Read Pahari, Mahasu इफि 3 Bible Online

इफि 3 - Pahari, Mahasu bible

इफि 3

¹एथीलै हाऊं पौलुस तुमुलै प्राथना कौराऊ। हाऊं एज़ी वज़ाह कु ज़ेला दी ऊ कैलैकि हाऊं तुमु दुज़ी ज़ाती रै लोगु कै मसीह री खुशी-खौबरी शुणावा ऊ।

²तुमुऐ इणौ पाक्कौ शुणौ औलौ कि एऊ काम परमेश्‍वरै मुकै आपणी तिऐं बौड़ी दया रै ज़ौरिऐ तुमारी मज़द कौरना लै दैऔ आ।

³ज़िणौ मुंइऐ पैहलै तुमुलै थोड़ौ लिखौ थौ, कि परमेश्‍वरै आपु मुं माथै आपणै भेद वाल़ी बुशै पौगड़ी की ई।

⁴और ज़िणौ तुमै तिऐं चिट्ठी पौड़ालै ता इणौ भी ज़ाणी सौका ई कि हाऊं केती आच़्छ़ै कौरीऐ मसीह रै भेदा रै बारै दी सौमझ़ा ऊ।

⁵पिछ़लै बौगता दी परमेश्‍वरै एऊ भेद लोगु माथै पौगड़ौ नाईं कियौ थौ, पर आबै पवित्र आत्मै सेऊ भेद आपणै पवित्र प्रेरितु और भविष्यवक्तु माथै पौगड़ौ कौरी गौ आ।

⁶एऊ परमेश्‍वरा रौ भेद आ कि यीशु मसीह दी खुशी री खौबरा रै ज़ौरिऐ दुजी ज़ाती रै लोग विरासता दी भागी, एक ई शरीरा रै और वायदै रै भागी ई।

⁷हाऊं परमेश्‍वरा री बौड़ी दया रै तेस दाणा रै मुताबिक, ज़ो तेसरी शक्ति रै असरा रै मुताबिक मुकै दैऔ औन्दौ, तेस खुशी री खौबरा रौ सेवक बौणौ।

⁸हाऊं ज़ुण परमेश्‍वरा रै सारै लोगु मांझ़िऐ सारेऊ कु छ़ोटौ ऊ, मुं माथै इऐ बौड़ी दया हुई कि हाऊं दुजी ज़ातीऊ लै खुशी री खौबर शुणाई सौकु, कि मसीह केबी ना खातम हुणै वाल़ी आशीषा रौ ज़ौरियौ आ,

⁹और हाऊं सारै लोगु कै एस भेद सौमझ़ाऊ कि परमेश्‍वर ज़ुण सारी च़िज़ु चाणनै वाल़ौ आ तिणीऐ शुरुवाता कु एऊ भेद च़ोरौ औन्दौ थौ।

¹⁰आबै कलिसिया रै ज़ौरिऐ परमेश्‍वरा रौ अलग-अलग रौंगा रौ ज्ञान आसमाना रै परधान और आफसरु माथै पौगड़ौ कौरीया लौ।

¹¹परमेश्‍वरै एऊ आपणी सौदा री योजना रै मुताबिक कियौ आ, ज़ो तिणीऐ आमारै प्रभु यीशु मसीह रै ज़ौरिऐ पुरौ कियौ आ।

¹²ज़ासदी आमुलै तेस माथै विश्वास कौरणै कु हिम्मत और भरोसै आइलै परमेश्‍वरा रै नज़दीक आशणै रौ हक्क आ।

¹³हाऊं औरज़ कौराऊ कि ज़ेज़ै दु:ख तुमुलै मुकै हुआई, सेज़ी वज़ाह कु हिम्मत ना छ़ाड़ौ, कैलैकि इयौ सारौ तुमारै फाइदै लै आ।

¹⁴हाऊं एज़ै वज़ाह कु परमेश्‍वर बाबा काऐ घुंडै टेकाइयौ प्राथना कौराऊ,

¹⁵सेऊ एका सा ज़ुण सौरगा रौ और धौतरी माथै रौइणै वाल़ै सारै विश्वासिऊ रौ बाब आ।

¹⁶हाऊं प्राथना कौराऊ कि सेऊ आपणी महिमा री धन-ज़ायदादा रै मुताबिक तुमुलै इणौ दाण दिया कि तेसरी आत्मा कौरी शक्ति मिला ताकी तुमारै ज़िऊ मज़बूत बौणा,

¹⁷और विश्वासा रै ज़ौरिऐ मसीह तुमारै ज़िवा दी बौसा। कि प्यारा दी मज़बूत और अटल रौइयौ,

¹⁸तुमै सारै परमेश्‍वरा रै लोग, मसीह रै प्यारा री लम्बाई, च़ौड़ाई, उंच़ाई, और गहराई सौमझ़ी सौका।

¹⁹हाऊं प्राथना कौराऊ कि तुमै मसीह रौ सेज़ौ प्यार ज़ाणी सौका ज़ो ज्ञाना कु बौड़ौ आ ताकी परमेश्‍वर तुमु आपणै सवभाव कौरी भौरा।

²⁰आबै परमेश्‍वर ज़ुण इणौ शक्तिशाल़ी आ कि आमारी औरज़ और सौमझ़ा कु कई भौरी काम कौरी सौका आ, सेज़ी शक्ति कौरी ज़ो आमुदी काम कौरा आ,

²¹कलिसिया दी और मसीह यीशु दी तेसरी महिमा पीड़ी कु पीड़ी झ़ांऊ जुगा जुगा झ़ांऊ औन्दै थाकाली लागी। आमीन।