Read Pahari, Mahasu फिलि 4 Bible Online

फिलि 4 - Pahari, Mahasu bible

फिलि 4

¹ओ मैरै प्यारै साथी विश्वासिउओ, हाऊं तुमु आइलै भौरी प्यार कौराऊ और तुमु कु मिलणौ च़ाहा ऊ, ज़ो मेरी बौड़ी खुशी और इनाम ई। एथीलै ओ मैरै प्यारै साथी विश्वासिउओ, प्रभु रै विश्वासा दी इणै मज़बूत रौऔ।

²हाऊं यूओदिउ भी सौमझ़ावा ऊ और सुन्तुखे लै भी हौसलौ दियाऊ, कि सै प्रभु दी मिली-ज़ुलियौ रौआ।

³ओ सौच़्च़ै साथी, हाऊं तांउकु भी औरज़ कौराऊ कि तू तिऊं छ़ेउड़ी री मज़द कर कि सै भी मिली-ज़ुलियौ रौआ, कैलैकि तिंउऐ मुं आइलै खुशी री खौबर फैलाउणा दी, क्लेमेंस और मैरै दुजै गोश्टणु आइलै मैहनत की ई आ, तिऊं सारेऊ रै नाऊं ज़िन्दगी री किताबी दी लिखै औन्दै।

⁴प्रभु दी सौदा खुश रौऔ। हाऊं तुमुलै तौंइऐ बोलाऊ, खुश रौऔ।

⁵तुमारौ कौंउल़ौपन सौभी लोगु माथै पौगड़ौ हुआ। प्रभु रौ वापिस आशणौ नज़दीक आ।

⁶केज़ी भी बुशु री फिकर नाईं कौरौ। पर हर एक हालती दी तुमारै निवेदन, प्राथना और औरज़ा रै ज़ौरिऐ धन्यबादा आइलै परमेश्‍वरा काऐ देईया।

⁷तैबै परमेश्‍वरा री शान्ति, ज़ो आदमी री सारी सौमझ़ा कु बाइरै आ, तुमारौ मन और तुमारौ बिच़ार मसीह यीशु दी बौच़ाई छ़ाड़ाई।

⁸एथीलै आखरी दी, ओ मैरै प्यारै साथी विश्वासिउओ, तुमै आपणौ ध्यान तिऊं बुशु माथै लाऔ, ज़ो-ज़ो बुशै सौच़्च़ी ई, और इज़्ज़त वाल़ी ई, और भौली ई, और पवित्र ई, और बुशै आच़्छ़ी ई, और ज़िवा दी आच़्छ़ी लागणै वाल़ी ई। तिऊं बुशु रै बारै दी भी सुंच़ौ ज़ो भौरी आच़्छ़ी और बौड़ाई री।

⁹ज़ो बुशै तुमुऐ मुकु शिखी, और मानी, और शुणी, और मुंदी देखी ई, तिऊंरौ पालन कौरौ, तैबै शान्ति रौ परमेश्‍वर तुमु लोगु आइलै रौआ आ।

¹⁰हाऊं प्रभु दी भौरी खुश ऊ कि आबै एती दिना बासिऐ तुमारै ज़िवा दी मुलै पैसै भेज़णै रौ तौंइऐ बिच़ार आशै। सौच़्च़ी तुमुकै शुरु दी भी एथरी फिकर थी, पर तुमुकै एथरौ मौकौ नाईं मिलौ।

¹¹इणौ नाईं कि हाऊं आपणी ज़रुरता री वज़ाह कु इणौ बोलाऊ। कैलैकि मुंइऐ इणौ शिखौ आ कि ज़ेज़ै हालता दी ई, तेसी दी खुशी कौरु।

¹²हाऊं भौरी कामती दी भी ज़िन्दगी ज़िवी सौका ऊ। ज़रुरता कु ज़ादै दी भी ज़िउणौ ज़ाणाऊ। भुखौ रौउणौ, और बौड़णौ-घौटणौ, हर एक बूश और सौभी हालती दी मुंइऐ ज़िउणौ शिखी गौ आ।

¹³मसीह रै ज़ौरिऐ ज़ुण मुलै शक्ति दिआ सा तेसदी हाऊं सारौ कुछ़ कौरी सौका ऊ।

¹⁴तैबै भी तुमुऐ आच़्छ़ौ किऔ आ कि मुकै पैसै भेज़ीयौ मैरै दु:खा दी साज़ी हुऐ ई।

¹⁵ओ फिलिप्पिऊ रै लोगुओ, तुमै आपु भी ज़ाणाई कि खुशी री खौबर ज़ो तुमुकै शुरु कु शुणाई और ज़ेबी हाऊं मकिदुनीया परदेशा कु डैऔ थौ, तैबै सिरफ तुमारी ई कलिसिया रै लोगुऐ लेण-देणा रै बारै दी मेरी मज़द की आ।

¹⁶इणै कौरी ज़ेबी हाऊं थिस्सलुनीके दी थौ, तैबै भी तुमुऐ मेरी ज़ुरत पुरी कौरना लै कई बारै पैसै भेज़ै थै।

¹⁷हाऊं इणौ नाईं बोलदौ कि हाऊं पैसैऊ री मज़द च़ाहा ऊ, पर हाऊं इणौ फल़ च़ाहा ऊ ज़ो तुमारै फाइदै लै बौड़दै रौआ।

¹⁸मुकै सारौ कुछ़ आ, पर भौरी का भी आ। ज़ो च़िज़ै तुमुऐ इपफ्रुदीतुसा रै हाथा कु भेज़ी थी तिऊं नीईंयौ हाऊं डौटी गो ऊ, सै च़िज़ै ता सुखवाल़ी खुशबु ज़िणी, और अपणाउणै रै लायक बौल़ी ई, ज़ो याजक परमेश्‍वरा कै च़ौड़ावा ई, ज़ास परमेश्‍वर अपणावा आ और खुश हुआ आ।

¹⁹मैरौ परमेश्‍वर भी आपणै तेस धना रै मुताबिक ज़ो महिमा समेत मसीह यीशु दी आ, तुमारी हर एक ज़ुरत पुरी कौरा आ।

²⁰आमारौ परमेश्‍वर और बाबा री महिमा जुगा-जुगा झ़ांऊ औन्दी रौआ। आमीन।

²¹यीशु मसीह रै सारै परमेश्‍वरा रै पवित्र लोगु लै मेरी तौरफा कु ढाल कौरौ। ज़ेज़ै विश्वासी भाई मुं आइलै ई, तुमुलै ढाल कौरा ई।

²²सौभी परमेश्‍वरा रै पवित्र लोग ज़ो इदै ई, खास कौरीऐ ज़ो कैसर राज़ै रै घौरा रै विश्वासी ई, तुमुलै ढाल कौरा ई।

²³आमारै प्रभु यीशु मसीह री बौड़ी दया तुमु आइलै सौदा रौआ। आमीन।