Read Pahari, Mahasu फिलि 1 Bible Online

फिलि 1 - Pahari, Mahasu bible

फिलि 1

¹हाऊं पौलुस और तीमुथियुसा ज़ुण यीशु मसीह रै सेवक ई आमारी तौरफा कु इऐ चिट्ठी परमेश्‍वरा रै सारै पवित्र लोगु, मुख्येऊ लै और सेवकु लै ज़ुण यीशु मसीह दी हुइयौ फिलिप्पी शैहरा दी रौआ ई लिखाऊ।

²आमारै बाब परमेश्‍वर और प्रभु यीशु मसीह री तौरफा कु तुमुलै बौड़ी दया और शान्ति मिलदी रौआ।

³हाऊं ज़ेबी-ज़ेबी तुमु याद कौराऊ, तेबी-तेबी आपणै परमेश्‍वरा रौ धन्यबाद कौराऊ।

⁴और ज़ेबी केबी तुमु सौभी लै औरज़ कौराऊ। ता सौदा खुशी आइलै औरज़ कौराऊ।

⁵एथीलै कि तुमै पैहलै दिना कु आज़ा झ़ांऊ खुशी री खौबर फैलाउणै दी मुं आइलै रौऐ ई।

⁶मुकै इऊं बुशु रौ विश्वास आ कि परमेश्‍वर ज़ुणिऐ तुमु मांझ़िऐ आच़्छ़ौ काम शुरु कियौ सा, सेऊ ई तेस काम ज़ेबी यीशु मसीह दुजी बारै वापिस आशा लौ तेबी झ़ाऊं पुरौ कौरा।

⁷एऊ ठीक आ कि हाऊं तुमु सौभी लै इणी ई बिच़ार कौरु, कैलैकि हाऊं तुमु आइलै भौरी प्यार कौराऊ, और ज़ेबी हाऊं ज़ेला दी ऊ खुशी री खौबरी रखवाल़ी कौरना लै और सौच़्च़ साबित कौरना लै तुमै सारै मुं आइलै परमेश्‍वरा री बौड़ी दया दी साज़ी ई।

⁸एथदी परमेश्‍वर मैरौ गवाह सा कि हाऊं यीशु ज़िणौ प्यार कौरीऔ तुमु सौभी री देखभाल़ कौरणै री बौड़ी इच़्छ़ा छ़ाड़ाऊ।

⁹हाऊं इणी प्राथना कौराऊ कि तुमारौ एकी दुजै लै प्यार, ज्ञान और सारै रौंगा री पुरी सौमझ़ा आइलै औज़ौ भी बौड़दै थाकौ लागी,

¹⁰एथीलै कि तुमै इऊं बुशु पौरखणै रै लायक बौणौ कि केज़ी बुशै बोलणा लै ठीक ई और मसीह रै दुजी बारै वापिस आशणै झ़ाऊं पवित्र और बेकसूर बौणी रौऔ।

¹¹यीशु मसीह रै दुजी बारै पैदै हुणै रै भौलाई रै कामा कु आपु भौरीयौ ज़ेथकु परमेश्‍वरा री महिमा और स्तुति औन्दी रौआ।

¹²ओ मैरै प्यारै साथी विश्वासिउओ, हाऊं च़ाहा ऊ कि तुमै इणौ ज़ाणौ कि मुं माथै ज़ो बितौ सा, तेसरी वज़ाह कु भौरी लोगुऐ खुशी री खौबरी माथै विश्वास कियौ आ।

¹³इदरा झ़ांऊ कि कैसर राज़ै रै मैहला री सारी फौज़ और बौच़ै औन्दै सारै लोगु दी इणौ पौगड़ौ हुई गौ कि हाऊं मसीह री खातिर ज़ेला दी कैद ऊ।

¹⁴और प्रभु दी ज़ो भाई आ, तिऊं मांझ़िऊ कु भौरी लोगुऐ मैरै ज़ेला दी हुणा री वज़ाह कु मज़बूत विश्वास कौरी परमेश्‍वरा रौ वचन बिणा डौरीयौ शुणाउंणा लै औज़ौ भी हिम्मत कौरा आ।

¹⁵इणौ सौच़्च़ौ आ कि कुछ़ लोग ता ज़लन और लौड़ाई-झ़ौगड़ै री वज़ाह कु मसीहा री खुशी री खौबरी रौ परचार कौरा ई और कुछ़ कौरा ई आच़्छ़ै इरादै कौरी।

¹⁶इऐ इणै लोग ई ज़ुण मसीह री खुशी री खौबर आच़्छ़ै इरादै कौरीऐ और प्यारा कौरी शुणावा ई कैलैकि सै ज़ाणाई कि हाऊं यीशु मसीह री खुशी री खौबरी री रखवाल़ी री खातिर ज़ेला दी पाऔ औन्दौ।

