Read Pahari, Mahasu 1 तीमु 6 Bible Online

1 तीमु 6 - Pahari, Mahasu bible

1 तीमु 6

¹ज़ेती विश्वासी लोग गुलामी दी ई जोचुऐ औन्दै, तिंउऐ आपणै-आपणै मालिका लै सारी बुशा दी इज़्ज़त देणी च़ांई, ताकी दुजै लोग परमेश्‍वर और आमारी शिक्षा री बुराई ना कौरा।

²ज़ासरै मालिक विश्वासी ई तिऊं सै विश्वासी औणै री वज़ाह कु नीच़ ना सौमझ़ा बल्कि सै तिउंरी औज़ौ भी आच़्छ़ै ढौंगा कौरी सेवा कौरा, कैलैकि ज़ुण तिउंरै कामा कु फाइदौ उठावा ई सै विश्वासी ई और परमेश्‍वर तिऊंकु कु प्यार कौरा आ। इऊं बुशु री शिक्षा दै और सारेऊ कै एथरौ पालन कौरना लै हौसलौ दै।

³अगर कुण झ़ुठी शिक्षा दिआ आ, और आमारै प्रभु यीशु मसीह री खौरी शिक्षा यानी की परमेश्‍वरा री भौक्ती री शिक्षा कु राज़ी नाईं औन्दौ,

⁴ता सेऊ घमण्डी हुई गौ आ, और सेऊ कुछ़ नाईं ज़ाणदौ। इणै आदमी बैहंसबाज़ी और बेकारा रै आखरु और बुशु माथै झ़ौगड़ौ कौरणौ च़ाहा ई, ज़ेथरौ नौतिज़ौ ज़लन, झ़ौगड़ै, और बेइज़्ज़ती री बुशै और बुरै-बुरै शक,

⁵और एकी-दुजेऊ आइलै खातम ना औणै वाल़ै झ़ौगड़ै ज़ासरी बुद्धी पोरु बिगड़ी गोई आ, और सै सौच़्च़ाई नाईं सौमझ़ी सौकदै, सै सौमझ़ा ई कि परमेश्‍वरा री सेवा कौरणी ई अमीर औणै रौ ज़ौरियौ आ।

⁶पर आमुलै इणौ भौलौ आ, कि आमै तेसी कौरी ज़ेथ कौरी परमेश्‍वर खुश औआ आ। और ज़ो सेऊ आमुलै दिया सा तेथी दी आमुऐ संतुष्ट च़ांई रौउणौ।

⁷कैलैकि आमै ज़ेबी पैदै हुऐ थै ता आमुऐ सण्सारा दी कुछ़ा भी नाईं आणौ थौ और ना कुछ़ मौरणै बासिऐ आमै इऐं दुनिया कु नींई बौल़दै।

⁸अगर आमुकै खाणा लै रोटी और भिड़ना लै जुड़कै आसती आ ता एथीई माथै आमु संतुष्ट च़ांई रौउणौ।

⁹पर ज़ुण सेठ हुणै च़ाहा ई, सै इणै इम्तहाना और फाई और इणी भौरी नुकसान वाल़ी इच़्छ़ा दी जानवरा ज़िणै फौसाई, ज़ो लोगु पोरु बिगाड़ा और पुरी तरिकै कौरी नाश कौरा ई।

¹⁰कैलैकि रुपाई-पैसै रौ लोभ सारी रौंगा री बुराई री ज़ड़ आ, ज़ास पाइणै री कोशिश कौरदै-कौरदै कुछ़ लोग आपणै विश्वासा कु टौल़ियौ आपु कई तरिकै कौरीऐ दुखा दी पाई गौऐ ई।

¹¹पर ओ परमेश्‍वरा रौ ज़ौणौ तीमुथियुस, तू इऊं बुशु कु दूर औऊ, और सौच़्च़ाई, भौक्ती और मसीह माथै विश्वास, लोगु आइलै प्यार, सौबर, और निउल़ैपना रौ पिछ़ौ कर।

