Read Pahari, Mahasu कुलु 1 Bible Online

कुलु 1 - Pahari, Mahasu bible

कुलु 1

¹हाऊं पौलुस ज़ुण परमेश्‍वरा री मौरज़ी कु यीशु मसीह रौ प्रेरित ऊ, और विश्वासी भाई तीमुथियुसा री तौरफा कु तुमुलै इऐं चिट्ठी लिखाऊ।

²मसीह दी तिऊं पवित्र और सौच़्च़ै विश्वासी भाईऊ लै लिखाऊ ज़ुण कुलुस्‍सै शैहरा दी रौआ ई। आमारै बाबा परमेश्‍वरा री तौरफा कु तुमुलै बौड़ी दया और शान्ति मिलदी थाका लागी।

³ज़ेबी आमै तुमुलै प्राथना कौरी ई, आमै प्रभु यीशु मसीह रै बाबा परमेश्‍वरा रौ धन्यबाद कौरी ई.

⁴कैलैकि आमुऐ शुणौ आ कि यीशु मसीह माथै तुमारौ विश्वास आ, और सौभी परमेश्‍वरा रै लोगु कु प्यार छ़ाड़ाई।

⁵तुमै एस एथीलै कौरा ई कैलैकि विश्वास और प्यारा री बुनियाद सै आश आ ज़ो तुमुलै सौरगा दी आ छ़ाड़ी औन्दी, ज़ेथरै बारै दी तुमुऐ तेस खुशी री खौबरी रै सौच़्च़ै वचना दी शुणी ऐरौ आ,

⁶ज़ो तुमु काऐ पौउंच़ौ आ। इयौ परचार लोगुऐ तुमुकै शुणाऔ आ तिणी ई लोगुऐ कई देशा दी शुणाऔ आ। तेस वचना कौरी भौरी लोगु री ज़िन्दगी बौदल़ुई गोई ज़िणी तुमारी ज़िन्दगी बौदल़ुई आ। तुमुऐ परमेश्‍वरा री बौड़ी दया री सौच़्च़ाई रवाई आ।

⁷तेसी री शिक्षा तुमुऐ आमारै आच़्छ़ै गोश्टण इपफ्रास कु पाई, ज़ो आमु आइलै मसीह रौ विश्वास वाल़ौ सेवक आ।

⁸तिणीऐ तुमारै प्यारा लै ज़ो आत्मा दी आ आमु माथै पौगड़ौ कियौ।

⁹एथीलै ज़ेज़ै दिना कु इणौ शुणौ सा, ता आमै भी तुमुलै सौदा प्राथना कौरी ई, कि परमेश्‍वरा री आत्मा तुमुलै औकल और सौमझ़ दिया ताकी तुमै तेसरी इच़्छ़ा आच़्छ़ा कौरी सौमझ़ा,

¹⁰ताकी तुमारौ बरताव कौरी प्रभु लै इज़्ज़त मिला, और परमेश्‍वर तुमारी हर बुशा कु खुश हुआ, कि तुमै सारै रौंगा रै भौलै काम कौरदै थाका लागी, और परमेश्‍वरा री पैहच़ाणा दी बौड़दै रौऔ।

¹¹हाऊं प्राथना कौराऊ कि परमेश्‍वरा री महिमा री शक्ति कौरी सौभी रौंगा री शक्ति कु तागती वाल़ै औन्दै रौऔ, इदरा झ़ांऊ कि तुमै खुशी और सौबरा आइलै आपणै दु:ख सहन कौरी बौल़ा।

¹²तुमै बाब परमेश्‍वरा रौ धन्यबाद कौरदै रौऔ, ज़ुणिऐ आमै एस लायक चाणै कि प्याशै दी परमेश्‍वरा रै लोगु आइलै ज़ायदादा दी हिस्सैदार रौऔ।

¹³कैलैकि परमेश्‍वरै ई आमै शैताना री तागती कु छ़ुड़ाइयौ आपणै आच़्छ़ै छ़ोहरु रै राज़्य दी आणै ई।

¹⁴आमुलै तेथी रै ज़ौरिऐ आमुलै छ़ुटकारौ मतलब पापा री माफी मिला सा।

¹⁵मसीह ता नाईं दिशणै वाल़ौ परमेश्‍वरा रौ ज़िणौ रूप और सारी धौतरी दी सारेऊ कु ज़ेठौ और बौड़ौ परधान आ।

