Read Pahari, Mahasu इफि 2 Bible Online

इफि 2 - Pahari, Mahasu bible

इफि 2

¹तिणीऐ तुमै भी ज़िउंदै कियै, ज़ुण आपणै बुरै काम और पापा कौरी मौरै औन्दै थै

²ज़ासदी तुमै पैहलै इऐं धौतरी री रीती माथै, और आसमाना रै हक्‍का रै आफसर मतलब सेज़ी बुरी आत्मा रै मुताबिक च़ाला थै, ज़ुण आबै भी हुकम नाईं मानणै वाल़ेऊ मांझ़िऐ काम कौरा ई।

³एक बौगत इणौ थौ ज़ेबी आमै भी तिऊं मांझ़िऐ थै और बुरै कामा दी मगन रौआ थै, शरीर और मौना री इच़्छ़ा पुरी कौरणै दी लागै औन्दै दुजेऊ बाशीऐ रोशा री सन्तान थै।

⁴पर परमेश्‍वर भौरी दया वाल़ौ आ! आमै सौभी आपणै पापा री वज़ाह कु मौरी गौऐ थै, पर परमेश्‍वरै आमु आइलै भौरी प्यार कियौ कि तिणीऐ आमै मसीह आइलै ज़िउंदै किऐ, और परमेश्‍वरै आमै तिऐं बौड़ी दया कौरी बौच़ाऐ ज़ेथरै आमै लायक नाईं थै।

⁶परमेश्‍वरै आमै यीशु मसीह दी ज़िउंदै किऐ और सौरगा री ज़ागाह दी तेस आइलै बोशाल़ै;

⁷परमेश्‍वरै इणौ एथीलै कियौ कि सेऊ आशणै वाल़ै बौगता दी, दुनिया रै लोगु कै देखा ई सौका कि तेसरी बौड़ी दया केती महान आ। आमै यीशु दी एक ई ज़ो कुछ़ तिणीऐ आमुलै कियौ आ तेथदी तिणीऐ बौड़ी दया देखाल़ी आ।

⁸कैलैकि ज़ेबी तुमुऐ विश्वास कियौ ता परमेश्‍वरै तुमै आपणी बौड़ी दया कौरी बौच़ाऐ ई। तुमारी तौरफी कु नाईं, बल्कि परमेश्‍वरा रौ दैऔ औन्दौ दाण आ।

⁹इणौ तुमारै आच़्छ़ै काम कौरणै री वज़ाह कु नाईं हुऔ एथीलै तुमै घमण्ड नाईं कौरौ।

¹⁰कैलैकि आमै तेसरै चाणै औन्दै ई, और मसीह यीशु दी तिऊं भौलै कामा लै, ज़ेज़ै परमेश्‍वरै पैहलै कु आमुलै कौरना लै ई चाणै औन्दै।

¹¹एज़ी वज़ाह कु इणौ याद छ़ाड़ौ कि तुमै ज़नमा कु दुजी ज़ाती रै ई, और यहुदी तुमारौ मज़ाक कौरा ई कैलैकि तुमारौ खतनौ नाईं हुऔ और सै ई खतनै वाल़ै। पर तिऊंरौ सेऊ रिवाज़ सिरफ तिउंरै शरीरा दी लागु हुआ आ।

¹²तुमै सेज़ै बौगता दी यीशु मसीह नाईं ज़ाणा थै और तुमै परमेश्‍वरा रै चुनै औन्दै लोगु इस्राइली लोग नाईं थै, और परमेश्‍वरै यहुदी लोगु लै ज़ो आशीषै दैणै रौ वायदौ थौ कियौ औन्दौ तुमै तेथरै भागी नाईं थै। तुमै इऐं दुनिया दी बिण आशा रै और बिणा परमेश्‍वरा रै थै ज़िउंदै लागै औन्दै।

¹³पर आबै यीशु मसीह दी तुमै ज़ुण पैहलै दूर थै, मसीह रै लोऊ कौरी नज़दीक हुई गौऐ ई।

¹⁴कैलैकि सेऊ आमारौ मिलाउणै वाल़ौ आ, ज़ुणिऐ दुइया एक किऐ ई और अलग कौरणै वाल़ी द्वाल ज़ेज़ी यहुदी और दुजी ज़ाती रै बौच़ाई थी ढाल़ी गोई आ,

¹⁵और आपणै शरीरा रै दुश्मन मतलब सेज़ै नियम ज़ासरौ हुकम नियमा री रीती माथै थौ, मिटाई गौऐ कि दुइया कु आपु दी एक नौंवौ चाणीऔ मिलावा,

¹⁶और क्रुसा माथै दुश्मनी नाश कौरीयौ एथ कौरीऐ दुइया दी एक शरीर चाणीऔ परमेश्‍वरा कु मिलावा।

¹⁷मसीहीऐ आशीयौ तुमु दुजी ज़ातीऊ रै लोगु कै ज़ुण परमेश्‍वरा कु दूर थै, और यहुदी लोग ज़ुण नज़दीक थै, दुइया लै मेल-मिलाप और शान्ति री खौबर शुणाई आ।

¹⁸कैलैकि मसीह री वज़ाह कु आमै सारै सेज़ी पवित्र आत्मा रै ज़ौरिऐ बाबा काऐ आशी बौल़ा ई।

¹⁹एथीलै तुमै दुज़ी ज़ाती वाल़ै आबै परदेशी और बौटैणु नाईं रौऐ, पर पवित्र लोगु रै साथी वासी और परमेश्‍वरा रै टौबर हुई गौऐ।

²⁰तुमै प्रेरितु और भविष्यवक्ताऔं री पौई माथै चाणी ऐन्दी द्वाल ई, ज़ेथरै कुणै रौ पात्थर यीशु मसीह आपु आ।

²¹मसीह दी सारै चाणै औन्दै कौठै मिलियौ प्रभु दी एक पवित्र परमेश्‍वरा रौ घौर बौणा आ,

²²ज़ेथदी तुमै भी पवित्र आत्मा कौरी परमेश्‍वरा री रौइणै री ज़ागाह हुणा लै कौठै चाणियाई।