¹²ज़िणौ एक आच़्छ़ौ फौज़ी लड़ाई दी लड़ाई कौरणौ केबी ना छ़ाड़दौ तिणी ई तांऐ भी परमेश्‍वरा माथै विश्वासा और तेस पिछ़ु हाण्डणौ केबी ना च़ांई छ़ाडनौ। ताकी तू इनामा रै रुपा दी सौदा री ज़िन्दगी पाई सौका, ज़ेथारी ताइंऐ तू औटाऔ औन्दौ ई ज़ेबी ताऐं भौरी लोगु रै सामनै साफ-साफ बोलौ थौ कि तू मसीह माथै विश्वास कौरा ई।

¹³परमेश्‍वर ज़ुण सारेऊ लै ज़िन्दगी दिया सा और यीशु मसीह भी ज़ुणिऐ पुन्तियुस पिलातुसा रै सामनै आपणै बारै दी सौच़्च़ौ बोलौ थौ, गवाह मानियौ हाऊं ताऊं लै इणौ हुकम दिआऊ,

¹⁴कि तू आमारै प्रभु यीशु मसीह रै धौतरी माथै दुजी बारै आशणै झ़ाऊं, इऊं हुकम बेदाग और बेकसूर कौरी मानै।

¹⁵परमेश्‍वर, सिरफ एका सा राज़ौ ज़ुण बौड़ाई रै लायक आ, और राज़ेऊ रौ राज़ौ और सारै प्रभु रौ प्रभु आ। सेऊ मसीह ठीक बौगता माथै पौगड़ौ कौरा आ।

¹⁶सेऊ सिरफ आ एका सा ज़ुण सौदा लै ज़िउंदौ आ और सेऊ इणै च़मकदार प्याशै दी रौआ सा ज़ेथरै नज़दीक कोई ना आशी सौकदौ, और ना सेऊ केज़ै आदमीऐ केबी देखौ और ना केबी देखी बौल़दौ, तेसरी महिमा और शक्ति जुगा-जुगा झ़ाऊं रौआ सा। आमीन।

¹⁷इऐं धौतरी रै सेठ लोगु लै हुकम दै कि सै घमण्डी ना हुआ, और ना सै खातम औणै वाल़ी ज़यदादा माथै आश छ़ाड़ा, पर परमेश्‍वरा माथै आश छ़ाड़ा ज़ो आमारै सुखा लै सारौ कुछ़ भौरी का दिआ सा।

¹⁸तिउंलै भौरी भौलाई रै काम कौरना लै बोल, कि सै खुलै ज़िवा कौरी दुजेऊ री ज़ुरुता लै दाण दैंदै थाका लागी।

¹⁹अगर सै इणौ कौरा ई ता सै सौरगा दी आपुलै धन-ज़यदाद कौट्ठै कौरा ई ज़ो खातम नाईं औन्दी। और तिउंकै सौच़्च़ी ज़िन्दगी मिला आ ज़ो सौदा लै आ।

²⁰ओ तीमुथियुस ज़ो काम परमेश्‍वरै ताउंकै सांबै ई, तिऊं री च़ोकीदारी कर। बुरी और बेकार बुशेऊ कु और तिऊं शिक्षा कु दूर रौऊ ज़ो परमेश्‍वरा री सौच़्च़ी शिक्षा रौ विरोध कौरा आ, ज़ेथलै सै गलत तरिकै कौरीऐ “ज्ञान” बोलाई।

²¹कुछ़ लोगुऐ एस ज्ञान अपणाउणै री वज़ाह कु सौच़्च़ी शिक्षा मानणी पोरु छ़ाड़ी गोई। हाऊं प्राथना कौराऊ कि परमेश्‍वरा री बौड़ी दया तुमु सारेऊ माथै औआ।