Read Pahari, Mahasu 1 थिस्स 3 Bible Online

1 थिस्स 3 - Pahari, Mahasu bible

1 थिस्स 3

¹एथीलै ज़ैबै आमुकै रौउऔ नाईं ता आमुऐ इणौ सुंच़ौ कि एथेंस शैहरा दी एखुली रौउलै,

²और आमुऐ तीमुथियुस, ज़ो मसीहा री खुश-खौबरी दी आमारौ भाई और परमेश्‍वरा रौ सेवक आ, एथीलै तुमु काऐ भेज़ौ कि तुमु विश्वासा दी मज़बूत कौरा, ताकी तुमारौ विश्वास यीशु मसीह दी लगातार बौणी रौआ,

³कि कोई भी इऊं मुसीबता री वज़ाह कु यीशु मसीह माथै विश्वास कौरणौ ना च़ांई छ़ाड़ौ। कैलैकि तुमै आपु ज़ाणाई कि आमु सारेउऐ इणी मुसीबत झ़ेलणी जा ई।

⁴कैलैकि पैहलै, ज़ेबी आमै तुमारै काऐ थै ता तुमुलै बोला थै कि आमु मुसीबत जा ई झ़ेलणी, और इणौ ई हुऔ, ज़िणौ कि तुमै ज़ाणा भी ई।

⁵एज़ै कारणै ज़ैबै मुकै तौंइऐ रौउऔ नाईं, ता तुमारै विश्वासा रै हाल ज़ाणना लै मुइंऐ तीमुथियुस भेज़ौ, कि इणौ ना च़ांई हुऔ कि परखणै वाल़ै शैतानै तुमै पौरखै औलै, और आमारी मैहनत बेकार हुआ।

⁶पर इबी तीमुथियुसै ज़ो तुमारै काऐ कु आमु काऐ आशौ आ, तुमारै विश्वासा री और प्यारा री खुश-खौबरी शुणाई और एज़ी बूश भी शुणाई कि तुमै सौदा प्यारा आइलै आमु याद कौरा ई, और आमु देखणा री आश छ़ाड़ाई, ज़िणौ कि आमै भी तुमु देखणा री आश छ़ाड़ी ई।

⁷और एथीलै ओ मैरै प्यारै साथी विश्वासिउओ, आमुऐ आपणै सारै दु:ख और मुसीबता दी तुमारै मज़बूत विश्वासा रै बारै दी ज़ो यीशु माथै आ शुणियौ भौरी खुशी पाई।

⁸कैलैकि आबै अगर तुमै प्रभु दी टेकी रौआ लै ता आमारौ हौसलौ बौड़ा आ।

⁹और ज़िणी खुशी आमुकै तुमु कु ज़ुण आपणै परमेश्‍वरा रै सामनै आ, तेथरै बौदल़ै आमै तुमारै बारै दी किणी रीती कौरी परमेश्‍वरा रौ धन्यबाद कौरुलै?

¹⁰आमै राची-दिनै तुमुलै भौरी प्राथना कौरी ई कि तुमु कु तौंइऐ मिलु लै और तुमारै विश्वासा री कामी पुरी कौरी।

¹¹आमै प्राथना कौरी की आमारौ बाब परमेश्‍वर और आमारौ प्रभु यीशु मसीह तुमु काऐ आशणै दी आमारी मज़द और अगुवाई कौरा।

¹²और प्रभु इणौ कौरा कि ज़िणौ आमै तुमु आइलै प्यार कौरी सी, तिणौ ई तुमारौ प्यार भी आपु मांझ़िऐ और सारेऊ लोगु आइलै बौड़ा, और तरक्की कौरदै थाका लागी,

¹³ताकी सेऊ तुमारौ मन इणौ टेकावा कि ज़ेबी आमारौ प्रभु यीशु आपणै सारै पवित्र लोगु आइलै दुजी बारै वापिस आशा और तुमै आमारै परमेश्‍वर और बाबा रै सामनै पवित्रता दी बेकसूर बौणा।