¹⁶कैलैकि तिणीऐ सारी च़िज़ै चाणी, च़ाऐ सै सौरगा री आ च़ाऐ सै धौतरी री, च़ाऐ सै दिशणै वाल़ी ई च़ाऐ नाईं दिशणै वाल़ी ई, का राज़गद्दी, का राज़, का राज़ कौरणै वाल़ै, का हक्क, सारी च़िज़ै तेसरै ज़ौरिऐ और तेसी री सेवा लै ई चाणी औन्दी।

¹⁷मसीह सौभी च़िज़ेऊ बौणनै कु पैहलै मौज़ूद थौ, और सारी च़िज़ै तेसी री मौरज़ी कौरी काम कौरा ई।

¹⁸मसीह कलिसिया री अगुवाई कौरा आ, ज़िणौ आदमी रौ मूंड आदमी रै शरीरा री अगुवाई कौरा। सेऊ सौभी कु पैहलौ आ और मौरै औन्दै मांझ़िऊ कु ज़िउंदौ हुणै वाल़ौ दी भी सौभी कु पैहलौ आ कि सौभी बुशै दी सेऊ ई बौड़ौ परधान हुआ।

¹⁹कैलैकि बाब परमेश्‍वरा री खुशी एथीई दी आ कि परमेश्‍वरा रौ गुण मसीह दी वास कौरा।

²⁰परमेश्‍वरै आपणौ छ़ोहरु भेज़णै रै बारै दी सुंच़ौ ज़ुणिऐ आपणौ लोऊ बहाऔ और क्रुसा माथै मौरौ। परमेश्‍वरै एथीलै कियौ ताकी तेसरै और सौभी च़िज़ेऊ मांझ़िऐ मेल-ज़ोल औआ। इणै कौरी तिणीऐ आपणै और तिऊं सारी च़िज़ेऊ मांझ़िऐ शान्ति चाणी च़ाऐ सै धौतरी माथै री ई, च़ाऐ सै सौरगा माथै री आ।

²¹तुमै ज़ुण पैहलै परमेश्‍वरा कु दूर थै और बुरै कामा री वज़ाह कु ज़िवा कु दुश्मन थै।

²²पर आबै परमेश्‍वरै मसीह रै मौउता रै ज़ौरिऐ तुमु आइलै भी मेल-ज़ोल कौरी ऐरौ ताकी तुमु आपु काऐ पवित्र और बेदाग और बेकसूर चाणियौ खौड़ौ कौरा।

²³अगर तुमै मसीही रै विश्वासा री पौई दी मज़बूत बौणी रौआ, और तेस खुशी री खौबरी री आश ज़ो तुमुऐ शुणौ आ नाईं छ़ाड़ा, ज़ासरौ परचार दुनिया रै सारै लोगु मांझ़िऐ कियौ आ। और हाऊं पौलुस, खुश खौबरी शुणाउणै रौ सेवक बौणौ।

²⁴आबै हाऊं तिऊं दुखा री वज़ाह कु खुशी मौनावा ऊ, ज़ो तुमुलै उठावा ऊ, और मसीहा रै दुखा री कामी तेसरै शरीरा लै, मतलब कलिसिया कालै, आपणै शरीरा दी पुरौ कौराऊ।

²⁵परमेश्‍वरै हाऊं एथीलै च़ुनौ कि तेसरी वचना रौ आच़्छ़ा कौरी परचार कौरु और तेसरी वज़ाह कु, हाऊं कलिसिया रौ सेवक बौणौ।

²⁶मतलब तेस भेदा रौ ज़ो जुग और पोसता कु छ़ुपी रौऔ, पर आबै परमेश्‍वरा रै तिऊं लोगु माथै पौगड़ौ हुऔ।

²⁷परमेश्‍वरै इणौ फैसलौ कियौ कि तेसरै लोग एस शानदार और महिमा वाल़ौ राज़ ज़ाणी बौल़ा ज़ो सारै लोगु लै तेसकै आ। इयौ राज़ मसीह आपु आ ज़ो तुमु सारेऊ लोगु मांझ़िऐरौआ आ, सिरफ सेऊ आमारी महिमा लै आमारी आश आ।

²⁸आमै मसीह रौ परचार कौरीयौ हर एक आदमी लै परमेश्‍वरा री देई ऐन्दी बुद्धी कौरी शिक्षा देइयौ खौबरदार कौरी ताकी आमै इणौ देखुलै कि हर एक विश्वासी परमेश्‍वरा काऐ खौड़ी हुणा लै पाकौ हुआ।

²⁹एथीलै हाऊं तिंया शक्ति रै ज़ौरिऐ तना-मौना कौरी मैहनत कौराऊ ज़ो मुलै मसीह कु मिला आ, और सेऊ मुंदी काम कौरा आ।