Read Pahari, Mahasu फिलि 3 Bible Online

फिलि 3 - Pahari, Mahasu bible

फिलि 3

¹एथीलै ओ मैरै प्यारै साथी विश्वासिउओ, प्रभु दी खुश रौऔ! सेज़ी बुशै तुमुलै घौड़ी-घौड़ीऐ लिखणै दी मुंदी ता कोई कौष्ट नाईं औन्दौ, बल्कि इऐ बुशै तुमु झ़ुठी शिक्षा कु बौच़ावा आ,

²तिऊं लोगु कु खौबरदार रौऔ ज़ुण कुकरु ज़िणै खतरनाक ई, और बुरै काम कौरणै वाल़ै ई, और सै बोलाई कि छ़ुटकारै लै खतनौ ज़ुरुरी आ।

³कैलैकि परमेश्‍वरा रै सौच़्च़ै लोग ता आमै ई ज़ुण परमेश्‍वरा री आत्मा दी हुइयौ आराधना कौरा ई, और यीशु मसीह माथै घमण्ड कौरी ई, और शरीरा रै कामा माथै घमण्ड नाईं कौरदै।

⁴अगर कासी ओरी रौ शरीरा रै कामा माथै घमण्ड छ़ाड़णै रौ बिच़ार आ, ता मुकै शरीरा रै कामा माथै घमण्ड छ़ाडणै री वज़ाह तिऊंकु भी बौड़ियौ आ।

⁵आठवै दिनै मैरौ खतनौ हुऔ ज़िणौ परमेश्‍वरै हुकम थौ दैऔ औन्दौ, हाऊं इस्राइली लोगु रै वंश, और बिन्यामिना रै गोत्रा रौ ऊ। हाऊं पाकौ इब्रानी ऊ और मैरै स्याणै भी पाकै इब्रानी थै। अगर मुसा रै नियमा मानणै री बूश आ ता हाऊं फरीसी ऊ।

⁶तागती रै बारै दी बोलालै ता कलिसिया रौ सताउणै वाल़ौ। और यहुदी नियम मानणै री बूश आ ता हाऊं धौर्मी आदमी थौ। कैलैकि हाऊं तिऊं नियमा रौ पालन कौरा थौ।

⁷पर ज़ो-ज़ो बुशै मुइंऐ सुंच़ी थी कि सै मैरै फाइदै री, सेई मुंइऐ मसीह ज़ाणना लै बेकार सौमझ़ी गोई।

⁸पर एथकु कु भी बौड़ियौ हाऊं आपणै प्रभु यीशु मसीह ज़ाणनै री ज़ुरता काऐ सारी बुशै बेकार सौमझ़ा ऊ। ज़ासरी वज़ाह कु मुंइऐ सौभी च़िज़ु रौ नुकसान झ़ेलौ, और तिऊं कूड़ौ सौमझ़ा ऊ। ज़ेथ कौरी हाऊं मसीह ज़ाणु।

⁹ताकी हाऊं तेस आइलै एकता दी ज़ीई सौकु, ना कि आपणै तेस धार्मिकता आइलै, ज़ो मुसा रै नियमा कु आ, पर तेस धार्मिकता आइलै ज़ो मसीह माथै विश्वास कौरणै री वज़ाह कु आ और परमेश्‍वरा री तौरफा कु विश्वास कौरणै कु मिला आ।

¹⁰हाऊं च़ाहा ऊ कि मसीह ज़ाणु, कि तेसरै तौंइऐ ज़िउंदै हुणै री शक्ति मैहसूस कौरु, तेसरै दु:ख झ़ेलणै दी साथी बौणीयौ और मौउता दी तेस ज़िणौ बौणु।

¹¹ज़ेथ कौरी हाऊं केज़ी भी रीती कौरी मौरै औन्दै मांझ़िया कु दुज़ी बारै ज़िउंदै हुणै झ़ाऊं पौउंच़ी सौकु।

¹²इणौ मतलब नाईं आ कि मुंइऐ इऐ सारी च़िज़ै पैहलै ओउलै पाई गोई आ, या पाकौ हुई ऐरौ ऊ। पर हाऊं तिऐं च़ीज़ पाइणा लै औगांऊ बौड़दै लागौ औन्दौ ताकी हाऊं पाकौ बौणु। ज़ेथलै मसीह यीशुऐ छ़ांटौ थौ।

¹³ओ मैरै प्यारै साथी विश्वासिउओ, मैरै बोलणै रौ मतलब इणौ नाईं कि मुकै मिली गौ आ। पर सिरफ इणौ एक काम कौराऊ कि ज़ो-ज़ो बुशै बिती गोई तिऊं बिसरीयौ, ज़ो बुशै हुणै वाल़ी ई तिऊं बुशु री तौरफा दी बौड़ियौ,

¹⁴निशाणा री तौरफा दी दौड़दै थाकाऊ लागी, ताकी तेस सौरगा रौ इनाम पाऊ ज़ेथलै परमेश्‍वरै हाऊं यीशु मसीह रै ज़ौरिऐ सौरगा लै औटाऔ ऊ।

¹⁵आमु मांझ़िऐ ज़ेती विश्वासा दी बौड़दै ई लागै औन्दै, इणै बिच़ार छ़ाड़ा, और अगर केज़ी बुशा दी तुमारौ ओर ई बिच़ार हुऔ ता परमेश्‍वर तेस भी तुमु माथै पौगड़ौ कौरा ई।

¹⁶एथीलै आमुऐ तिऐं सौच़्च़ाई ज़िणी ज़िन्दगी ज़िउणी च़ांई ज़ो परमेश्‍वरै पैहला कु आमु माथै पौगड़ी कौरी थी।

¹⁷ओ मैरै प्यारै साथी विश्वासिउओ, तुमै सौभी मिलियौ मुं ज़िणी ज़िन्दगी ज़िऔ, और तिऊं रवाई छ़ाड़ौ ज़ो इणै रीती कौरी ज़िवा ई ज़ासरौ औनैणौ तुमै आमुदी पा ई।

¹⁸कैलैकि भौरी लोग बुरी च़ाल च़ाला ई, ज़ेथरै बारै दी मुंइऐ तुमुकै घौड़ी-घौड़ीऐ बोलौ आ, और आबै भी लेरी-लेरीयौ बोलाऊ कि सै आपणी च़ाल-च़लणा कु मसीह कुर्बानी रै दुश्मन ई।

¹⁹तिऊंरौ अन्त विनाश आ, तिऊंरौ ईश्वर तिउंरै शरीरा री इच़्छ़ा सा, सै आपणी शरमा री बुशु माथै घमण्ड कौरा ई और धौतरी री च़िज़ेऊ माथै मन लाई छ़ाड़ाई।

²⁰पर आमारौ आपणौ देश सौरगा दी आ। और आमै एक छ़ुटकारै देणै वाल़ै प्रभु यीशु मसीह रै तिदरा कु आशणै रौ इन्तज़ार लागै औन्दै कौरदै।

²¹सेऊ आपणी शक्ति रै तेस प्रभाव रै मुताबिक ज़ासरै ज़ौरिऐ सेऊ सौभी च़िज़ेऊ आपणै वशा दी कौरी सौका आ। सेऊ आमारी दीन-हीन शरीर रौ रूप बौदल़ियौ, आपणै महिमा रै शरीरा ज़िणौ चाणा आ।