Read Pahari, Mahasu इफि 5 Bible Online

इफि 5 - Pahari, Mahasu bible

इफि 5

¹तुमै परमेश्‍वरा री सन्तान ई ज़ास आइलै सेऊ प्यार कौरा आ, ता तेस ज़िणै बौणनै री कोशिश कौरौ,

²प्यार कौरौ ज़िणौ मसीहै भी तुमु आइलै प्यार कियौ आ। सेऊ आमारी ताइंऐ परमेश्‍वरा काऐ आपु खुशबुदार भेटा और बौल़ी हुऔ आ.

³ज़िणौ परमेश्‍वरा रै लोगु लै ठीक आ, तिणौ तुमु दी बुरै काम और किणी भी रौंगा रै बुरै काम या लाल़च़ा री बुशै झ़ांऊ ना च़ांई हुई।

⁴और ना बेशर्मी, और ना मुर्खा वाल़ी बुशु री, और ना मज़ाका री। कैलैकि तुमुकै इऐ बुशै नाईं डौबदी, बल्कि तुमुऐ परमेश्‍वरा रौ धन्यबाद च़ांई कौरणौ।

⁵कैलैकि तुमै इणौ आच़्छ़ा कौरीऐ ज़ाणाई कि केज़ै भी बुरै, या गान्दै आदमी, या लाल़च़ी आदमी लै, ज़ो मूर्ती पुज़ा रै बराबर ई, मसीह और परमेश्‍वरा रै राज़ा ई कोई ज़ागाह नाईं।

⁶कोई तुमुलै बिण मतलबा री बुशु कौरी धोखौ ना च़ांई दैऔ, कैलैकि इणै कामा री वज़ाह कु परमेश्‍वरा रै रोश पाप कौरणै वाल़ेऊ माथै भौड़का आ।

⁷एथीलै तुमै पाप वाल़ी बुशु दी तिंउरै साथी नाईं बौणौ।

⁸कैलैकि तुमै ता पैहलै न्यारै दी थै पर ज़ेबी कु प्रभु रै लोग बौणै ई तेबी कु प्याशै दी ई, एथीलै प्याशै रै छ़ोहरु ज़िणै च़ालौ

⁹कैलैकि प्याशै रौ फौल़ भौलाई, धार्मिकता और सौच़्च़ाई आ;

¹⁰इणौ लोड़ौ कि प्रभु कै आच़्छ़ौ का लागा।

¹¹और तुमै पाप वाल़ी बुशु दी तिउंरै साथी नाईं बौणौ बल्कि लोगु कै इणौ देखाऔ कि इऐ काम बुरै ई।

¹²कैलैकि अविश्वासिऊ रै छ़ुपै औन्दै कामा री बातच़ीत भी शौरमा री बूश आ।

¹³सै सारै काम, ज़ो प्याशै कौरी पौगड़ौ हुआई, सै दिशा ई, ज़ुण सारौ कुछ़ पौगड़ौ कौरा आ सेऊ प्याशौ आ।

¹⁴इणी एक कहावत आ कि, “ओ सुतणैवाल़ेउओ, उठौ मौरै औन्दै मांझ़िया कु ज़िउंदै हुऔ। ता मसीह आपणौ प्याशौ तुमु दी च़ौमकावा आ।”

¹⁵एथीलै ध्याना कौरी देखौ, कि किणी च़ाल च़ाला ई मुर्खा ज़िणै नाईं बल्कि बुध्दिमाना ज़िणै च़ालौ।

¹⁶भौलाई कौरणै रौ हर मौकौ ज़ो तुमुकै आ, तेस किम्मत्ती सौमझ़ौ, कैलैकि दीन बुरै ई।

¹⁷एज़ै कारणै मुर्ख नाईं बौणौ, पर ध्याना कौरी सौमझ़ौ कि प्रभु री इच़्छ़ा का सा।

¹⁸अंगुरा रै रसा पीईयौ माच़ै औन्दै नाईं बौणौ, कैलैकि एथ कौरी बुराई पैदी हुआ आ। पर पवित्र आत्मा कु भौरिंदै थाकौ लागी,

¹⁹और आपु मांझ़िऐ भजन और स्तुति गाऔ और ज़ो गीत आमुकै पवित्र आत्मा दिया सा तेस गाइंदै थाकौ लागी, और आपणै-आपणै मौनाई प्रभु काऐ गाइंदै और भौक्ती कौरदै थाकौ लागी।

²⁰और सौदा हर बुशा लै आमारै प्रभु यीशु मसीह रै नावां दी परमेश्‍वर बाबा रौ धन्यबाद थाकौ कौरदै लागी।

²¹यीशु मसीह दी इज़्ज़ती री वज़ाह कु एकी-दुजै रै अधीन रौऔ।

²²ओ छ़ेउड़िओ, आपणै-आपणै बोउटै रै इणै अधीन रौऔ ज़िणै प्रभु रै अधीना दी रौआ ई।

²³कैलैकि बोउटौ छ़ेउड़ी रौ मूंड आ ज़िणौ कि मसीह कलिसिया रौ मूंड आ और मसीह कलिसिया रौ छ़ुटकारौ दैणै वाल़ौ आ ज़ो तेसरौ आपणौ शरीर आ।

²⁴ज़िणी कलिसिया मसीह रै अधीन आ, तिणी ई छ़ेउड़ी भी आपणै-आपणै बोउटै रै अधीन च़ांई रौई।

²⁵ओ बोउटेउओ, आपणी-आपणी छ़ेउड़ी आइलै प्यार कौरौ ज़िणौ मसीहै कलिसिया आइलै प्यार कौरीयौ आपणी ज़िन्दगी कलिसिया लै देई एरी आ

²⁶ताकी तिऐं आपणै वचना कौरी धोइयौ पापा कु शुद्ध कौरीयौ आपुलै अलग कौरा,

²⁷और तिऐं एक इणी च़ौमकणै वाल़ी कलिसिया चाणियौ आपु काऐ खौड़ी कौरा, ज़ासदी ना कलंक, ना गुड़ी, और ना केज़ी इणी च़िज़ै हुआ बल्कि पवित्र और बेदाग वाल़ी हुआ।

²⁸इणी ई कौरी बोउटै आपणी-आपणी छ़ेउड़ी कु आपणै शरीरा ज़िणौ प्यार कौरालौ। ज़ुण आपणी छ़ेउड़ी कु प्यार कौरा आ, सेऊ आपु कु प्यार कौरा आ।

²⁹कैलैकि कोइऐ केबी भी आपणै शरीरा आइलै दुश्मनी नाईं छ़ाड़ी बल्कि तेसरौ पालन-पोषण ई किऔ, ज़िणौ मसीह भी कलिसिया आइलै कौरा आ।

³⁰एथीलै कि आमै मसीह रै शरीरा रै आंग ई।

³¹ज़िणौ पवित्रशास्त्रा दी आ लिखौ औन्दौ, “एज़ै कारणै आदमी आपणै मां-बाब छ़ाड़िऔ आपणी छ़ेउड़ी कु मिली थाका, और सै दुइया एक शरीर हुआई।”

³²एऊ भेद ता बौड़ौ आ, पर हाऊं इदै मसीह और कलिसिया रै बारै ई बोलाऊ।

³³पर तुमु मांझ़ी हर एक आपणी छ़ेउड़ी आइलै आपु ज़िणौ प्यार कौरा, और छ़ेउड़ी भी आपणै बोउटै री इज़्ज़त कौरा।