Read Pahari, Mahasu 1 थिस्स 5 Bible Online

1 थिस्स 5 - Pahari, Mahasu bible

1 थिस्स 5

¹पर ओ मैरै प्यारै साथी विश्वासिउओ, एथरी कोई ज़ुरत नाईं, कि प्रभु यीशु रै वापिस आशणै रै बौगत और तारीखा रै बारै दी तुमुलै कुछ़ लिखुलै।

²कैलैकि तुमै आपु ई ठीक ज़ाणाई कि ज़िणौ राची च़ोर आशा सा, तिणौ ई प्रभु यीशु रौ आशणौ भी हुणौ आ।

³ज़ेबी लोग बोलदै औलै लागै औन्दै कि “आमै ठीक ई, और कुछ़ भी डौर नाईं आसतौ,” ता तिऊं माथै एकी ई घौड़ी विनाश आशा सा, ज़िणी गौरकड़ी छ़ेउड़ी दी बेदण, और सै तिऊं बौड़ी मुसीबता कु केज़ी भी रीती कौरी नाईं बौच़णै।

⁴पर प्यारै साथी विश्वासिउओ, तुमै न्यारै दी नाईं आसतै, कि सेज़ौ दीन तुमु माथै च़ोरा ज़िणौ आशा लौ।

⁵कैलैकि तुमै प्याशै री, और दुसा री सन्तान ई, आमै ना ता राची रै और ना न्यारै री सन्तान ई।

⁶एथीलै आमै अविश्वासिऊ बाशीऐ सुती ना थाका, पर उज़ीई ई और खौबरदार रौएऊ।

⁷कैलैकि ज़ुण सुता ई, सै राची ई सुता ई, और ज़ुण शराब पिणै वाल़ै हुआई, सै राची ई माच़ा ई।

⁸पर आमै ता दिना रै ई, विश्वास और प्यारा रौ रक्षा रौ कवच भिड़ीयौ और छ़ुटकारै री आशा रौ टोपौ भिड़ीयौ खौबरदार रौऔ।

⁹कैलैकि परमेश्‍वरै आमै रोशा कौरी सौज़ा दैणा लै नाईं, बल्कि एथलै ई छ़ांटै औन्दै कि आमै आपणै प्रभु यीशु मसीह कु छ़ुटकारौ पाई लै।

¹⁰सेऊ आमुलै एथीलै मौरौ, कि आमै च़ाऊ ज़िउंदै औलै, च़ाऊ मौरुलै, ता आमै सौदा तेसी आइलै ज़िवी ज़ेबी प्रभु यीशु वापिस आशा लौ।

¹¹एज़ै कारणै एकी दुजै लै हौसलौ दैऔ, और एकी दुजै री प्रभु यीशु रै विश्वासा री मज़बुती दी मज़द कौरौ, पर आच़्छ़ौ आ कि तुमै इणौ भी कौरदै थाका ई लागी।

¹²ओ मैरै प्यारै साथी विश्वासिउओ, आमै तुमु कु औरज़ कौरी ई, कि ज़ेज़ै तुमु मांझ़िऐ मैहनत कौरा ई, और प्रभु दी तुमारै अगुवै ई, और तुमुलै शिक्षा दिआई, तिउंरी इज़्ज़त कौरौ और मानौ।

¹³और तिंउरै कामा री वज़ाह कु प्यारा आइलै तिऊं भौरी इज़्ज़ता रै लायक सौमझ़ौ आपु मांझ़िऐ मिली-ज़ुलियौ रौऔ।

¹⁴और ओ मैरै प्यारै साथी विश्वासिउओ, आमै तुमु सौमझ़ाई ई, कि ज़ुण आल़सी बौणी गौऐ, तिऊं खौबरदार कौरौ, कायरु लै हिम्मत दैऔ, ज़ुण विश्वासा दी कमज़ोर ई तिऊं सौम्भाल़ौ, सारेऊ आइलै सौबर छ़ाड़ौ।

¹⁵खौबरदार रौऔ! कोई भी कास आइलै बुराई रै बौदल़ै बुराई ना कौरालौ, पर सौदा भौलाई कौरना लै त्यार रौआ, और आपु मांझ़िऐ सौभी आइलै सौदा भौलाई री कोशिश कौरौ।

¹⁶सौदा भौरी खुश रौऔ।

¹⁷हर बुशा दी प्राथना दी थाकौ लागी।

¹⁸सारी बुशु दी धन्यबाद कौरौ कैलैकि तुमुलै मसीह यीशु दी परमेश्‍वरा री एज़ी ई मौरज़ी आ।

¹⁹पवित्र आत्मा रै काम लोगु री ज़िन्दगी दी हुणै कु नाईं रोकौ।

²⁰ज़ो भविष्यवाणी पौगड़ी हुई तिऊं तुमै बेकार ना ज़ाणौ

²¹सारी बुशै पौरखौ, ज़ो बूश आच़्छ़ी आ तिऊं अपणाऔ

²²हर रौंगा री बुराई कु बौच़ी थाकौ।

²³शान्ति रौ परमेश्‍वर आपु ई तुमु पुरी रीती कौरी पवित्र कौरा सा। और तुमारी आत्मा, प्राण और शरीर आमारै प्रभु यीशु मसीहा रै वापिस आशणै झ़ांऊ पुरै-पुरै और बेकसूर और सौंभाल़ी छ़ाड़ा।

²⁴ज़ुणिऐ तुमै औटाएई सेऊ एस पुरौ भी कौरा कैलैकि सेऊ विश्वास वाल़ौ आ

²⁵ओ मैरै प्यारै साथी विश्वासिउओ, आमुलै प्राथना कौरौ।

²⁶सारै विश्वासिऊ आइलै पवित्र ज़िवा कौरी गौल़ै मिलियौ ढाल कौरौ।

²⁷हाऊं तुमुलै प्रभु रौ हुकम दिआऊ, कि इऐं चिट्ठी सारै विश्वासी भाईऊ कै पौढ़ीयौ शुणाएऊ।

²⁸आमारै प्रभु यीशु मसीह री बौड़ी दया तुमु माथै औन्दै थाकाली लागी।