Read Pahari, Mahasu 2 तीमु 1 Bible Online

2 तीमु 1 - Pahari, Mahasu bible

2 तीमु 1

¹हाऊं पौलुस ज़ुण परमेश्‍वरा री मौरज़ी कौरी यीशु मसीह रौ प्रेरित ऊ। और तिऐं सौदा री ज़िन्दगी रै वायदा रै मुताबिक ज़ो यीशु मसीह माथै विश्वास कौरणै रै ज़ौरिऐ मिला सा,

²हाऊं तुमुलै इऐं चिट्ठी तीमुथियुसा रै नावां दी लिखाऊ, ज़ुण मैरै छ़ोहरु ज़िणौ आ। हाऊं प्राथना कौराऊ, कि आमारै बाब परमेश्‍वर और प्रभु यीशु मसीह री तौरफा कु ताउंलै बौड़ी दया और कृपा और शान्ति मिलदै थाका लागी।

³हाऊं राची-दिनै आपणी प्राथना दी तुमु याद कौरीयौ परमेश्‍वरा रौ धन्यबाद दियाऊ ज़ासरी सेवा हाऊं साफ मौना कौरी तिणी कौराऊ ज़िणै मैरै पुराणै स्याणै कौरा थै।

⁴ज़ेबी आमै दुई आपु मांझ़िऐ कु अलग हुऐ थै ता आबै हाऊं तैरौ तेस लेरणौ याद कौरीयौ राच-दीन ताऊं कु मिलणै री इच़्छ़ा कौराऊ कि हाऊं खुशी कौरीऐ भौरीया।

⁵हाऊं तेरी मां यूनीके रौ तेस सौच़्च़ै विश्वास भी याद कौराऊ। और तेरी नानी लोइसा रौ विश्वास भी तिणी थौ, हाऊं एज़ी बुशा दी पाक्कौ ऊ कि सेज़ौ विश्वास ताऊं दी भी आ।

⁶एज़ी वज़ाह कु हाऊं तुमु कु याद कौरावा ऊ कि परमेश्‍वरा रै तेस वरदान तौंइऐ इस्तेमाल कर ज़ो मैरै हाथा छ़ाड़ना रै ज़ौरिऐ ताऊं कै मिलौ थौ।

⁷कैलैकि परमेश्‍वरै आमै डौरणै वाल़ै नाईं चाणै पर तेसरी आत्मा आमारै ज़िऊ मज़बूत कौरा आ, और एकी-दुजै आइलै प्यार कौरना लै और हर हालता दी आपु काबु कौरणै दी मज़द कौरा आ।

⁸एज़ी वज़ाह कु तू दुजै लोगु कै आमारै प्रभु यीशु रै बारै बोलणै कु नाईं शौरमिऊ और ना ई मेरी वज़ाह कु ज़ुण तिऐं खुश-खौबरी री सेवा लै ज़ेला दी ऊ। पर तुमु परमेश्‍वरा री सै शक्ति इस्तेमाल कौरणी च़ांई ज़ो सेऊ तुमुकै दिया सा और तुमुऐ मुं आइलै तिऊं दु:खा दी शामिल हुणौ च़ांई ज़ो हाऊं खुश-खौबरी री वज़ाह कु लागौ औन्दौ उठाउंदै।

⁹ज़ुणिऐ आमारौ छ़ुटकारौ कियौ और पवित्र ज़िन्दगी ज़िउणा लै आमै औटाऐ ई। आमारै आच़्छ़ै कामा री वज़ाह कु नाईं, पर आपणै मकसद और तिऐं बौड़ी दया रै मुताबिक औटाऐ ई ज़ेथरै बारै दी परमेश्‍वरै पैहला कु यीशु मसीह इऐं दुनिया दी भेज़णै रै ज़ौरिऐ थौ बोलौ औन्दौ।

¹⁰पर आबै आमारौ छ़ुटकारै दैणै वाल़ौ यीशु मसीह आशदै आ लागौ औन्दौ और तिणीऐ आमु माथै आपणी बौड़ी दया की आ, ज़ुणिऐ एक ता मौउता री तागत हौराई गोई, दुजौ खुश-खौबरी रै ज़ौरिऐ आमुकै सौदा री ज़िन्दगी री बाट देखाल़ी आ।

¹¹परमेश्‍वर हाऊं इऐं खुश-खौबरी रौ परचार कौरणै और प्रेरित बौणना लै और दुजी ज़ाती रै लोगु लै शिक्षा दैणा लै च़ुनौ ऊ।

¹²इऐं खुश-खौबरी री वज़ाह कु हाऊं इदै ज़ेला दी भी इऊं दुःख ऊ लागौ औन्दौ सहन कौरदै, तैबै नाईं शौरमिंदौ। कैलैकि हाऊं मसीह ज़ाणाऊ ज़ास माथै मुंइऐ विश्वास कियौ आ, मुकै पाक्कौ पौतौ आ कि सेऊ तेबी झ़ाऊं मेरी इऐं खुश-खौबरी री रखवाल़ी कौरी सौका आ ज़ेबी झ़ाऊं सेऊ वापिस नाईं आशदौ।

¹³भरोसौ छ़ाड ज़ो सौच़्च़ी शिक्षा ताइंऐ मुकु शुणी ई सै ताऊं लै औनैणै ज़िणी ई। तिऊं विश्वास और प्यारा आइलै मान, कैलैकि तुमै यीशु मसीह आइलै एक ई कौरै औन्दै।

¹⁴और पवित्र आत्मा रै ज़ौरिऐ ज़ुण आमुदी बौसा आ, इऐं खुश-खौबरी री रखवाल़ी कर।

¹⁵तू ज़ाणाई कि आसिया परदेशा रै सारै विश्वासिउऐ हाऊं छ़ाड़ी ऐरौ ज़ेथदी फूगिलुस हिरमुगिनेस आ।

¹⁶उनेसिफुरूसा रै टौबरा माथै प्रभुऐ दया च़ांई कौरी, कैलैकि तिणीऐ मुकाऐ आशीयौ मोकती बारै मेरी मज़द कौरी आ और सै इदै ज़ेला दी मुकु मिलियौ नाईं शरमुऔ।

¹⁷पर ज़ेबी सेऊ रोम शैहरा दी आशौ, ता तिणीऐ बौड़ी कोशिषा कौरी हाऊं लोड़ौ और मुकु मिलौ।

¹⁸हाऊं प्राथना कौराऊ कि ज़ेबी प्रभु वापिस आशा लौ ता प्रभु तेस माथै दया कौरा और तू आपु आच़्छ़ै कौरीऐ ज़ाणाई कि ज़ेबी हाऊं इफिसुस शैहरा दी थौ। ता तिणीऐ मेरी केती मज़द कौरी आ।