Read Pahari, Mahasu 1 थिस्स 2 Bible Online

1 थिस्स 2 - Pahari, Mahasu bible

1 थिस्स 2

¹ओ मैरै प्यारै साथी विश्वासिउओ, तुमै आपु ई ज़ाणाई कि आमारौ तुमु काऐ आशणौ फाइदा रौ काम हुऔ आ,

²ज़िणौ कि तुमै आपु ई ज़ाणाई कि पैहलै फिलिप्पी गांवा दी दु:ख उठाउणै और बुरौ बरताव सहन कौरना माथै भी आमारै परमेश्‍वरै आमुलै एती हिम्मत देई, कि आमै परमेश्‍वरा री खुश-खौबरी तुमारै इलाकै दी भौरी विरोधा मांझ़िऐ भी तुमुकै शुणाई।

³कैलैकि आमारी शिक्षा ना ता धोखै री और ना गलत इरादै री और ना ता ठगबाज़ी री आ।

⁴पर ज़िणौ परमेश्‍वरै आमुकै इणै लायक सौमझ़ियौ खुश-खौबरी सौंभाल़ी आ, आमै तिणी ई परचार कौरी ई, एथीलै आमै लोगु नाईं पर परमेश्‍वर, ज़ुण आमारौ ज़िऊ पौरखा सा खुश कौरी ई।

⁵तुमै ज़ाणाई आमै ना ता केबी हेरा-फेरी वाल़ी बुशै लाई थै, और ना ता आमै तुमु कु मिलणै रौ लोभ-लाल़च़ कौरा थै, एज़ी बुशा रौ परमेश्‍वर गवाह सा।

⁶हालांकी आमै मसीह रै प्रेरित हुणै री वज़ाह कु तुमु माथै भार पाई बौल़ी थै, तैबै भी आमुऐ तुमु कु और कास ओरी कु इज़्ज़तमान नाईं च़ाई थै, और ना तुमु कु, और ना ओरी कासी कु।

⁷पर ज़िणै कौरी मां आपणै लोल़डेऊ री देखभाल़ कौरा सा, तिणौ ई आमुऐ भी तुमु मांझ़िऐ रौइयौ प्यार देखाल़ौ आ।

⁸और तिणी ई आमै तुमारी बौड़ी इच़्छ़ा कौरीयौ ना सिरफ परमेश्‍वरा री खुश-खुशी री खौबरी माथै आपणी ज़ान दैणा लै भी तुमुलै तैयार थै, एथलै कि तुमै आमारै भौरी प्यारै हुई गोऐ थै।

⁹कैलैकि ओ मैरै प्यारै साथी विश्वासिउओ, तुमै आमारी मैहनत और कौष्ट याद छ़ाड़ाई। आमुऐ एथीलै राची-दिनै काम धान्धौ कौरीयौ तुमु मांझ़िऐ परमेश्‍वरा री खुश-खौबरी रौ परचार कियौ आ कि तुमु मांझ़िऐ कासी माथै भी भार ना पौड़ा।

¹⁰तुमै आपु ऊ गवाह ई, और परमेश्‍वर भी गवाह आ कि तुमु सारै विश्वासिऊ आइलै आमारौ च़ाल-च़लण किणौ पवित्र, धार्मिक और बेकसूर रौ आ

¹¹तुमै ज़ाणाई कि ज़िणौ बाब आपणै छ़ोहरु आइलै बरताव कौरा, तिणी ई आमै भी तुमु मांझ़िऐ हर एकी लै शिक्षा दिया थै, और शान्ति दिया थै, और सौमझ़ाई थै

¹²ताकी तुमारै च़ाल-च़लणा कौरी परमेश्‍वरा लै इज़्ज़त मिला, ज़ुण तुमु आपणै राज़ा दी और महिमा दी औटावा सा।

¹³एथीलै आमै भी परमेश्‍वरा रौ धन्यबाद सौदा कौरी कि ज़ैबै आमारै ज़ौरिऐ परमेश्‍वरा री खुश-खौबरी तुमुऐ शुणी, तुमुऐ सेऊ लोगु रौ नाईं बल्कि परमेश्‍वरा रौ वचन सौमझ़ियौ मानौ आ, ज़ो खौबर सौच़्च़ी परमेश्‍वरा री तौरफा कु आ। और सेऊ आपणै वचना रै ज़ौरिऐ, तुमारी ज़िन्दगी दी, काम कौरा सा, कैलैकि तुमै मसीह माथै विश्वास कौरा ई,।

¹⁴एथीलै तुमै, ओ मैरै प्यारै साथी विश्वासिउओ, परमेश्‍वरा री तिऊं कलिसियाऊ री ज़िणी च़ाल-च़ालदै लागौ और इऊं यहुदिया दी मसीह यीशु दी आ, कैलैकि तुमुऐ भी आपणै लोगु कु तिणौ दु:ख झ़ेलौ थौ।

¹⁵ज़ुणिऐ प्रभु यीशु और भविष्यवक्ता भी झ़ांगै और आमै भी सताऐ, और परमेश्‍वर तिऊंकु खुश नाईं, और सै सारै आदमी रौ विरोध कौरा ई,

¹⁶और सै दुज़ी ज़ाती कु तिंउरै छ़ुटकारै लै बुशै लाइणै कु आमु रोका ई। इणै कौरी सै सौदा आपणै पापा रौ घौड़ौ भौरदै थाका ई लागी। और आबै आखरी दी परमेश्‍वर तिउंलै ज़रूर सौज़ा दैणै वाल़ौ आ।

¹⁷ओ मैरै प्यारै साथी विश्वासिउओ, ज़ैबै आमै थोड़ै बौगता लै, तुमु आइलै नाईं थै पर आमै रोज़ तुमारै बारै दी सुंच़ा थै, ता आमुऐ बौड़ी च़ाहा कौरी तुमु कु मिलणा लै ओर भी भौरी कोशिश की।

¹⁸एथीलै आमुऐ, खास कौरी मुंई पौलुसै, एकी बारै नाईं बल्कि कई बारै तुमु काऐ आशणौ च़ाऔ, पर शैतानै आमै तुमु काऐ दुबारौ आशणै नाईं दै।

¹⁹आमारी आशा या बौड़ी खुशी या बौड़ाई रौ मुकुट कुण आ? का आमारै प्रभु यीशु रै आशणा रै बौगता दी तेसरै सामनै तुमै नाईं औन्दै?

²⁰आमारी बौड़ाई और बौड़ी खुशी तुमै ऐ ई।