Read Pahari, Mahasu फिलि 2 Bible Online

फिलि 2 - Pahari, Mahasu bible

फिलि 2

¹एथीलै अगर तुमु लोगु मांझ़िऐ मसीह दी थोड़ौ भी हौसलौ प्यारा कु पैदौ हुआ सौबर, आत्मा रौ साथ, और कुछ़ करुणा और दया आ,

²ता मेरी एज़ी खुशी पुरी कौरौ कि एक मन छ़ाड़ौ, और एक ज़िणौ प्यार, एक दुजेऊ आइलै मेल मिलाप छ़ाड़ौ, और एक ई इच़्छ़ा छ़ाड़ौ।

³आपणै फाइदै लै या घमण्डा कौरी कुछ़ ना कौरौ, पर निउलै हुइयौ एकी दुजै आपु कु ज़ादै आच़्छ़ै सौमझ़ौ।

⁴हर एक सिरफ आपणी ई भौलाई री नाईं, पर दुजेऊ री भौलाई री भी फिकर कौरौ।

⁵ज़िणौ यीशु मसीह रौ स्वभाव थौ तिणी ई तुमारौ भी एकी दुज़ेऊ आइलै स्वभाव हुआ।

⁶हालांकी मसीह सौच़्च़ी ई परमेश्‍वर थौ तैबै भी तिणीऐ लोग इणै मज़बूर नाईं किऐ कि सै तेस आइलै परमेश्‍वरा ज़िणौ बरताव कौरा।

⁷पर आपुलै तिणीऐ कुछ़ भी नाईं सौमझ़ौ, और सेवका रौ रूप धारण कियौ, और आदमी रै ज़िणौ हुई गौ।

⁸और आदमी रै रुपा दी पौगड़ै हुइयौ आपु छ़ोटौ बौणौ, और आपणी मौउता झ़ाऊं हुकम मानै इदरा झ़ाऊं कि तिणीऐ क्रुसा री दर्दनाक मौउत भी सौई।

⁹एज़ै कारण परमेश्‍वरै सेऊ भौरी महान भी कियौ, और तेसलै सेज़ौ नाऊं दैऔ ज़ो सौभी नावां कु बौड़ौ आ,

¹⁰कि ज़ुण सौरगा दी और धौतरी दी और धौतरी थालै ई, सै सारै यीशु रै नावां दी तेसलै इज़्ज़तमान दैणा लै घुंडै टेका।

¹¹और बाब परमेश्‍वरा री महिमा लै हर एक आदमी आपणै मुंआ कौरी इणौ माना लौ कि यीशु मसीह ई प्रभु सा।

¹²एथीलै ओ मैरै प्यारै साथी विश्वासिउओ, ज़िणै तुमै सौदा ओउलै हुकम मानियौ आशै ई, तिणी ई आबै भी ना सिरफ मुं आइलै रौउंदी बारै पर खास कौरीऐ आबै मैरै दूर रौइयौ भी डौरीयौ और कांबीऔ भौलाई रै काम लगातार कौरौ, ज़ो तुमारै छ़ुटकारै कु आशा ई।

¹³कैलैकि परमेश्‍वर ई आ ज़ुण आपणी पवित्र आत्मा रै ज़ौरिऐ तुमारै ज़िवा दी तेसरी भौली इच़्छ़ा और भौलै काम, कौरणै री हिम्मत दिया आ।

¹⁴सौभी काम बिण कुड़कुड़ाइयौ और बिण झ़ौगड़िऔ कौरौ,

¹⁵ताकी तुमै बेकसूर और भोल़ै हुइयौ दारखै और भौरी ढ़ीलै लोगु मांझ़िऐ परमेश्‍वरा री बेदाग संतान बौणी रौऔ, ज़ास मांझ़िऐ तुमै ज़िन्दगी रौ वचन नीईंयौ धौतरी दी आसमाना रै च़मकदै तारै ज़िणै दिशदै रौऔ।

¹⁶ताकी मसीह रै दुजी बारै वापिस आशणै रै दिना दी मुकै घमण्ड कौरणै रौ कारण हुआ, कि मेरी भाग-दौड़ और कठिण मैहनत कौरणौ बेकार नाईं हुऔ।

¹⁷तुमारौ मसीह दी विश्वास और तुमारी सेवा परमेश्‍वरा लै च़ौड़ाई ऐन्दी बौल़ी ज़िणी आ। अगर सै मुं झ़ांगा भी लै, तैबै भी हाऊं खुश ऊ और तुमु सौभी आइलै खुशी मौनावा ऊ।

¹⁸तिणी ई तुमै भी खुश रौऔ और मुं आइलै खुशी मौनाऔ।

¹⁹मुकै प्रभु यीशु दी आश आ कि हाऊं तीमुथियुस तुमु काऐ शिगरी ई भेज़ाऊ, ताकी तुमारी हालत शुणियौ मैरौ हौसलौ बौड़ा।

²⁰कैलैकि मुं काऐ इणौ ढौंगारौ कोई नाईं ज़ो साफ मौना कौरी तुमारी फिकर कौरा।

²¹कैलैकि सौभी आपणै मतलब लोड़ाई, ना कि यीशु मसीह रौ।

²²पर तुमै ता तीमुथियुसा काबलियत ज़ाणाई कि ज़िणौ छ़ोहरु बाबा आइलै कौरा सा, तिणी ई तिणीऐ खुशी री खौबर फैलाउणै दी मुं आइलै मैहनत की ई।

²³एथीलै मुकै आश आ कि ज़िणी ई मुकै पौतौ लागा लौ कि मेरी का हालत हुआ आ, तिणी ई हाऊं तेस खरकच़ार भेज़ाऊ।

²⁴और मैरौ प्रभु दी भरोसौ आ कि हाऊं आपु ई शिगरी आशाऊ।

²⁵पर मुंइऐ इपफ्रुदीतुस तुमु काऐ वापिस भेज़णौ ज़ुरुरी सौमझ़ौ। एऊ मैरौ भाई और मुं आइलै कामा कौरणै वाल़ौ और मैरौ साथी फौज़ी और तुमारी खौबर पौउंच़ाउणै वाल़ौ और ज़ुरुरी बुशै दी मेरी सेवा टहल कौरणै वाल़ौ आ।

²⁶कैलैकि तेसरौ मन तुमु सौभी दी थौ लागौ औन्दौ, और सेऊ बेच़ैन रौआ थौ कैलैकि तुमुऐ तेसरी बिमारी री हालत शुणी थी।

²⁷सेऊ सौच़्च़ी ई बिमार ता हुई गौ थौ इदरा झ़ांऊ कि मौरणै वाल़ौ थौ, पर परमेश्‍वरै तेस माथै दया की, और सिरफ तेस ई माथै नाईं पर मुं माथै भी कि मुकै दु:खा माथै दु:ख ना च़ांई हुऔ।

²⁸एथीलै मुंइऐ तेस भेज़णा लै भौरी कोशिश की ई कि तुमै तेसकु मिलियौ खुश हुआ और मेरी फिकर भी कम हुआ।

²⁹एथीलै तुमै प्रभु दी तेसकु भौरी खुशी आइलै मिलेऊ, और तुमुऐ तेसरी और ज़ुण तेस ज़िणै ई तिउंरी इज़्ज़त कौरणी च़ांई,

³⁰कैलैकि सेऊ ई मसीह रै कामा लै आपणै प्राणा माथै कौष्टा कौरीयौ मौरणै वाल़ौ थौ, ताकी ज़ेथरी कामी तुमारी तौरफा कु मेरी सेवा दी हुई तेस पुरी कौरा।