Read Pahari, Mahasu तितुस 2 Bible Online

तितुस 2 - Pahari, Mahasu bible

तितुस 2

¹पर तू तितुस विश्वासिऊ कै सिरफ सेज़ी बुशै शिखाऊ, ज़ो सौच़्च़ी शिक्षा सा।

²स्याणै लोगु सौबर छ़ाड़णी, इज़्ज़तदार बौणनौ और बुद्धिमानी कौरीऐ ज़िउणौ शिखाऔ। तिऊंरौ विश्वास मज़बूत और तिऊं प्यार और सौबरा कौरी भौरु औन्दौ औणौ च़ांई।

³इणी ई स्याणी छ़ेउड़ीउऐ भी ज़िउणौ च़ांई ज़ेथ कौरी परमेश्‍वरा लै इज़्ज़त मिला। आरोपा लाइणै वाल़ी और सुरी पिणै वाल़ी नाईं च़ांई हुणी, पर आच़्छ़ी बुशै शिखाउणै वाल़ी च़ांई हुणी।

⁴ताकी सै ज़वान छ़ेउड़ीऊ लै औनैणौ बौणा और इणौ भी शिखाई बौल़ा कि आपणै बोउटै और लोल़डेऊ आइलै किणौ जा सा प्यार कौरणौ।

⁵ज़वान छ़ेउड़ी सौबर कौरणै वाल़ी, और आपणै बोउटै आइलै बफादार रौआ, और घौरा रौ काम-काज़ कौरणै वाल़ी, भौली और आपणै बोउटै रै अधीन रौइणै वाल़ी औआ। ताकी परमेश्‍वरा रै वचना री बुराई ना हुआ।

⁶इणी ई ज़वान छ़ोहरु भी सौमझ़ाउंदै थाकौ लागी, कि सै भी बुद्धिमानी कौरी काम कौरदै थाका लागी।

⁷तुमुऐ सौदा आच़्छ़ै काम च़ांई कौरणै ताकी तुमै दुजेऊ लै औनैणौ बौणा। ज़ेबी तुमै विश्वासिऊ कै शिखावा ई, ता तुमुऐ आच़्छ़ै इरादै कौरीऐ शिखाउणौ च़ांई ज़ेथ कौरी लोग तुमारी इज़्ज़त कौरा।

⁸और तुमुऐ सेऊ च़ांई शिखाउणौ ज़ो सौच़्च़ौ आ, ज़ेथरी बुराई ना हुई सौका, ताकी तुमारै दुश्मनु री बेइज़्ज़ती औआ। कैलैकि इणौ कुछ़ भी बुरौ ना च़ांई हुऔ ज़ेथकु सै तुमारै विरोधा दी बोली बौल़ा।

⁹नुकरु सौमझ़ाऊ, कि आपणै-आपणै मालिका रै अधीना दी रौआ, और सारी बुशु दी तिऊं खुश छ़ाड़ा, और पौल़टुइयौ तिउंलै ज़वाब ना दिया।

¹⁰च़ोरी और च़लाकी ना कौरा, पर सौभी तरीका दी पुरौ इम्मानदार निकल़ा, कि सै सारी बुशु दी आमारै छ़ुटकारै दैणै वाल़ै परमेश्‍वरा री शिक्षा दी शोभा बौणा।

¹¹सारै लोगु रै छ़ुटकारै लै परमेश्‍वरा री बौड़ी दया पौगड़ी हुई आ।

¹²इऐं बौड़ी दया कौरी परमेश्‍वर आमु खौबरदार कौरा सा, कि आमै तेस च़ाल-च़लण ना शिखा ज़ो परमेश्‍वरा री बेइज़्ज़ती कौरा आ, और आमुऐ दुनिया री च़िज़ेऊ री इच़्छ़ा पोरु च़ांई छ़ाड़णी। आज़कै बौगता दी आमुऐ सबर और ठीक च़ाल च़ालणी च़ांई ज़ो साबित कौरा कि आमै परमेश्‍वरा री इज़्ज़त कौरी ई।

¹³और तिऐं भौली आशा री मतलब आपणै महान परमेश्‍वर और छ़ुटकारै दैणै वाल़ै यीशु मसीह री महिमा रै पौगड़ै औणै री बाटा दी थाकी आण्डदै लागी।

¹⁴ज़ुण आपु आमुलै क्रुसा माथै च़ौड़ौ, कि आमु सारी रौंगा री बुराई कु छ़ुड़ावा लौ, और शुद्ध कौरीयौ आपुलै एक इणी पौरज़ा चाण ज़ो भौलै कामा लै सौदा तैयार रौआ।

¹⁵पुरै हक्‍का कौरीऐ इऊं बुशु विश्वासिऊ कै बोल और सौमझ़ाऊ और शिखाउंदै थाक लागी, इणै कौरणै रौ ताउंकै मेरी तौरफा कु पुरौ हक्क आ, कासी भी आपणी बेइज़्ज़ती नाईं दै कौरणै।