Read Pahari, Mahasu 2 तीमु 2 Bible Online

2 तीमु 2 - Pahari, Mahasu bible

2 तीमु 2

¹एथीलै ओ मैरै छ़ोहरु तीमुथिय्युस तू तिऐं बौड़ी दया दी ज़ो यीशु मसीह दिया सा मज़बूत औऊ

²और तांइऐ यीशु मसीह रै बारै दी ज़ो शिक्षा भौरी लोगु रै सामनै शुणी आ। ता आबै हाऊं इणौ च़ाहा ऊ कि सेज़ी शिक्षा तिऊं कै भी शिखाऊ ज़ास माथै तू भरोसौ छ़ाड़ाई, ताकी सै विश्वासी भी तिऊं शिक्षा ओरी लोगु कै शिखाउणै वाल़ै बौणा।

³यीशु मसीह रै आच़्छ़ै सिपाई ज़िणौ मुं आइलै दुःख उठाऊ।

⁴एक सिपाई आपणै कामा छ़ाड़ियौ कोई दुजौ काम नाईं कौरदौ, कैलैकि सेऊ आपणै बौड़ै आफसरु खुश कौरणौ च़ाहा सा, और सेऊ आपु दुनिया रै कामा दी नाईं फौसदौ।

⁵ज़ेबी अखाड़ै दी लौड़णै वाल़ौ पहलवान भी अगर विधी रै मुताबिक नाईं लौड़ालौ ता तेसलै इनाम नाईं मिलदौ।

⁶ज़ो ज़ीमीदार मैहनत कौरा सा फौसली रै पैहलै हिस्सै माथै तेसरौ हक्क औआ सा।

⁷इऊं औनैणेऊ रै बारै दी सुंच़ौ कि इऐ का शिखावा ई, और प्रभु इऊं सौमझ़णै दी तुमारी मज़द कौरा सा।

⁸यीशु मसीह लगातार याद कौरौ, ज़ो राज़ै दाऊदा रै वंशा कु पैदौ हुऔ और परमेश्‍वरै सेऊ मौरै औन्दै मांझ़िआ कु ज़िउंदौ किऔ आ, और इऐ खुश-खौबरी आ ज़ो हाऊं लोगु कै शुणावा ऊ।

⁹कैलैकि इऐं खुश-खौबरी शुणाउणै री वज़ाह कु हाऊं एक गुनैहगारा ज़िणै दु:ख साहा ऊ, इदरा झ़ाऊं कि ज़ेला दी भी बन्द ऊ। तैबै भी परमेश्‍वरा रै वचन फौइलणै कु कोई नाईं रोकी सौकदौ।

¹⁰एज़ी वज़ाह सा कि हाऊं सेज़ै लोगु रै फाइदै लै दु:ख ऊ सौइंदै लागौ औन्दौ, ज़ो परमेश्‍वरै ई चुनै औन्दै ताकी सै भी प्रभु यीशु मसीह माथै विश्वास कौरा और छ़ुटकारौ और महिमा हासिल कौरा ज़ो सौदा लै आ।

¹¹इऐ बूश सौच़्च़ी आ कि अगर आमै मसीह आइलै मौरी भी गौऐ आ, ता तेस आइलै ज़िउंदै भी हुई आ।

¹²अगर आमै सबरा कौरी तेसलै दु:ख सहन कौरुलै, ता तेस आइलै राज़ै ज़िणौ राज़ भी कौरी। अगर आमै बोली की आमै प्रभु नाईं ज़ाणदै ता प्रभु भी बोला कि हाऊं तुमु नाईं ज़ाणदौ,

¹³इदरा झ़ाऊं कि अगर आमै मसीह लै बफादार नाईं औलै, तैबै भी सेऊ आमुलै बफादार रौआ सा, कैलैकि सेऊ सौदा आपणै स्वभाव रै मुताबिक काम कौरा सा।

¹⁴ज़ो बुशै मुइंऐ तुमुकै बोली ई, तिऊं आपणै लोगु कै बिसुरणै नाईं दै। और प्रभु रै सामनै ज़ुण एक गवाह सा, ताऐं सै खौबरदार च़ांई कौरणै कि सै आखरु रै मतलबा रै बारै दी वाद-विवाद नाईं कौरा, ज़ेथ कौरी कुछ़ फाइदौ नाईं, पर शुणनै वाल़ै लोगु लै बौड़ौ नुकसान ई औआ सा।

