Read Pahari, Mahasu 2 थिस्स 3 Bible Online

2 थिस्स 3 - Pahari, Mahasu bible

2 थिस्स 3

¹आखरी दी ओ मैरै प्यारै साथी विश्वासिउओ, आमुलै प्राथना कौरदै थाकौ लागी कि प्रभु रौ वचन इणौ शिगरी सारे दी फौइला और सारी ज़ागाह दी इज़्ज़ता आइलै अपणावा, ज़िणौ तुमु मांझ़िऐ हुऔ आ।

²और इणी प्राथना कौरौ कि परमेश्‍वर आमु बुरै और कौपटी लोगु कु बौच़ावा कैलैकि भौरी लोग एथ माथै विश्वास नाईं कौरदै।

³तुमै प्रभु माथै आच़्छ़ा कौरी विश्वास कौरी सौका ई। सेऊ तुमु मज़बुती कौरी टेकावा सा और तेस दुष्ट आदमी कु बौच़ाई छ़ाड़ा सा।

⁴आमुऐ तुमुकै ज़ो कुछ़ कौरना लै बोलौ आ, तुमै तिणी ई कौरदै लागै औन्दै और कौरदै भी थाका ई लागी।

⁵परमेश्‍वरा रै प्यार और मसीहा रै सबरा री भिलै प्रभु तुमारै मौना री अगुवाई कौरा।

⁶ओ मैरै प्यारै साथी विश्वासिउओ, आमै तुमुलै सेज़ै हक्‍का कौरीऐ हुकम देई ज़ो आमुकै प्रभु यीशु मसीहै दैऔ आ। कि तुमैं हर एक इणै भाई-बौइणी कु अलग रौऔ ज़ुण बुरी च़ाल-च़ाला ई और ज़ो शिक्षा तिणीऐ आमुकु शिखी आ तेथरै मुताबिक नाईं कौरदौ।

⁷कैलैकि तुमै आपु ई ज़ाणाई कि किणी रीती कौरी आमु ज़िणी च़ाल-च़ालणी च़ांई, ज़िणी आमै भी तुमु आइलै आच़्छ़ी च़ाल च़ाली आ।

⁸और कासी री भी रोटी मुफ्ती ऐ नाईं खाई। पर मैहनती और कौष्टा कौरी राच-दीन धान्धौ कौरा थै कि तुमु कासी भी माथै भार ना पौड़ा।

⁹इणौ नाईं कि आमुकै हक्क नाईं, पर एथीलै कि आमै आपु तुमुलै एक आच़्छ़ौ आदमी बौणी कि तुमै आमु ज़िणी च़ाल च़ाला।

¹⁰कैलैकि ज़ेबी आमै तुमारै काऐ थै, तेबी भी इणी हुकम तुमुलै देई थै कि अगर कुण काम कौरणौ नाईं च़ाहा लै ता सेऊ रोटी भी नाईं खा लौ।

¹¹आमै शुणी ई कि कुछ़ लोग तुमु मांझ़िऐ बुरी च़ाल च़ाला ई, और कुछ़ काम नाईं कौरदै, पर दुजेऊ रै कामा दी हाथ पा ई।

¹²इणै लोगु लै आमै सेज़ै हक्‍का कौरी हुकम देई और सौमझ़ाई ज़ो आमुकै प्रभु यीशु मसीह दैऔ आ कि च़ुटुकच़ार कामा कौरीयौ आपणी मैहनता री रोटी खाआ लै।

¹³तुमै ओ मैरै प्यारै साथी विश्वासिउओ, भौलाई कौरणै दी हिम्मत ना छ़ाड़ौ।

¹⁴अगर कुण आमारी इऐं चिट्ठी री खौबर नाईं माना लौ, तेस माथै खास ध्यान छ़ाड़ौ, और तेस आइलै नाईं हाण्डौ, ताकी तेसरी बेइज़्ज़ती हुआ।

¹⁵तैबै भी तेस आइलै आपणै दुश्मना ज़िणौ बरताव नाईं कौरौ, पर भाई ज़ाणियौ तेस सौमझ़ाऔ।

¹⁶हाऊं प्राथना कौराऊ कि प्रभु ज़ो शान्ति रौ मूल़ आ आपु ई तुमुलै सौदा सारै रौंगा री शान्ति दिआ। प्रभु तुमु सौभी आइलै साथा दी रौआ।

¹⁷मुंइऐ किणै बौड़ै-बौड़ै आखरु दी आपणै हाथा कौरी तुमुलै ढाल लिखौ आ। मेरी हर चिट्ठी री पैहच़ाण निशाण एऊ आ। मैरै लिखणै रौ इणौ तरिकौ आ।

¹⁸हाऊं इणी प्राथना कौराऊ कि आमारै प्रभु यीशु मसीहा री बौड़ी दया तुमु सौभी माथै औन्दै थाका लागी।