Read Pahari, Mahasu 1 तीमु 3 Bible Online

1 तीमु 3 - Pahari, Mahasu bible

1 तीमु 3

¹इऐ बूश सौच़्च़ी आ कि ज़ुण कलिसिया रौ मुख्यौ बौणनौ च़ाहा लौ सेऊ भौलै कामा री इच़्छ़ा कौरा।

²एथीलै इणौ ज़ुरुरी आ कि कलिसिया रौ मुख्यौ बेकसूर और एक ई छ़ेउड़ी रौ बोउटौ, हर हालती दी आपु काबु कौरणै वाल़ौ, शांत च़ाल-च़लण वाल़ौ, इज़्ज़तदार, पाउणै री इज़्ज़त कौरणै वाल़ौ और परमेश्‍वरा रै वचन आच़्छ़ा कौरी शिखाउणै वाल़ौ च़ांई हुणौ।

³सेऊ सुरी पिणै वाल़ौ या पिटिणै वाल़ौ नाईं च़ांई हुणौ, पर कौंउल़ै ज़िवा रौ च़ांई, और ना च़ांई सेऊ झ़ौगड़ै कौरणै वाल़ौ, और ना धन-ज़यदादा रौ लोभी।

⁴सेऊ आपणै टौबरा रौ आच़्छ़ै ढौंगा कौरी देखभाल़ कौरणै वाल़ौ औणौ च़ांई और तिणीऐ आपणै छ़ोटी-छ़ोहरु कै सारी आच़्छ़ी बुशै इज़्ज़ता आइलै शिखाउणी च़ांई।

⁵ज़ैबै कुण आपणै घौरा री देखभाल़ कौरणी नाईं ज़ाणालौ ता सेऊ परमेश्‍वरा री कलिसिया री देखभाल़ किणै कौरीऐ कौरा सा?

⁶तैबै इणौ कि सेऊ अगुवौ नौंवौ विश्वासी नाईं औणौ च़ांई, कैलैकि सेऊ घमण्डी हुई सौका आ और सेऊ शैताना ज़िणी सौज़ा पा सा।

⁷और अविश्वासी लोगु मांझ़िऐ भी तेसरी इज़्ज़त औणी च़ांई ताकी सेऊ बेइज़्ज़त हुइयौ शैताना रै ज़ाल़ा दी ना फौसा।

⁸इणी ई कलिसिया रै सेवक भी इज़्ज़तदार और इम्मानदार औणौ च़ांई, सेऊ सुरी पिणै वाल़ौ और नीच़ कौमाई रौ लोभी ना च़ांई औणौ।

⁹पर तिऊंरौ मन साफ औणौ च़ांई ज़िणौ सै लगातार तिऐं सौच़्च़ी शिक्षा माथै विश्वास कौरा ई ज़ेज़ी परमेश्‍वरै पौगड़ी की आ।

¹⁰ज़ेबी सेवक चुना ई ता सै पैहलै पौरखणै च़ांई, ज़ैबै सौच़्च़ै साबित हुआ लै तैबै सै सेवका रौ काम कौरा।

¹¹इणै तरिकै कौरीऐ सेवकु री छ़ेउड़ीउऐ भी इज़्ज़तदार औणी च़ांई। आरोप लाइणै वाल़ी नाईं च़ांई औणी, पर हर हालती दी आपु काबु कौरणै वाल़ी और सारी बुशेऊ दी विश्वासा रै लायक च़ांई औणी।

¹²सेवक एक ई छ़ेउड़ी रौ बोउटौ च़ांई औणौ, और छ़ोटी-छ़ोहरु और आपणै टौबरा री आच़्छ़ी देखभाल़ कौरणै वाल़ौ औणौ च़ांई।

¹³कैलैकि ज़ुण सेवका रौ काम आच़्छ़ा कौरीऐ कौरी सौका ई, सै लोगु कु इज़्ज़त पा आ ई एथरौ नौतिज़ौ एऊ आ कि सै यीशु मसीह दी आपणै विश्वासा रै बारै दी लोगु कै हिम्मता कौरी बोली सौका ई।

¹⁴हालांकी मुकै आश आ कि हाऊं शिगरी ताऊं काऐ आशाऊ पर इऊं बुशै ताउंलै एथलै लिखाऊ,

¹⁵कि अगर मुकै आशणा लै बेर हुआ ली, ता तू ज़ाणाई कि परमेश्‍वरा रै घौरा दी लोगु रौ बरताव किणौ च़ांई औणौ, ज़ुण ज़िउंदै परमेश्‍वरा री कलिसिया, खांबौ और सौच़्च़ाई री पौई आ।

¹⁶और एथदी कोई शक नाईं कि आमारै विश्वासा दी बौड़ौ भेद आ; मसीह ज़ुण आदमी बौणीयौ आशौ और पवित्र आत्मै बोलौ कि सेऊ सौच़्च़ी परमेश्‍वरा रौ छ़ोहरु थौ, सौरगदूतु ऐ मसीह देखौ और सारै सण्सारा रै लोगु दी तेथरै बारै दी परचार किऔ, सारै सण्सारा रै लोगुऐ तेस माथै विश्वास कियौ आ और परमेश्‍वरै सेऊ सौरगा दी नीं ऐरौ।