Read Pahari, Mahasu फिले 1 Bible Online

फिले 1 - Pahari, Mahasu bible

फिले 1

¹हाऊं पौलुस ज़ुण यीशु मसीह री सेवा कौरणै री वज़ाह कु ज़ेला दी ऊ, तुमुलै इऐं चिट्ठी लिखाऊ। आमारै विश्वासी भाई तीमुथियुसा री तौरफा कु भी ताऊं फिलेमोना लै ढाल। तू आमारौ साथी गोश्टण ई और आमु ज़िणी मसीह री सेवा कौरा ई।

²आमारी विश्वासी बौइण अफफिया, और आमारै विश्वासी भाई अरखिप्पुसा लै भी ज़ुण प्रभु री सेवा एक सिपाई ज़िणी कौरा ई ढाल, और तिऊं विश्वासिऊ लै भी ज़ुण फिलेमोना रै घौरा दी प्रभु री आराधना कौरना लै कौट्ठै हुआई।

³हाऊं प्राथना कौराऊ कि आमारौ बाब परमेश्‍वर और प्रभु यीशु मसीह री बौड़ी दया और शान्ति तुमुलै मिलदै थाका लागी।

⁴हाऊं सौदा परमेश्‍वरा रौ धन्यबाद कौराऊ, और आपणी प्राथना दी भी ताऊं याद कौराऊ,

⁵कैलैकि हाऊं तैरै तेस प्यार और विश्वासा री बुशै शुणियौ, ज़ो सौभी पवित्र लोगु आइलै, प्रभु यीशु माथै आ।

⁶हाऊं प्राथना कौराऊ कि तैरै विश्वासा दी भागीदार हुणौ, तुमारी सारी भौलाई री निशाणी दी, मसीहा कालै असरदार ई।

⁷कैलैकि ओ भाई, मुलै तैरै प्यारा कु भौरी खुशी और शान्ति मिली, एथीलै कि तैरै ज़ौरिऐ पवित्र लोगु रै मन हौरै-भौरै हुई गौऐ आ।

⁸एथीलै अगर मुलै मसीहा दी बौड़ी हिम्मत ता आ, कि ज़ो बुशै ठीक आ, तेसरौ हुकम ताउंलै दैऔ।

⁹तैबै भी मुलै बुड़ै पौलुसा लै ज़ो आबै मसीह यीशु री सेवा री वज़ाह कु कैदीऊ, एऊ औज़ौ भी आच़्छ़ौ ज़ाणुऔ कि प्यारा कौरी औरज़ कौरु।

¹⁰हाऊं आपणै छ़ोहरु ज़िणै उनेसिमुसा लै ताऊं कु औरज़ कौराऊ। ज़ुण ज़ेला दी मैरै ज़ौरिऐ विश्वासा दी आशौ आ।

¹¹सेऊ ता पैहलै तैरै कुछ़ भी कामा रौ नाईं थौ, पर आबै तैरै और मैरै दुइआ रौ बौड़ै कामा रौ आ।

¹²सेऊ ऊ मतलब-ज़ो मैरै ज़िवा रौ टुकड़ौ आ, मुंइऐ सेऊ ताऊं काऐ भेज़ी ऐरौ आ।

¹³तेस हाऊं आपु काऐ छ़ाड़णौ च़हा थौ कि तेरी तौरफा कु एस कैदा दी ज़ो खुशी री खौबरी रौ कारण आ, मेरी सेवा कौरालौ।

¹⁴पर मुंइऐ तेरी इच़्छ़ा रै बिणा कुछ़ भी कौरणौ नाईं च़ाऔ कि तेरी एज़ी दया, दबाव कु नाईं पर खुशी कौरी च़ांई हुऔ।

¹⁵कैलैकि का पौतौ सेऊ ताऊं कु कुछ़ दिना झ़ांऊ एज़ै कारण अलग हुऔ कि सौदा ताऊं आइलै रौऊ।

¹⁶पर इबी कु दासा रै ज़िणौ नाईं, पर दासा कु भी आच़्छ़ौ मतलब भाई ज़िणौ रौऊ, ज़ो शरीरा दी भी और खासकर प्रभु दी भी मैरौ प्यारौ औलौ।

¹⁷एथीलै अगर तू मुं आपणौ साथी सौमझ़ा ई, ता तेस इणै कौरी ग्रहण कर ज़िणौ हाऊं कियौ ऊ।

¹⁸और अगर तिणीऐ तैरौ कुछ़ नुकसान कियौ आ, या तेस माथै तैरौ कुछ़ आशा सा, ता मैरै खातै दी लिख।

¹⁹हाऊं पौलुस आपणै हाथा कौरी लिखाऊ, कि हाऊं आपु ई भौराऊ, याद छ़ाड़ै कि तेरी ज़िन्दगी भी मेरी करज़दार आ।

²⁰ओ भाई, इऐ खुशी मुलै प्रभु दी तेरी तौरफा कु मिला मसीहा दी मैरौ मन हौरौ भौरौ कर।

²¹हाऊं तैरै आज्ञाकारी हुणै रौ भरोसौ छ़ाड़ियौ, ताउंलै लिखाऊ और इणौ ज़ाणाऊ, कि ज़ो कुछ़ हाऊं बोलाऊ, तू तेसकु भी बौड़ियौ कौरा ई।

²²और एऊ भी, कि मुकालै रौइणा लै ज़ागाह तैयार छ़ाड़, मुकै आश आ, कि परमेश्‍वर तुमारी प्राथना रौ ज़वाब ज़रूर दिया कि हाऊं तुमु काऐ आशु।

²³इपफ्रास भी ज़ुण मसीह यीशु दी मुं आइलै कैदा दी आ।

²⁴और मरकुस और अरिस्तर्खुस और देमास और लुका ज़ो मैरौ साथी आ इऊं री ताऊं लै ढाल।

²⁵आमारै प्रभु यीशु मसीहा री बौड़ी दया तुमारी आत्मा माथै औन्दै थाका लागी। आमीन।