¹⁷पर इऐ सै लौड़ाई-झ़ौगड़ै कौरणै वाल़ै लोग ई ज़ुण खुशी री खौबर सौच़्च़ाई कौरी नाईं पर आपणै मतलबा लै मसीह री खुश-खौबरी शुणावा ई, इणौ सुंच़ीऔ कि मुं ज़ेला दी औज़ौ भी ज़ादौ परेशान कौरा।

¹⁸तैबै का हुऔ? सिरफ इणौ कि सौभी रौंगा कु, च़ाऐ बुरी वज़ाह कु च़ाऐ सौच़्च़ाई कु, मसीहा री खुश-खौबरी शुणावा ई, और हाऊं एथकु भौरी खुश ऊ और भौरी खुश रौआ भी ऊ।

¹⁹कैलैकि हाऊं ज़ाणाऊ कि तुमारै प्राथना रै ज़ौरिऐ, और यीशु मसीह री तौरफा कु भेज़ी ऐन्दी पवित्र आत्मा री मज़दा रै ज़ौरिऐ, एथरौ इनाम मुलै आच़्छ़ौ हुणौ आ।

²⁰हाऊं ता भौरी इच़्छ़ा और आश छ़ाड़ाऊ कि हाऊं केज़ी बुशु दी बेइज़्ज़त ना औऊ, पर ज़िणै मैरै शक्ति रै हिम्मता री वज़ाह कु मसीह री बौड़ाई मैरै शरीरा रै ज़ौरिऐ सौदा औन्दै रौई आ, तिणी ई आबै भी हुआ, च़ाऐ हाऊं ज़िउंदौ रौऊ या मौरु लौ।

²¹कैलैकि मैरौ ज़िउंदौ रौइणौ मसीह लै आ, और मैरौ मौरणौ भी लाभ आ कैलैकि हाऊं मौरणै बासिऐ मसीह आइलै रौआऊ।

²²पर अगर शरीरा दी ज़िउंदौ रौइणौ ई मैरै कामा लै ठीक आ ता हाऊं नाईं ज़ाणदौ कि कास छ़ांटु।

²³कैलैकि इऊं दुइया मांझ़िया कु एक छ़ांटणौ मुकालै भौरी कठिण आ। मन ता च़ाहा आ कि मौरीयौ मसीह काऐ डेइयौ रौऊ, कैलैकि एऊ मुकालै भौरी आच़्छ़ौ आ,

²⁴पर शरीरा दी रौइणौ औज़ौ भी ज़ुरुरी आ कैलैकि तुमुकै मेरी मज़दा री ज़ुरत आ।

²⁵एथीलै कि मुकै एथरौ भरोसौ आ। और हाऊं ज़ाणाऊ कि हाऊं ज़िउंदौ रौआऊ, पर बल्कि सौभी आइलै रौआऊ ज़ेथकु हाऊं तुमु विश्वासा दी मज़बूत कौरदै और तेथदी खुश रौउणै दी तुमारी मज़द कौराऊ।

²⁶और ज़ो घमण्ड तुमै मैरै बारै दी कौरा ई। सेऊ मैरै तौंइऐ तुमु काऐ आशणै कु यीशु मसीह दी भौरी बौड़दै रौऔ।

²⁷सिरफ एती कौरौ कि तुमारौ चाल-चलण मसीह रै खुश-खौबरी रै मुताबिक हुआ कि च़ाऐ हाऊं आशीयौ तुमु देखु, च़ाऐ नाईं भी आशु, तुमारै बारै दी हाऊं इणौ शुणु कि तुमै एक ई इरादै दी मज़बूत रौआ ई, और एकी मौना कौरी खुशी री खौबरी रै विश्वासा लै मैहनत कौरदै रौआ ई,

²⁸और केज़ी भी बुशु दी बिरोधिऊ कु डौरदै नाईं। तुमारी हिम्मत तिंउलै विनाशा री साफ निशाणी आ, पर तुमु कालै छ़ुटकारौ रौ और इणौ परमेश्‍वरा री तौरफा कु आ।

²⁹कैलैकि मसीह री वज़ाह कु तुमु माथै इणी बौड़ी दया हुई कि ना सिरफ तेस माथै विश्वास कौरौ पर तेसलै दु:ख भी उठाऔ।

³⁰और तुमुऐ तिणी ई मुसीबत झ़ेलणी, ज़िणी तुमुऐ हाऊं मुसीबत झ़ेलदै देखौ ऊ, ज़ेबी हाऊं तुमु आइलै फिलिप्पी शैहरा दी थौ, और आबै भी शुणाई कि हाऊं तिणी ई झ़ेलाऊ।