Read Pahari, Mahasu 2 थिस्स 2 Bible Online

2 थिस्स 2 - Pahari, Mahasu bible

2 थिस्स 2

¹ओ मैरै प्यारै साथी विश्वासिउओ, आबै हाऊं तुमुलै आमारै प्रभु यीशु मसीह रै आशणै, और तेस काऐ आपणै कौठै हुणै रै बारै दी लिखणौ च़ाहा ऊ।

²तुमै आपणै मौना दी फेटी ई दु:खी ना हुएऊ और डौरेऊ नाईं, अगर तुमै इणौ शुणा लै कि प्रभु यीशु मसीह रौ दीन आशी गौ आ। कुण आपणी भविष्यवाणी दी, आपणी शिक्षा दी, आपणी चिट्ठी दी इणौ बोलालौ मानौ कि ज़िणौ आमुऐ बोलौ आ।

³इऊं गलत बुशु माथै बिल्कुल भी विश्वास नाईं कौरणौ ज़ो लोग तुमुकै एथरै बारै दी बोलाई, कैलैकि प्रभु यीशु मसीह रै वापिस आशणै कु पैहलै एक बौगत हुणौ आ ज़ेबी भौरी लोग परमेश्‍वरा रौ विरोध कौरा ई। अधर्मी आदमी पौगड़ौ हुणौ आ सेऊ एज़ौ आ ज़ासरौ नाश हुणौ ज़ुरुरी आ।

⁴सेऊ आपुलै बौड़ौ बौणा सा और हर च़िज़ा री बेइज़्ज़ती कौरा सा ज़ास लोग पुज़ा ई। इदरा झ़ांऊ कि सेऊ परमेश्‍वरा रै घौरा दी बोशियौ आपुलै परमेश्‍वर बौणा सा।

⁵का तुमुकै याद नाईं आ कि ज़ेबी हाऊं तुमारै काऐ थौ, ता तुमु आइलै इणी बुशु थाका थौ लाइंदै लागी?

⁶तुमै इणौ भी ज़ाणाई कि सेऊ एज़ै बौगतै कुणिऐ आ आपणै बौशा दी छ़ाड़ौ औन्दौ कि सेऊ आपणै बौगता दी पौगड़ौ हुआ।

⁷कैलैकि इयौ अधर्मी आदमी पैहला कु च़ोरुइयौ काम कौरदै आ लागौ औन्दौ और इयौ तेबी झ़ाऊं च़ोरुई रौआ ई ज़ेबी झ़ाऊं तेस रोकणौ वाल़ौ पोरु ना हटावा लै।

⁸तेबी ई सेऊ अधर्मी आदमी पौगड़ौ हुआ, ज़ास प्रभु यीशु आपणै मुआं कौरी फुकरियौ पोरु झ़ांगा, और आपणै आशणै वाल़ै तेज़ा कौरीऐ तेसरौ छ़ार चाणा।

⁹सेऊ अधर्मी आदमी शैताना री शक्ति कौरी आशा सा। सेऊ सारै रौंगा री झ़ुठी तागत, और च़मतकार और हैरानी वाल़ै काम कौरा ज़ो लोगु इणै सुंच़णै माथै मज़बूर कौरा कि इयौ परमेश्‍वर आ ज़ो इऊं कामु कौरा आ।

¹⁰सेऊ सारै रौंगा रै बुरै काम कौरा और नाश हुणै वाल़ेऊ लै धोखौ दिया आ। कैलैकि तिंउऐ सौच़्च़ाई माथै विश्वास नाईं कियौ ज़ो तिऊं बौच़ाई सौका थी।

¹¹एज़ी वज़ाह कु परमेश्‍वर तिऊं इणी भटकाउणै वाल़ी शक्ति दी पा आ सा कि सै झ़ुठा माथै विश्वास कौरा,

¹²और ज़ेती लोगु कै पाप कौरणौ आच़्छ़ौ लागा सा और ज़ुण सौच़्च़ाई माथै विश्वास नाईं कौरदै सै सारै नाश हुणेई।

¹³ओ मैरै प्यारै साथी विश्वासिउओ, आमारौ इदै तुमुलै परमेश्‍वरा काऐ धन्यबाद दैणौ ठीक आ, तुमै प्रभु रै प्यारै लोग ई, कैलैकि परमेश्‍वरै पैहला कु पवित्र आत्मा रै ज़ौरिऐ पापा कु अलग कौरीयौ मतलब सौच़्च़ाई दी तुमारै विश्वासा री वज़ाह कु छ़ुटकारै लै तुमै च़ुनी गौऐ ई।

¹⁴तिणीऐ तुमै आमारी खुश-खौबरी रै ज़ौरिऐ एथीलै औटाऐ कि तुमै बौच़ी रौआ ताकी तुमै तिऐं महिमा रै हिस्सैदार बौणा ज़ो परमेश्‍वरै आमारै प्रभु यीशु मसीह लै देई आ।

¹⁵एथीलै ओ मैरै प्यारै साथी विश्वासिउओ, टेकी और मज़बूत रौऔ। ज़ो-ज़ो बुशै तुमुऐ च़ाऊ वचना रै ज़ौरिऐ या चिट्ठी रै ज़ौरिऐ आमुकु शिखी ई, तिऊं बुशै तुमै आपणै ज़िवा दी थांबी छ़ाड़ौ।

¹⁶हाऊं प्राथना कौराऊ कि, आमारौ प्रभु यीशु मसीह आपु ई, और आमारौ बाब परमेश्‍वर, ज़ुणिऐ आमु आइलै प्यार कियौ आ और बौड़ी दया कौरी सौदा री शान्ति और आच़्छ़ी आश देई आ,

¹⁷तुमारै मौना दी शान्ति दिआ और तुमु सारै आच़्छ़ै कामा दी और वचना दी मज़बूत कौरा।