Read Pahari, Mahasu 1 तीमु 5 Bible Online

1 तीमु 5 - Pahari, Mahasu bible

1 तीमु 5

¹कासी भी स्याणौ नाईं डांट, पर तेस आपणौ बाब ज़ाणियौ, और ज़वान लोगु आपणौ भाई ज़ाणियौ सौमझ़ाऊ।

²स्याणी छ़ेवड़िउ आपणी आमा ज़ाणियौ, और ज़वान छ़ेवड़िउ पुरी पवित्रता आइलै बौइण ज़ाणियौ सौमझ़ाऊ।

³तिऊं विधवा छ़ेउड़ीऊ री इज़्ज़त कर। ज़ासरी देखभाल़ कौरणै वाल़ौ कोई भी नाईं आ।

⁴अगर कास विधवा रै कौई कौनाल़डु आ, ता सै पैहलै आपणै टौबरु री ज़िम्मेबारी पुरी कौरा ज़िणौ एक विश्वासिऐ कौरणौ च़ांई। और इणै कौरणै कु आपणै मां-बाबा रै आच़्छ़ै कामा रौ हक्क पुरौ कौरणौ शिखा, कैलैकि परमेश्‍वरा कै इणी ई आच़्छ़ौ लागा सा।

⁵अगर सौच़्च़ी कुण विधवा सा, और तिंआरौ कोइयौ नाईं आसतौ, और परमेश्‍वरा माथै आश छ़ाड़ा सा, सै राची दिनै विनती और प्राथना दी मौगन रौआ सा।

⁶ज़ो ऐश-आरामा दी पौड़ी गोई आ, सै ज़िउंदी मौरी गोई आ।

⁷इऊं बुशु रौ भी विश्वासिऊ लै हुकम दैंदै थाक लागी, ताकी सै बेकसूर रौआ।

⁸पर अगर कुण आपणै रिश्तैदारु री और आपणै टौबरा री देखभाल़ ना कौरालौ, ता तिणीऐ विश्वास पोरु छ़ाड़ी गौ आ। और अविश्वासी कु भी बुरौ बौणी गौ आ।

⁹तुमै तिऐं विधवा रौ नाऊं दर्ज़ कौरौ ज़ासरी उमर साठ साला कु ज़ादी औआ, और ज़ो एक ई बोउटै री बोउटी औली रौई औन्दी।

¹⁰और आपणै इलाकै दी भौलै कामा दी तिंआरौ नाऊं औलौ, और ज़ुणिऐ आपणै छ़ोटी-छ़ोहरु धाचै-पाल़ै औलै, और पौच़ी-पाउणै री सेवा की औली, और परमेश्‍वरा रै लोगु री दासा ज़िणी सेवा कौरी औली, दुखी लोगु री मज़द की औली, और हर एक भौलै कामा दी मन लाऔ औलौ।

¹¹पर ज़वान विधवा रै नाऊं दर्ज़ ना कौरणी, कैलैकि ज़ैबै तिउंरी शारीरिक इच़्छ़ा बौड़ा सा, ता सै मसीह कु दूर हुइयौ दुजी शादी कौरणी च़ाहा ई,

¹²इणै कौरी सै आरोपी बौणा ई, कैलैकि तिंउऐ कलिसिया आइलै कियौ औन्दौ पैहलौ वायदौ पोरु चोड़ी ऐरौ आ।

¹³एथरै साथा-साथा दी सै घौरा-घौरा दी रीटियौ आल़सी हुणौ शिखाई, और सिरफ आल़सी ई नाईं पर बक बक कौरदै थाका ई लागी, और दुजै रै कामा दी हाथ पा ई और बेढौंगी बुशै बोलाई।

¹⁴एथीलै हाऊं इणौ च़ाहा ऊ कि ज़वान विधवा शादी कौरा, और तिंआरै लोल़डै हुआ और सै घौर-बार सौंभांल़ा और कासी भी दुश्मनु लै बदनाम कौरणै रौ मोकौ ना दिआ।

¹⁵कैलैकि कुछ़ विधवा ता बहकियौ शैताना पिछ़ु हुई गोई आ।

¹⁶अगर कास विश्वासिऊ रै काऐ कुण विधवा औली ता तिंआरै टौबर तिंआरी मज़द कौरा कि कलिसिया माथै भार ना हुआ, ताकी विश्वासी तिऊं विधवा री मज़द कौरा ज़ुण सौच़्च़ी ज़ुरतमंद ई।

¹⁷ज़ो पुराणै स्याणै आच़्छ़ौ प्रबन्ध कौरा ई, खास कौरीऐ वचन शुणाउणा लै और शिखाउणा लै मैहनत कौरा ई ता सै दुगुणै इज़्ज़ती रै लायक च़ांई सौमझ़णै।

¹⁸कैलैकि पवित्रशास्त्रा दी इणौ आ लिखौ औन्दौ, “जोचै औन्दै बौल़दा रौ मुं ना च़ांई बानणौ,” और इणौ भी आ लिखौ औन्दौ कि, “मज़दूर आपणी मज़दुरी रौ हक्कदार आ।”

¹⁹अगर कुण स्याणेऊ रै बिरोधा दी कुण बुशै ला लौ, ता दुई-चीन गवाइऊ रै बिणा तिऊं बुशै सौच़्च़ी ना मानेऊ।

²⁰ज़ो पाप कौरा सा तेस सारेऊ रै सामनै सौमझ़ाऊ, ताकी लोग भी डौरा।

²¹परमेश्‍वर, और मसीह यीशु और चुनै औन्दै सौरगदूतु सामनै ज़ाणियौ, हाऊं ताऊं खौबरदार कौराऊ कि ज़िवा खोलियौ इऊं सारी बुशु मानै, और केज़ौ भी काम कासी पक्षा दी ना कौरै।

²²कासी माथै शिगरी हाथ छ़ाड़ियौ अगुवौ ना चुननी, अगर तू इणौ कौरा ई ता तू भी तेसरै पापा लै ज़िम्मेबार हुआई। पर आपु पवित्र बौणी रौऊ।

²³आशणै वाल़ै बौगता दी पाणी पिणै वाल़ौ ना रौऊ, पर आपणै पेट, और आपु घौड़ी-घौड़ी बिमार हुणै री वज़ाह कु थोड़ौ-थोड़ौ अंगुरा रौ रस भी पिऊ।

²⁴हाऊं बोलाऊ कि कासी भी शिगरी अगुवौ ना छ़ांटणी कैलैकि सै खुलेआम पाप कौरा ई। तिउंरै फैसलै औणै कु पैहलै सै विश्वासिऊ रै सामनै साफ-साफ आरोपी पौगड़ै औआ ई। पर ओरी लोगु रै पाप बासिऐ दिशा ई।

²⁵इणी ई कुछ़ भौलै काम भी पौगड़ौ औआ ई, और ज़ो इणै नाईं औन्दै, सै भी नाईं छ़िपी बौल़दै।