Read Pahari, Mahasu 1 तीमु 4 Bible Online

1 तीमु 4 - Pahari, Mahasu bible

1 तीमु 4

¹पवित्र आत्मा साफ तरिकै कौरीऐ बोला सा कि आखरी दीनु दी कुछ़ लोग मसीह री शिक्षा माथै विश्वास कौरणौ पोरु छ़ाड़ियौ बुरी आत्मा री शिक्षा माथै विश्वास कौरा ई और सै तिऊं बहकाउणै वाल़ी बुरी आत्मा अपणावा ई।

²ज़ेज़ै लोग इऐ झ़ुठी शिक्षा दियाई सै कौपटी ई। कैलैकि तिउंरै मन मौरी गौऐ ज़िणै कि एक तातै लोऐ सै ज़ाल़ी गौऐ।

³इणै लोग इणौ शिखावा ई कि शादी कौरणौ और कुछ़ च़िज़ै खाणी गलत ई पर परमेश्‍वरै इयौ खाणौ विश्वासी लोगु लै चाणौ ज़ुण सौच़्च़ी शिक्षा ज़ाणाई कि सै परमेश्‍वरा रौ धन्यबाद कौरीयौ खाआ।

⁴कैलैकि परमेश्‍वरा रै चाणी ऐन्दी हर एक च़ीज़ आच़्छ़ी आ, और आमै सब कुछ़ खाई सौकी ई। पर इणौ कि परमेश्‍वरा रौ धन्यबाद कौरीयौ खाआ।

⁵कैलैकि परमेश्‍वरा रै वचन और प्राथना रै ज़ौरिऐ शुद्ध हुआ सा।

⁶अगर तू विश्वासिऊ कै लगातार इऊं बुशु याद कौरावा लौ और ज़िणौ विश्वास और आच़्छ़ी शिक्षा री बुशा कु ज़ो तू माना ई तैरौ पालन-पोषण कौरा ई ता तू यीशु मसीह रौ आच़्छ़ौ सेवक बौणा लौ।

⁷पर तिऊं बेकार और बणाउटी काअणिऊ कु दूर रौऊ, ज़ेथ कौरी परमेश्‍वरा री इज़्ज़त नाईं औन्दी। बल्कि आपु सारी बुशु दी परमेश्‍वर मानणौ शिख।

⁸कैलैकि शरीरा री कसरता कु कम फाइदौ मिला सा, पर आत्मिक कसरत सारी बुशेऊ लै फाइदै वाल़ी आ, कैलैकि इऐ आदमी रै ज़िउंदै रौइयौ और मौरणै बासिऐ भी मज़द कौरा आ।

⁹इऐ बूश सौच़्च़ी आ और हर तरिकै कौरी मानणै रै लायक आ।

¹⁰आमै मैहनत और कोशिश एथीलै कौरी ई कि आमारी आश तेस ज़िउंदै परमेश्‍वरा माथै आ, ज़ुण सारै लोगु रौ और खास कौरीऐ विश्वासिऊ रौ छ़ुटकारौ दैणै वाल़ौ आ।

¹¹विश्वासी लोगु कै इऊं बुशु री हुकम दै और शिखाउंदै थाक लागी।

¹²कोई भी तेरी ज़वानी नीच़ ना सौमझ़ा लौ। पर वचन, और च़ाल च़लण, और प्यार, और विश्वास, और पवित्रता दी विश्वासिऊ लै औनैणौ बौणा।

¹³ज़ेबी झ़ांऊ हाऊं ना आशु लौ, तेबी झ़ांऊ वचन पौड़णै शिक्षा दैणै दी और शिखाउणै दी थाक लागी।

¹⁴सै वरदान ज़ो भविष्यवाणी रै ज़ौरिऐ स्याणेऊ रै हाथा छ़ाड़दी बारै ताऊं कै मिलौ थौ, सेऊ ताऐं लगातार इस्तेमाल कौरणौ च़ांई।

¹⁵इऊं बुशु कौरदै थाक लागी और इऊं दी आपणौ ध्यान लाई छ़ाड़, ताकी तेरी तरक्की सारै देखी सौका आ।

¹⁶एथरै बारै दी तू खौबरदार रौऊ कि तू किणौ ई ज़िउंदै लागौ औन्दौ और का ई शिखाउंदै लागौ औन्दौ। आपणी इऊं बुशु कौरदै थाक लागी, कैलैकि अगर इणौ कौरदै थाका लौ लागी ता तू आपणौ और आपणै शुणनै वाल़ेऊ रौ भी छ़ुटकारौ कौरा ई।