Read Pahari, Mahasu 2 थिस्स 1 Bible Online

2 थिस्स 1 - Pahari, Mahasu bible

2 थिस्स 1

¹इऐ चिट्ठी पौलुस और सिलवानुस और तीमुथियुसा री तौरफा कु आ। आमै इऐं चिट्ठी थिस्सलुनीकियों शहरा री कलिसिया लै लिखी ई, ज़ो बाब परमेश्‍वर और प्रभु यीशु मसीहा दी ई।

²आमारै बाब परमेश्‍वर और प्रभु यीशु मसीहा री तौरफा कु तुमुलै बौड़ी दया और शान्ति मिलदै थाका लागी।

³ओ मैरै प्यारै साथी विश्वासिउओ तुमारै बारै दी आमु सौदा परमेश्‍वरा रौ धन्यबाद च़ांई कौरणौ, और इणौ कौरणौ ठीक भी आ, एथीलै कि यीशु मसीह दी तुमारौ विश्वास भौरी आ लागौ औन्दौ बौड़दै, और तुमु सारेऊ रौ प्यार भी आपु मांझ़ी भौरी आ लागौ औन्दौ बौड़दै।

⁴एथीलै आमै परमेश्‍वरा री कलिसिया रै विश्वासिऊ मांझ़िऐ तुमारै बारै दी घमण्ड कौरी ई कि ज़ेती ज़ोखिम और मुसीबत तुमै सहन कौरा ई, तिऊं सौभी दी तुमारौ सबर और विश्वास पौगड़ौ हुआ सा।

⁵इऐ सारै परमेश्‍वरा रै सौच़्च़ै फैसलै रौ साफ सबूत आ कि तुमै परमेश्‍वरा रै राज़ा रै लायक बौणा, ज़ेथरी ताइंऐ तुमै दु:ख भी उठावा ई।

⁶कैलैकि परमेश्‍वर सौदा सौच़्च़ौ फैसलौ कौरा आ, और सेऊ तिउंलै भी दु:ख दिआ, ज़ुणिऐ तुमुलै दु:ख दैऔ आ,

⁷और सेऊ तुमुलै आराम दिया आ ज़ो तुमै इबी दु:ख ई सहन कौरदै लागै औन्दै, और आमुलै भी दिआ आ। इणौ तेबी हुणौ आ ज़ेबी प्रभु यीशु आपणै शक्तिशाल़ी दूता आइलै, धधकती ऐन्दी आगी आइलै सौरगा कु आशा लौ।

⁸और ज़ो परमेश्‍वर नाईं ज़ाणदै-प्राणदै और आमारै प्रभु यीशु मसीह री खुशी री खौबर नाईं मानदै तिउंलै सेऊ सौज़ा दिया सा।

⁹सै प्रभु रै सामनै कु और तेसरी शक्ति रै तेज़ा कु दूर हुइयौ सौदा लै विनाशा रौ डांड पा ई।

¹⁰एऊ सेज़ै दिनै हुणौ सा, ज़ेबी प्रभु यीशु आपणै लोगु दी महिमा पाइंदै और सारै विश्वास कौरणै वाल़ेऊ दी हैरानी री वज़ाह हुणा लै आशा लौ। तुमै भी तेथदी शामिल ई कैलैकि तुमुऐ आमारी गवाही माथै विश्वास कियौ सा।

¹¹एथीलै आमै सौदा तुमुलै प्राथना भी कौरी ई कि आमारौ परमेश्‍वर तुमु इऐं बुलाहटा रै लायक सौमझ़ा, और सेऊ तुमारी हर भौली इच़्छ़ा शक्ति कौरी पुरौ कौरा और हर सेज़ौ काम पुरौ कौरा ज़ेज़ौ तुमारै विश्वासा रौ नौतिज़ौ आ।

¹²इणै कौरी आमारै प्रभु यीशु मसीह रै नावां लै तुमारै ज़ौरिऐ बौड़ाई मिला सा। और तुमुलै तेसरै ज़ौरिऐ इज़्ज़त मिला सा। इयौ सब कुछ़ आमारै परमेश्‍वर और यीशु मसीह री बौड़ी दया कौरी हुआ सा।