Read Pahari, Mahasu इफि 6 Bible Online

इफि 6 - Pahari, Mahasu bible

इफि 6

¹ओ लोल़डेउओ, प्रभु दी आपणै मां-बाबा रै आज्ञाकारी बौणौ, कैलैकि एऊ ठीक आ।

²“आपणै मां-बाबा री इज़्ज़त कर ताकी तैरौ भौलौ हुआ लौ, और तू धौतरी माथै भौरी दिना दी ज़िउंदौ रौआ।” इयौ पैहलौ हुकम आ ज़ास आइलै वायदौ भी आ।

⁴ओ लोल़डेऊ वाल़ेउओ, आपणै छ़ोहरु लै रोश ना दिलाऔ, पर प्रभु री शिक्षा और च़ेतावनी देइऔ तिऊं धाचौ।

⁵ओ नुकरुओ, ज़ुण आदमी इऐं धौतरी दी तुमारै मालिक ई, तिउंरी इज़्ज़त और इम्मानदारी कौरी हुकम मानौ, ज़िणी मसीह री माना ई।

⁶आदमी खुश कौरणै वाल़ेऊ बाशीऐ देखाउणा लै सेवा ना कौरौ, पर मसीह रै नुकरु बाशीऐ मौना कौरी परमेश्‍वरा री इच़्छ़ा माथै च़ालौ,

⁷और तिऐं सेवा खुशी कौरी कौरौ ज़िणौ कि मानौ तुमै आदमी री नाईं बल्कि प्रभु री कौरदै लागै औन्दै।

⁸कैलैकि तुमै ज़ाणाई कि ज़ुण भी ज़िणौ आच़्छ़ौ काम कौरालौ, च़ाऊ सेऊ नुकुर औलौ च़ाऊ आज़ाद, प्रभु दी तिणी ई इनाम पा आ लौ।

⁹इणी ई, ओ मालिकुओ, तुमै भी धौमकी दैणी छ़ाड़िऔ आपणै नुकरु आइलै आच़्छ़ौ बरताव कौरौ। कैलैकि तुमै ज़ाणाई कि तिऊंरौ और तुमारौ मालिक सौरगा दी आ, और सेऊ कासी आइलै भेद-भाव नाईं कौरणौ।

¹⁰तुमुलै आखरी बूश इऐ ई: प्रभु री बौड़ी शक्ति कौरी मज़बूत बौणौ।

¹¹परमेश्‍वरा रै सारै हथियार बानौ ताकी तुमै शैताना री युक्ति रौ सामनौ कौरी सौका।

¹²कैलैकि आमारी एज़ी लौड़ाई लोगु आइलै नाईं पर न्यारै रै परधानु, और हाकिमु, और इऐं धौतरी रै आफसरा आइलै आ, और इऐ बुरी आत्मा री फौज़ा आइलै आ ज़ुण आसमाना दी ई।

¹³एथीलै परमेश्‍वरा रै सारै हथियार बानी छ़ाड़ौ ताकी तुमै बुरै दिना ई सामनौ कौरी बौल़ा, और सारौ कुछ़ पुरौ कौरीयौ टेकी बौल़ा।

¹⁴एथीलै परमेश्‍वरा री सौच़्च़ाई कौरी आपणी कौमर कौशौ, और धार्मिकता रौ च़ोगौ भिड़ीयौ,

¹⁵और बांगणै दी मेल-मिलापा रै खुशी री खौबरी री तैयारी रै बूट भिड़ीयौ,

¹⁶और इऊं सारेऊ आइलै विश्वासा री ढाल नीईंयौ तैयार थाकौ ज़ेथ कौरी तुमै तेस दुष्टा रै सारै ज़ौल़दै बाण इशाई बौल़ा।

¹⁷और छ़ुटकारै री टोपी, और आत्मा री तलवार, ज़ो परमेश्‍वरा रौ वचन आ, नींई छ़ाड़ौ।

¹⁸हर बौगता दी और हर रौंगा कौरी आत्मा दी प्राथना, और औरज़ थाकौ कौरदै लागी, और एथीलै उज़ीई थाकौ ताकी सारै परमेश्‍वरा रै लोगु लै सौदा प्राथना थाकौ कौरदै लागी,

¹⁹तुमै मुलै भी प्राथना कौरौ कि मुकै बोलदी बारै इणौ मज़बूत वचन च़ांई देउऔ कि हाऊं हिम्मता कौरी खुशी-खौबरी रौ भेद बोली सौकु,

²⁰ज़ेथलै हाऊं शांगल़ी कौरी बानौ औन्दौ राज़दूत ऊ। और इणौ भी कि हाऊं तेसरै बारै दी ज़िणौ मुकै च़ांई हिम्मता कौरी बोलु।

²¹तुमुकै भी इणौ पौतौ लागा कि हाऊं किणौ ऊ और का ऊ कौरदै लागौ औन्दौ। बाकी विश्वासी भाई तुखिकुस, तुमुकै सारी बुशै बोला आ। सेऊ आमारौ प्यारौ भाई आ। और प्रभु दी मज़बूत, विश्वासा रै लायक सेवादार आ।

²²सेऊ मुंइऐ तुमु काऐ एथीलै भेज़ौ ताकी तुमै मेरी हालत ज़ाणा, और सेऊ तुमुलै हिम्मत देई सौका।

²³हाऊं आमारै बाब परमेश्‍वर और प्रभु यीशु मसीह कु प्राथना कौराऊ, कि सेऊ तुमु सौभी विश्वासिऊ लै शान्ति दिया और तुमु एकी दुजेऊ कु प्यार और मसीह दी विश्वास कौरणै दी मज़द कौरा।

²⁴परमेश्‍वरा री तिऊं सारेऊ माथै बौड़ी दया थाका औन्दै लागी, ज़ुण आमारै प्रभु यीशु मसीह आइलै प्यार कौरणौ केबी नाईं छ़ाड़दै।