Read Pahari, Mahasu 1 तीमु 2 Bible Online

1 तीमु 2 - Pahari, Mahasu bible

1 तीमु 2

¹आबै हाऊं सौभी कु पैहलै ताउंकु औरज़ कौराऊ, कि तू सारै लोगु लै प्राथना, औरज़ और निवेदन, धन्यबाद कर।

²राज़ेऊ और सारै बौड़ै अधिकारिऊ लै प्राथना कर, ताकी आमै आराम और च़ैना कौरीऐ सारी भौक्ती और ठीक बरताव कौरी ज़िन्दगी बिताई।

³इणै रौंगा री प्राथना आमारै छ़ुटकारै दैणै वाल़ौ परमेश्‍वरा कै आच़्छ़ौ लागा सा और ढौभा भी आ।

⁴ज़ो इणौ च़ाहा कि सारै लोगु रौ छ़ुटकारौ हुआ, और सै सौच़्च़ाई आच़्छ़ा कौरीऐ प्राणी सौका।

⁵कैलैकि परमेश्‍वर एका सा, और परमेश्‍वर और आदमी रै बिच़ा दी एका बिशटु आ यानी कि यीशु मसीह ज़ुण आदमी बौणीयौ इऐं दुनिया दी आशौ आ।

⁶ज़ुणिऐ आपणी ज़िन्दगी सारै लोगु रै छ़ुटकारै लै किमत्ता रै रुपा दी बौल़ी कौरी एरी आ, और तेसरी मौउता रै ज़ौरिऐ परमेश्‍वरै ठीक बौगता माथै सबूत दैऔ आ कि सेऊ च़ाहा सा कि सारै लोग बौच़ा।

⁷हाऊं सौच़्च़ौ बोलाऊ, और झ़ूठ नाईं बोलदौ कि हाऊं एज़ी वज़ाह कु परचार कौरणै वाल़ौ और प्रेरित और दुजी ज़ातीऊ लै विश्वास और सौच़्च़ाई री शिक्षा दैणै वाल़ौ च़ुनौ ऊ।

⁸हाऊं च़ाहा ऊ कि हर ज़ागाहा दी मौरद बिण रोशै, और बिण झ़ौगडै आपणै पवित्र हाथ उठाइयौ प्राथना थाकौ कौरदै लागी

⁹इणी ई हाऊं च़ाहा ऊ कि छ़ेउड़ीऐ भी आच़्छ़ै ढौंगा कौरी आच़्छ़ै जुड़केऊ भिड़ीयौ खूब च़ांई दिशणी, ना कि दुजेऊ कै देखाउणा लै मुंडा बेलियौ और सुनै चांदी रै ज़ेउरात लाइयौ और किमत्ती जुड़केऊ भिड़ीयौ,

¹⁰पर भौलै कामा कौरीऐ, कैलैकि परमेश्‍वरा री भौक्ती कौरणै वाल़ी छ़ेउड़ी लै इणौ ढौभा आ।

¹¹ज़ेबी दुजै लोग विश्वासिऊ कै ई शिखाउंदै लागै औन्दै तैबै सारी छ़ेउड़ीउऐ च़ुटुकच़ार पुरी अधीनता दी शिखणौ च़ांई।

¹²हाऊं बोलाऊ कि छ़ेउड़ीउऐ मौरदु लै शिक्षा नाईं दैणी च़ांई, और ना मौरदु माथै राज़ कौरा, पर खुम्बल़िऊ दी च़ुटुकच़ार थाकाली।

¹³कैलैकि परमेश्‍वरै पैहलै चाणौ आदम और बासिऐ चाणी हव्वा।

¹⁴और आदम शैताना रै बोलै नाईं बहकाउऔ, पर छ़ेउड़ी रै बहकणा कु पापी बौणी गोई।

¹⁵पर छ़ेउड़ी लोल़डै पैदै कौरणै रै ज़ौरिऐ छ़ुटकारौ पा ई, अगर सै सबरा आइलै, विश्वास और प्यारा दी मज़बूत रौआ ली