Read Pahari, Mahasu कुलु 3 Bible Online

कुलु 3 - Pahari, Mahasu bible

कुलु 3

¹तुमै मसीह आइलै मौरै औन्दै मांझ़िया कु ज़िउंदै हुऐ, ता ज़ो परमेश्‍वरै तुमुलै सौरगा दी आ छ़ाड़ौ औन्दौ तिउंरी आश छ़ाड़ौ, ज़िऐ मसीह आज़ भी आ और परमेश्‍वरा री सुल़टी बियै बोशौ औन्दौ आ।

²धौतरी माथै री नाईं पर सौरगा री च़िज़ेऊ माथै आश छ़ाड़ौ,

³कैलैकि तुमै ता आपणै पाप वाल़ै च़ाल-च़लणा लै मौरी गौऐ, और तुमारी ज़िन्दगी मसीह आइलै परमेश्‍वर दी छ़िपी गोई आ।

⁴मसीह ज़ुण आमुलै नौईं ज़िन्दगी दिया आ, ज़ेबी सेऊ धौतरी माथै वापिस आशा आ, तैबै तुमै भी तेस आइलै दिशणै ई और तेसरी महिमा रै हिस्सेदार हुणै ई।

⁵एथीलै तुमै तिऊं बुरै काम कौरणै पोरु छ़ाड़ौ ज़ो तुमारै पाप वाल़ै च़ाल-च़लणा दी ज़ुड़ै औन्दै, ज़ो धौतरी माथै ई, मतलब गान्दै काम, अशुद्धता, दुष्टवाल़ै काम, बुरी लालसा। और लाल़च़ी ना बौणौ ज़ो मूर्ती पुज़णै रै बराबर आ।

⁶कैलैकि लोग इणै बुरै काम कौरा ई, एथीलै परमेश्‍वर तिउलै कठिण सौज़ा दिया आ।

⁷और तुमै भी, ज़ैबै इऊं बुराई दी ज़िन्दगी बितावा थै, ता इणौ कौरा थै।

⁸पर आबै तुमै भी इऊं सौभी रै मतलब, रोश, भौरी रोश, बैर भाव, बुराई, और गाल़ी भौकणौ इऐ सौभी बुशै पोरु छ़ाड़ौ।

⁹एकी दुजै आइलै झ़ूठ नाईं बोलौ कैलैकि तुमुऐ आपणौ पुराणौ पाप वाल़ौ च़ाल-च़लण और सारै बुरै काम पोरु छ़ाड़ी गौऐ,

¹⁰और आबै तुमुऐ नौंवौ बरताव अपणाई गौ आ इयौ आपणै चाणनै वाल़ै ज़िणौ बौणदै रौआ और तेस आच़्छ़ै कौरी सौमझ़ा आ।

¹¹एज़ी ताइंऐ तिऊंदी ना ता युनानी रौऔ, ना यहुदी, ना खतना, ना बिण खतना रौ, ना परदेशी, ना स्कूती, ना गुलाम और ना आज़ाद आदमी सिरफ मसीह सारेऊ कु महान आ और सेऊ आमु सौभी दी ज़िवा आ।

¹²एथीलै परमेश्‍वरै तुमै तेसरै पवित्र लोग हुणा लै च़ुनै ई और सेऊ तुमु कु प्यार कौरा आ, तुमै बौड़ी दया, और भौलाई, और निउल़ौपन, और कौउंल़ौपन, और सहनकौरनौ धारण कौरौ।

¹³और अगर कासी रौ कासी माथै आरोप लाइणा रौ कोई कारण, ता एकी दुजै सैहन कौरौ, और एकी दुजै रै गुनाह माफ कौरौ: ज़िणौ प्रभुऐ तुमारै गुनाह माफ कियै ई, तिणी ई तुमै भी कौरौ।

¹⁴और सौभी कु ज़ुरुरी आ कि तुमु दी एकी दुजै लै प्यार हुणौ च़ांई इणै कौरी तुमै आच़्छ़ा कौरी एकजुट रौआ ई।

¹⁵ज़ो शान्ति मसीह दिया आ तिऐं आपणै ज़िवा दी राज़ कौरणै दैऔ कैलैकि तुमै सारै एकी शरीरा रै आंग ई और तुमै सारै एकी दुजै आइलै शान्ति दी रौइणा लै ई औटाऐ औन्दै।

¹⁶मसीहा रै वचन आपणै ज़िवा दी आच़्छ़ा कौरी बौसणै दैऔ। और आच़्छ़ै ज्ञाना आइलै एकी दुजै कै शिखाऔ, और खौबरदार कौरौ, और आपणै-आपणै ज़िवा दी दया आइलै परमेश्‍वरा कालै भजन और स्तुति रै गीत और आत्मा रै गीत गाऔ।

¹⁷और बुशा कौरीऐ कामा कौरी ज़ो कुछ़ भी कौरौ सारौ कुछ़ प्रभु यीशु रै नावां कु कौरौ, और प्रभु यीशु रै ज़ौरिऐ परमेश्‍वर बाबा रौ धन्यबाद कौरौ

¹⁸ओ बोउटीउओ, ज़िणौ प्रभु दी ठीक आ, तिणी ई आपणै-आपणै बोउटै री शुणौ।

¹⁹ओ बोउटेउओ, आपणी-आपणी छ़ेउड़ी कु प्यार छ़ाड़ौ, और तिऊं आइलै निउलै कौरी रौ।

²⁰ओ लोल़ड़ेऊ ओ, सौभी बुशै दी आपणै-आपणै मां-बाबा रौ हुकमा रौ पालन कौरौ, कैलैकि प्रभु एथकु खुश औआ ई,

²¹ओ लोल़डै वाल़ेऊ ओ, आपणै-आपणै लोल़डेऊ तंग नाईं कौरौ, इणौ नाईं च़ांई हुऔ कि तिउंरी हिम्मत चुटा।

²²ओ नुकरुओ, ज़ो धौतरी माथै तुमारै मालिक ई सौभी बुशु दी तिऊंरौ हुकम मानौ, लोगु खुश कौरना लै नाईं, पर सौच़्च़ाई और परमेश्‍वरा रै डौरा कु।

²³और ज़ो कुछ़ तुमै कौरा ई, पुरै ज़िवा कौरी कौरौ, इणौ ज़ाणियौ कि लोगु लै नाईं पर प्रभु कालै कौरा ई।

²⁴कैलैकि तुमै ज़ाणाई कि तुमुलै एथरै बौदल़ै प्रभु कु इनाम मिला आ। तुमै प्रभु मसीहा री सेवा कौरा ई।

²⁵कैलैकि परमेश्‍वर तिउंलै सौज़ा दिया आ ज़ो बुरौ कौरा आ। परमेश्‍वर कासी रौ भेद-भाव नाईं कौरदौ।