¹⁵सौच़्च़ाई रै वचना रौ ठीक ढौंगा कौरी इस्तेमाल कौरीयौ परमेश्‍वरा रै अपणाउणै रै लायक सेवक बौणनै री पुरी कोशिश कौरौ, ज़ास शर्मिंदौ ना जा लौ हुणौ।

¹⁶संसारिक और बेकारा री बुशेऊ कु दूर रौऔ, कैलैकि ज़ुण लोग इऊं बुशु दी शामिल औआ ई सै परमेश्‍वरा कु औज़ौ भी दूर औआ ई

¹⁷और इणी बुशै शौड़ै औन्दै ज़खमा ज़िणै थाका ई फौइलदै लागी। और लोगु रै विश्वास चोड़ाई ज़ो तिउंरी शुणाई। हुमिनयुस और फिलेतुस तिऊं मांझ़िया कु ई।

¹⁸तिंउऐ सौच़्च़ाई माथै विश्वास कौरणौ छ़ाड़ी गौ आ, सै इणौ बोलाई, कि परमेश्‍वरै मौरै औन्दै विश्वासी सौदा री ज़िन्दगी लै पैहला कु ज़िउंदै कौरी गौऐ। ज़ेथरौ नौतिज़ौ इणौ आ कि सै कुछ़ विश्वासिऊ मसीह री शिक्षा माथै हाण्डणा लै मौना कौरा ई।

¹⁹तैबै भी परमेश्‍वरा रै लोगु रौ विश्वास पाकी पौई ज़िणी मज़बूत बौणी रौआ सा, और तिऐं पौई दी इणै आखर ई लिखै औन्दै, “प्रभु ज़ाणा सा कि तेसरै आपणै लोग कुण ई,” और इणौ भी “ज़ुण प्रभु री आराधना कौरा सा तिणीऐ बुरै काम कौरणै पोरु च़ांई छ़ाड़णै।”

²⁰बौड़ै घौरा दी ना सिरफ सुनै च़ाँदी रै ओखर बल्कि ज़ुखड़ै और माटै रै ओखर भी हुआई, केज़ै ओखर खास मकसदा लै, और केज़ै ओखर रोज़कै कामा लै इस्तेमाल औआ ई।

²¹तिणी ई अगर कुण विश्वासी आपु इऊं बुरी च़िज़ु कु अलग कौरालौ, ता सेऊ तेस ओखरा ज़िणौ औआ सा ज़ास खास कामा लै इस्तेमाल कौरा ई, अगर तेसरी ज़िन्दगी पवित्र औली ता तेसरौ मालिक तेस आच़्छ़ै काम लै इस्तेमाल कौरा आ।

²²तिऊं बुरी च़िज़ा कु आपु दूर रौऊ ज़ास ज़वान लोग कौरणै च़ाहा ई, ज़ेज़ै लोग सौच़्च़ै ज़िवा कौरी प्रभु री आराधना कौरा ई, तिऊं आइलै सौच़्च़ाई, और विश्वास, और प्यारा कौरी, मेल-मिलाप चाणीऔ छ़ाड़।

²³पर बेअकली, और फालतु री बुशा कु दूर रौऊ, कैलैकि तू ज़ाणाई कि इणी बुशा कु झ़ौगड़ै पैदै औआ ई।

²⁴प्रभु रै सै सेवक झ़ौगड़ै कौरणै वाल़ै नाईं च़ांई हुणै, पर सेऊ सौभीऊ आइलै कौंउल़िऐ, और परमेश्‍वरा रै वचन आच़्छ़ै तरिकै कौरीऐ शिखाउणै वाल़ौ और सबर छ़ाड़णै वाल़ौ च़ांई हुणौ।

²⁵और ज़ुण तेसरौ बिरोध कौरा ई सै तिणीऐ बौड़ै प्यारा कौरी सौमझ़ाउणै च़ांई, हुई सौका कि शायद परमेश्‍वर तिउंकै सौच़्च़ाई ज़ाणनै और तेस भिलै फिरणै रौ मौकौ दिया।

²⁶और इऐ लोग दुजी बारै तौंइऐ आच़्छ़ै कौरी सुंच़णै लायक औआ और शैतान मानणै कु और तेसरी च़ालाकी कु ज़ो फाई ज़िणै ई पोरु छ़ुटा।