Read Pahari, Mahasu 2 तीमु 4 Bible Online

2 तीमु 4 - Pahari, Mahasu bible

2 तीमु 4

¹ज़ेबी प्रभु यीशु मसीह राज़ै ज़िणै राज़ कौरदै आशा लौ, ता सेऊ ज़िउंदै और मौरै औन्देऊ दुइया रौ फैसलौ कौरा सा। हाऊं परमेश्‍वरा आइलै और मसीह गवाह मानियौ तुमु कु औरज़ कौराऊ,

²कि तू परमेश्‍वरा रै वचना रौ परचार कर। बौगतै और बेबौग्तै त्यार रौऊ। तुमुऐ लोगु कै बोलणौ च़ांई कि तिंउऐ का गलत कियौ आ, और तिऊं तिउंरै पापा लै धौमकाऊ। पर तुमै तिउंलै हिम्मत भी दैऔ ज़िणौ तुमै तिऊं सबरा कौरी शिखावा ई।

³कैलैकि इणौ बौगत आशा सा, कि लोग खौरी शिक्षा सहन नाईं कौरी सौकदै पर ज़ो तिउंकै शुणनौ आच़्छ़ौ लागा सा तेथी रै मुताबिक सै आपुलै भौरी का शिक्षा दैणै वाल़ेऊ कौट्ठै कौरा ई।

⁴और सै आपणै कौन्थु सौच़्च़ाई भिला कु बौदल़ियौ बणाउटी और बुज़ुर्गा री कथा-काअणिऊ माथै ला ई।

⁵पर तू सारी बुशु दी खौबरदार रौऊ, दु:ख उठाऊ खुश-खौबरी शुणाउणै रौ काम कर, और आपणी सेवकाई पुरी कर।

⁶हाऊं तुमुलै एस हुकम एथीलै दियाऊ कि मेरी ज़िन्दगी और मैरौ परमेश्‍वरा लै काम खातम आ औणै वाल़ौ, कैलैकि हाऊं ज़ाणाऊ कि हाऊं शिगरी मौरा ऊ।

⁷मुंइऐ मसीह री सेवा कौरना लै भौरी मैहनत की आ, और आपणी दौड़ पुरी कौरी एरी आ, और हाऊं आखरी झ़ाऊं विश्वासा दी पाक्कौ रौ ऊ

⁸प्रभु मुलै एक ताज़ दिया आ ज़ो धार्मिकता रौ ताज़ आ। सेऊ सौच़्च़ौ फैसलौ कौरणै वाल़ौ आपणै वापिस आशणै वाल़ै दिना दी मुलै तेस इनाम दिया सा। सेऊ मुकै नाईं पर तिऊं सौभीऊ कै भी ज़ो तेसरै वापिस आशणै री इन्तज़ारी दी ई।

⁹मुकाऐ शिगरी आशणै री कोशिश कर।

¹⁰कैलैकि देमासै इऐं धौतरी री च़िज़ेऊ प्यारी ज़ाणियौ हाऊं छ़ाड़ी ऐरौ ऊ, और थिस्सलुनीका रै इलाकै लै डैऔ आ और क्रेसकेंस गलातिया परदेशा लै और तितुस दलमतिया परदेशा लै डैऔ आ।

¹¹लुका मुं आइलै आ, तू आशदी बारै मरकुस आपु आइलै ओरु आणै, कैलैकि सेऊ सेवा लै मैरै भौरी कामा रौ आ।

¹²तुखिकुस मुंइऐ इफिसुसा इलाकै लै भेज़ौ आ।

¹³ज़ेज़ौ कोट मुंइऐ त्रोआसा इलाकै दी करपुसा रै घौरा कै आ छ़ाड़ौ औन्दौ, तेस और किताबी खास कौरीयौ च़ामड़ै रै लिखै औन्दै कागज़ भी आपुकै आणै ज़ेबी तू आशा लौ।

¹⁴सिकन्दर ठठेरै मुं आइलै भौरी बुराई की आ, प्रभु तेसरै बुरै कामा रै मुताबिक तेसलै बौदल़ौ दिया सा

¹⁵तू भी तेसकु बौच़ियौ रौऐ, कैलैकि तिणीऐ आमारै मसीह री शिक्षा रौ भौरी बिरोध कियौ आ।

¹⁶मैरै पैहलै सुनवाई रै बौगतै कोइऐ भी मैरौ साथ नाईं दैऔ, पर सारेऊ ऐ हाऊं छ़ाड़ी ऐरौ थौ, भौलौ च़ांई हुऔ कि एथरौ तिऊं लेखौ ना दैणै पौड़ा।

¹⁷पर प्रभु मुं आइलै साथा दी रौ आ, और मुलै तागत देई आ, ताकी मैरै ज़ौरिऐ पुरौ-पुरौ परचार हुआ, और सारी दुजी ज़ाती शुणाली, और तिणीऐ हाऊं मौउता कु बौच़ाओ ऊ।

¹⁸और प्रभु मुं हर एक बुरै कामा कु छ़ुड़ावा सा, और आपणै सौरगा रै राज़्य दी मुं सही-सलामत पहुंच़ावा सा, और तेसरी महिमा जुगै जुगै च़ांई औन्दै थाकी लागी। आमीन।

¹⁹प्रिसका और तियांरै बोउटै अक्विला लै, और उनेसिफुरूसा रै टौबरा लै मेरी तौरफा कु ढाल।

²⁰इरास्तुस कुरिन्थुस शैहरा दी रौई गौ आ, और त्रुफिमुस मुंइऐ मिलेतुस इलाकै दी छ़ाड़ौ औन्दौ, कैलैकि सेऊ बिमार आ।

²¹शेल़ा पौड़णै कु पैहलै आशणा री कोशिश कर, यूबूलुसौर पूदेंस, और लीनुस और क्लौदिया, और सारेऊ साथी विश्वासी भाईऊ री ताउंलै ढाल।

²²हाऊं प्राथना कौराऊ कि प्रभु ताऊं आइलै रौआ, और तेसरी बौड़ी दया भी ताऊं माथै औन्दै थाका लागी।