Read Pahari, Mahasu कुलु 4 Bible Online

कुलु 4 - Pahari, Mahasu bible

कुलु 4

¹ओ मालिकुओ, आपणै-आपणै नुकरु आइलै फैसलौ और तिऊं आइलै ठीक रौऔ, इणौ सौमझ़ियौ कि सौरगा दी तुमारौ भी एक मालिक आ।

²लगातार प्राथना कौरदै थाकौ लागी, और धन्यबादा आइलै तेसदी खौबरदार रौऔ।

³और एथीई आइलै आमुलै भी प्राथना कौरदै थाकौ लागी, कि परमेश्‍वर आमुलै वचन शुणाउंणा लै मौकौ दिया, कि आमै मसीहा रै तेस भेदा रै बारै दी सौमझ़ाई बौल़ु ज़ेथरी वज़ाह कु हाऊं ज़ेला दी ऊ,

⁴और प्राथना कौरौ कि हाऊं मसीह रौ परचार साफ-साफ और खुलैआम कौरी बौल़ु।

⁵ताकी तुमै बौगत किमती सौमझ़ियौ इणौ देखाऔ कि तुमै विश्वासी ई।

⁶तुमारी बुशै-धाशै सौदा निउलै कौरी और भौलाई री हुणी च़ांई, कि तुमुकै हर आदमी लै आपणै विश्वासा रै बारै दी ठीक-ठीक ज़वाब दैणौ आशा।

⁷प्यारै विश्वासी भाई और विश्वास वाल़ौ सेवक, तुखिकुस, ज़ो प्रभु दी मुं आइलै साथी आ, मेरी सारी बुशै तुमुलै बोलाई।

⁸सेऊ मुंइऐ एथीलै तुमु काऐ भेज़ौ आ, कि तुमुकै आमारी हालती रौ पौतौ च़ांई लागौ और सेऊ तुमारौ विश्वास मज़बूत कौरा।

⁹और तेस आइलै उनेसिमुसा लै भी भेज़ौ आ ज़ो विश्वास वाल़ौ आ और आच़्छ़ौ विश्वासी भाई और सेऊ तुमारै गांवा रौ आ, इऐ तुमुकै इदरा री सारी बुशै बोलाई।

¹⁰अरिस्तर्खुस, ज़ो मुं आइलै ज़ेला दी आ, और मरकुस ज़ो बरनबासा रौ भाई लागा आ (हाऊं ज़ाणाऊ कु मरकुसा रै बारै दी तुमुकै पैहलै ओउलै बोली गौ आ अगर सेऊ तुमु काऐ आशा लौ, ता तेस आइलै आच़्छ़ा कौरी रौइयौ),

¹¹और यीशु ज़ासलै लोग यूस्तुस बोलाई, तुमुलै ढाल कौरा आ। यहुदी विश्वासिऊ मांझ़िया कु सिरफ इऐ चीन आदमी परमेश्‍वरा रै राज़ा कालै मैरै साथी ई ज़ुण मुलै हिम्मत दियाई।

¹²इपफ्रास ज़ो तुमारै गांवा रौ आ और मसीह यीशु रौ सेवक आ, तुमुलै ढाल कौरा आ। और सेऊ सौदा तुमुलै ज़िवा लाइयौ प्राथना कौरा आ, ताकी तुमै पाक्कै हुइयौ पुरै विश्वासा आइलै परमेश्‍वरा री इच़्छ़ा माथै टेकी रौआ।

¹³हाऊं तेसरौ गवाह ऊ कि सेऊ तुमु कालै और लौदीकिया और हियरापुलिसवाल़ैऊ लोगु लै ज़िवा लाइयौ प्राथना कौरा आ।

¹⁴आच़्छ़ौ वैध लुका और देमास तुमुलै ढाल कौरा ई।

¹⁵लौदीकिया शैहरा रै विश्वासी भाईऊ और बौइणिऊ लै और नुमफास और तिऊं रै घौरा री कलिसिया लै ढाल बोलीयौ।

¹⁶और ज़ेबी इऐ चिट्ठी तुमारै काऐ पौड़िया ली, ता इणौ कौरीयौ कि लौदीकिया शैहरा री कलिसिया दी भी च़ांई पौड़ी, और सै चिट्ठी ज़ो लौदीकिया कु आ आशै औन्दी तिऐं तुमै भी पौड़ीयौ।

¹⁷तैबै अरखिप्पुस कु बोलीयौ कि ज़ो सेवा प्रभु दी ताउंलै देई औन्दी आ, तिऐं सेवा आच़्छ़ै कौरी पुरी कौरीयौ।

¹⁸हाऊं पौलुस आपणै हाथा कौरी इऐं चिट्ठी दी तुमुलै ढाल लिखाऊ। याद छ़ाड़ेऊ कि हाऊं ज़ेला दी ऊ और मुलै प्राथना कौरौ। तुमु माथै परमेश्‍वरा री बौड़ी दया थाका औन्दै लागी। आमीन।