Read Pahari, Mahasu इफि 4 Bible Online

इफि 4 - Pahari, Mahasu bible

इफि 4

¹एथीलै हाऊं ज़ुण मसीह री सेवा कौरणै री वज़ाह कु ज़ेला दी ऊ तुमु कु औरज़ कौराऊ कि, ज़ेज़ी हाका कौरी परमेश्‍वरै तुमै आपणी सन्तान हुणा लै औटाऐ ई, तेथी रै मुताबिक ज़िन्दगी ज़िऔ,

²मतलब सारी दीनता और कौंअल़ै हुईऔ, और धीरज छ़ाड़ियौ प्यारा कौरी एकी-दुजै री सौऔ।

³और एज़ै काम आच़्छ़ै कौरी कौरौ ताकी तुमै लगातार संगती दी रौऔ, कैलैकि परमेश्‍वरा री आत्मा रै ज़ौरिऐ तुमै सारै एक ई किऐ औन्दै।

⁴आमै सारै विश्वासी एक ई शरीर रै आंगा ज़िणै ई और आमु सौभी कै एक ई पवित्र आत्मा सा मिलौ औन्दौ। ज़िणी तुमुकै एक आश थी देई ऐन्दी ज़ेबी तुमै परमेश्‍वरा रै लोग हुणा लै थै छ़ांटै औन्दै।

⁵सिरफ एका प्रभु आ, यीशु मसीह, एक ई विश्वास, और एक ई बपतिस्मौ,

⁶और सारेऊ रौ एक ई परमेश्‍वर और बाब आ, और सारेऊ माथै और सारेऊ रै बिच़ा ई और सारेऊ दी आ।

⁷पर आमु मांझ़ी हर एकी लै मसीह रै दाणा रै नतीज़ै रै मुताबिक बौड़ी दया मिली आ।

⁸एथीलै पवित्रशास्त्रा दी मसीह रै बारै दी इणौ आ लिखौ औन्दौ, “सेऊ उंच़ै माथै च़ौड़ौ आ और गुलाम निऐं बानियौ, और आदमी लै दैऔ दाण।”

⁹ज़िणौ पवित्रशास्त्रा दी आ लिखौ औन्दौ, “सेऊ उंच़ै माथै च़ौड़ौ” ता एथरौ मतलब इणौ आ कि मसीह धौतरी री थाला री ज़ागाह माथै उतरौ भी थौ।

¹⁰और मसीह ज़ुण धौनी उतरौ आ सेऊ सेज़ौ आदमी आ ज़ुण सौरगा दी सारेऊ कु उंच़ी ज़ागाह दी आ, ताकी सेऊ सारी ज़ागाह दी मौज़ूद हुई सौका।

¹¹मसीह ऐ इऐ वरदान दै: तिणीऐ कुछ़ छ़ांटै प्रेरित, और कुछ़ छ़ांटै भविष्यवक्ता और कुछ़ छ़ांटै खुश-खौबरी शुणाउणा लै और कुछ़ छ़ांटै रौखवाल़ै और शिक्षा दैणा लै।

¹²इउंरी ज़िम्मेबारी आ कि परमेश्‍वरा रै लोगु तेसरै कामा कौरना लै त्यार कौरा ओर कलिसिया ज़ो मसीह रौ शरीर आ तेस चाणा।

¹³इणौ लगातार थाका औन्दै लागी ज़ेबी झ़ांऊ कि आमै सारै रै सारै विश्वास और परमेश्‍वरा रै छ़ोहरु री निशाणी दी एक ना हुआ लै, और एक सिद्ध आदमी ना बौणिलै और मसीह रै पुरै डील-ढोल़ा झ़ांऊ ना बौड़ी लै।

¹⁴ता इबी कु, आमुऐ लोल़डेऊ ज़िणै नाईं बौणनौ, और ना तिऊं छ़ोटी किश्ती ज़िणै बौणनौ ज़ो पाणी री छ़ालै कौरी औगांऊ-पिछ़ाऊं और पाणी बागुरा कौरी ओरु-पोरु हुआ सा। एथरौ मतलब इणौ आ कि च़लाक और ठगी लोग आमुलै आपणी झ़ुठी शिक्षा कौरी धोखौ नाईं देई सौकदै।

¹⁵बल्कि प्यारा ई सौच़्च़ाई कौरी आण्डदी बारै सारी बुशु दी तेथदी ज़ुण मूंड आ, मतलब मसीह दी बौड़दै थाकौ लागी,

