Read Pahari, Mahasu तितुस 3 Bible Online

तितुस 3 - Pahari, Mahasu bible

तितुस 3

¹विश्वासिऊ कै याद थाक कौराउंदै लागी, कि आफसर और अधिकारिऊ रै अधीना दी रौआ, और तिउंरै हुकम माना, और हर एक आच़्छ़ै कामा लै तैयार थाका रौई।

²कासी भी बदनाम ना कौरा, झ़ौगड़ै कौरणै वाल़ै ना हुआ, पर दुजै लोगु माथै दया कौरा, और सारेऊ लोगु आइलै बौड़ी नौरमाइऐ रौआ।

³कैलैकि आमै भी पैहलै, मुर्ख, और परमेश्‍वर नाईं मानणै वाल़ै, और लोगु कु धोखै खाऐ औन्दै, और बुरी इच़्छ़ा दी, और ऐश-आरामा री गुलामी दी थै पौढ़ै औन्दै, और बैर भाव, और ज़लन कौरणै दी आपणी ज़िन्दगी बितावा थै, और कासी कै ढौभा नाईं थै, और एकी दुजै आइलै दुश्मनी छ़ाड़ा थै।

⁴पर तैबै भी आमारै छ़ुटकारौ दैणै वाल़ै परमेश्‍वरा री कृपा, और आदमी माथै तेसरौ प्यार पौगड़ौ हुऔ,

⁵ता तिणीऐ आमै आमारी पापा री सौज़ा कु छ़ुटकारौ दैऔ, और एऊ धार्मिकता रै कामा कौरी नाईं आसतौ, ज़ो आमुऐ आपु किऐ ई, पर तिणीऐ आपणी दया रै मुताबिक कियौ आ। तिणीऐ आमारै पाप धोइयौ दूर किऐ ई और पवित्र आत्मा रै ज़ौरिऐ आमुलै एक नौंवौ ज़नम और नौईं ज़िन्दगी देई आ।

⁶परमेश्‍वरै आमुकै पवित्र आत्मा भौरी का दैऔ आ, ताकी सेऊ आमुदी शक्तिशाली काम कौरा। कैलैकि प्रभु यीशु मसीह आमारै पापा री ताइंऐ मौरौ ताकी सेऊ आमारौ छ़ुटकारौ दैणै वाल़ौ बौणा।

⁷ज़ेथ कौरी आमै तेसरी बौड़ी दया कौरी धौर्मी बौणीयौ, सौदा री ज़िन्दगी री आश लाइणा रै मुताबिक हक्कदार बौणा।

⁸इऐ बूश सौच़्च़ी आ, और हाऊं च़ाहा ऊ, कि तू इऊं बुशु रै बारै दी जोशा कौरी शिखाऊ एथीलै कि ज़ुणिऐ परमेश्‍वरा री बाट देखी और विश्वास कियौ, सै भौलै-भौलै कामा कौरणै रै ध्यान दी रौआ। इऐ बुशै भौली, और लोगु रै फाइदै री ई।

⁹पर मुर्खता रै विवाद कु, और बुज़ुर्गा री काअणिऊ, और दुश्मनी विरोध, और तिऊं झ़ौगड़ेऊ कु, ज़ो मुसा रै नियमा रै बारै दी औलै एज़ी बुशा कु बौच़ियौ थाक, कैलैकि तिऊं बुशु रौ कोई फाइदौ नाईं और बिण मतलबा री ई।

¹⁰कलिसिया दी झ़ौगड़ै कौरणै वाल़ै आदमी, पैहली और दुज़ी बारै खौबरदार कौरणै बासिऐ तेसकु केज़ै भी रौंगा रौ रिश्तौ ना छ़ाड़ौ।

¹¹तुमै इणौ पाक्कौ ज़ाणौ कि इणै रौंगा रौ आदमी ज़ाणी-बुज़ियौ गलत बाटा दी आण्डदै लागौ औन्दौ और तेसरै आपणै बुरै काम तेस आरोपी चाणा ई।

¹²ज़ैबै हाऊं ताऊं काऐ अरतिमास और तुखिकुस भेज़ूलौ, ता मुं काऐ निकुपुलुस शैहरा दी आशणै री कोशिश कौरणी कैलैकि मुंइऐ तिऐ शेल़ै रौ बौगत बिताउणै री ठाणी गोई आ।

¹³अपुल्लोस और ज़ेनास बकीला रै सफरा दी हर रौंगा री मज़द कौरेऊ कि तिउंकै केज़ी भी च़िज़ा री कामी ना हुआ।

¹⁴और आमारै लोग भी सारी ज़रूरत पुरी कौरना लै आच़्छ़ै कामा दी लागणौ शिखा, ताकी कुछ़ कौमावा।

¹⁵मुं आइलै रै सारै विश्वासिऊ री तौरफा कु ताउंलै ढाल। और आमारै साथी विश्वासिऊ लै भी ढाल ज़ुण आमु आइलै प्यार कौरा ई, तिउंलै भी ढाल। हाऊं प्राथना कौराऊ कि तुमु माथै बौड़ी दया थाकाली औन्दै लागी।