍वर पुरै तरिकै कौरी आमु आज़ाद कौरा ज़ो तेसरै लोग ई। कि तेसरी महिमा री बौड़ाई हुआ।

¹⁵एज़ै कारणै, ज़ेबी कु मुंइऐ प्रभु यीशु माथै तुमारै विश्वास और सारै परमेश्‍वरा रै लोगु लै तुमारै प्यारा रै बारै दी शुणौ,

¹⁶ता हाऊं सौदा तुमुलै परमेश्‍वरा रौ धन्यबाद, और आपणी प्राथना दी तुमु याद थाकाऊ कौरदै लागी।

¹⁷हाऊं प्राथना कौराऊ कि परमेश्‍वर ज़ुण आमारै प्रभु यीशु मसीह रौ बाब आ और बौड़ाई जोगी आ, सेऊ तुमुकै आत्मा दिया ज़ो तुमु औकली वाल़ै चाणा आ और परमेश्‍वर तुमु माथै पौगड़ौ कौरा ताकी तुमै तेस ज़ाणा।

¹⁸और हाऊं इणी भी प्राथना कौराऊ कि परमेश्‍वर तुमु सौच़्च़ाई सौमझ़णा लै मज़द कौरा ताकी तुमै ज़ाणा कि तिणीऐ आपणै औटाऐ औन्देऊ लै पाक्की आश देई आ, और तुमुकै पौतौ लागणौ आ कि सै केती महान और महिमावाल़ी आशीषै ई ज़ेथरौ परमेश्‍वरै आपणै लोगु कु वायदौ आ कियौ औन्दौ।

¹⁹और आमु विश्वासिऊ लै तेसरी तागत नोखै रुपा दी केती महान आ। इऐ सेज़ी महान शक्ति आ

²⁰ज़ुणिऐ मसीह मौरै औन्दै मांझ़िया कु ज़िउंदौ कियौ और इज़्ज़त वाल़ी ज़ागाह दी ज़ो सौरगा दी परमेश्‍वरा री सुल़टी भिलै आ बोशाल़ौ आ।

²¹सेज़ी ज़ागाह दी सारै रौंगा रै राज़ और हक्क, और तागत, और प्रभुता रै, और हर नावां माथै, ज़ो ना सिरफ एज़ै जुगा दी, पर आशणै वाल़ै जुगा दी भी निआं आ।

²²परमेश्‍वरै सब कुछ़ मसीह रै वशा दी कौरी ऐरौ आ और सेऊ कलिसिया रै फाइदै लै सारी च़िज़ु माथै मुख्यौ चाणी ऐरौ आ।

²³कलिसिया मसीह रौ शरीर आ, और मसीह आपणी पुरी शक्ति आमु मांझ़िऐ ला सा ज़िणौ सेऊ पुरै ब्रमांडा दी कौरा सा।