¹⁶ज़ेथ कौरी सारौ शरीर, हर एक ज़ोड़ा री मज़दा कौरी कौट्ठै मिलियौ और कौट्ठै बानुइऔ, तेस असरा रै मुताबिक ज़ुण हर एक आंगा रै ठीक-ठीक काम कौरीयौ तेसदी हुआई, आपणै आपु ई बौड़ा ई कि सै प्यारा ई बौड़दै थाकाली लागी।

¹⁷ज़ो हक्क प्रभुऐ मुकै आ दैऔ औन्दौ तेसी हक्‍का कौरी तुमुलै बोलाऊ, कि ज़िणै अविश्वासी लोग आपणै मौना री बिण मतलब री रीती माथै च़ाला ई, आबै तुमै तिणी ई नाईं च़ालौ।

¹⁸कैलैकि तिउंरी बुद्धी शेड़ी हुई गोई आ, और सेज़ै बिण ज्ञाना री वज़ाह कु ज़ो तिउँदी आ और तिउँरै मौना रै काठै हुणै री वज़ाह कु सै परमेश्‍वरा री देई ऐन्दी ज़िन्दगी तिऊंदी नाईं आ।

¹⁹और सै शुन्न हुईऔ बुरै कामा दी लागी गौऐ आ कि सारै रौंगा रै गान्दै काम आपणी मौरज़ी कौरी कौरा ई।

²⁰पर तुमुऐ मसीह री इणी शिक्षा नाईं पाई।

²¹बल्कि तुमुऐ सौच़्च़ी मसीह री शुणी और, ज़िणौ यीशु दी सौच़्च़ौ आ, तेसी दी शिखाऐ भी ई।

²²तुमारै शिखाउणै वाल़ेउऐ तुमुकै शिखाऔ कि तुमै आपणै पुराणै च़ाल-च़लण पोरु छ़ाड़ौ, तुमारी बुरी इच़्छ़ै तुमुलै धोखौ दैऔ और तुमारी ज़िन्दगी बरबाद कौरी गोई।

²³परमेश्‍वर तुमारै मौना रौ स्वभाव नौंवौ कौरणै दैऔ।

²⁴परमेश्‍वरै तुमुकै नौंवौ च़ाल-च़लण दैऔ आ ज़ो तेसी ज़िणौ आ। आपणै नौऐं च़ाल-च़लणा रै मुताबिक च़ालौ। सौच़्च़ै धौर्मी और पवित्र बौणौ।

²⁵एज़ै कारण झ़ूठ बोलणौ छ़ाड़ियौ हर एक आपणै साथी विश्वासी आइलै सौच़्च़ौ बोलौ, कैलैकि आमै एकी शरीरा रै आंग ई।

²⁶अगर तुमै रोशीयाई ता ध्यान छ़ाड़ौ कि पाप ना कौरौ; दीन ओड़नै झ़ांऊ तुमारै रोश नाईं च़ांई रौइणै,

²⁷और ना शैताना कै आपणै पौरखिणै रौ मौकौ दैऔ।

²⁸च़ोरी कौरणै वाल़ौ दुजी बारै च़ोरी नाईं कौरालौ, बल्कि भौलै कामा कौरना लै आपणै हाथा कौरी मैहनत कौरालौ, एथीलै कि ज़ासकै ज़रूरत औली तेसकै देणा लै तेसकै कुछ़ हुऔ च़ांई।

²⁹केज़ी भी गान्दी बूश तुमारै मुंआ कु नाईं च़ांई निकल़ी, पर ज़रुरता रै मुताबिक सेज़ी बूश च़ांई निकल़ी ज़ो आगै विश्वासा बौड़णा लै आच़्छ़ी हुआ, ताकी तेथ कौरी शुणनै वाल़ेऊ माथै बौड़ी दया हुआ ली।

³⁰परमेश्‍वरा री पवित्र आत्मा आपणै च़ाल-च़लणा कौरी दु:खी नाईं कौरौ। याद छ़ाड़ौ कि तिणीऐ तुमुकै आपणै हुणा लै पैहचान देइयौ पाक्कै ई कौरै औन्दै कि छ़ुटकारै रै दीन तुमै बौच़ाई।

³¹सारै रौंगा री कड़वाहट, और गुस्सौ, और झ़ौगड़ौ, और बुराई, सारी दुश्मनी भाव तुमु कु दूर च़ांई हुऐ।

³²एकी-दुजै माथै कृपालु और दया वाल़ै बौणौ, और ज़िणै परमेश्‍वरै मसीह दी तुमारै गुनाह माफ किऐ ई, तिणी ई तुमै भी एकी-दुजै रै गुनाह माफ कौरौ।