Read Pahari, Mahasu इब्रा 1 Bible Online

इब्रा 1 - Pahari, Mahasu bible

इब्रा 1

¹पैहलै जुगा दी परमेश्‍वरै बाब-दादा कु मोकती बारै और अलग-अलग तरिकै कौरीऐ भविष्यवक्तु रै ज़ौरिऐ बुशै लाई,

²पर इऊं आखरी दीनु दी आमुकु छ़ोहरु रै ज़ौरिऐ बुशै लाई। परमेश्‍वरै आपणै छ़ोहरु रै ज़ौरिऐ सारी सृष्टी चाणी और सेऊ सारी चीज़ैऊ रौ हक्कदार चाणौ।

³सेऊ छ़ोहरु ई परमेश्‍वरा री महिमा रौ प्याशौ आ और सेऊ छ़ोहरु हर तरिकै कु तेसी ज़िणौ आ। और सेऊ आपणी शक्ति रै वचना कौरी सारी सृष्टी मज़बूत चाणी छ़ाड़ा आ। सेऊ लोगु रै पाप धोइयौ उंच़ी ज़ागाह माथै परमेश्‍वरा री सुल़टी भिलै बोशौ।

⁴एथीलै परमेश्‍वरै छ़ोहरु कै इणौ नाऊं दैऔ ज़ो सौरगदूतु कु भौरी उंच़ौ आ, ज़ासरै ज़ौरिऐ आमै इणौ देखी कि छ़ोहरु तिऊंकु भौरी महान आ।

⁵कैलैकि परमेश्‍वरै आपणै केज़ै भी सौरगदूतु लै केबी भी इणौ नाईं बोलौ कि, “तू मैरौ छ़ोहरु ई,” आज़ हाऊं पौगड़ौ कौराऊ कि तू मैरौ छ़ोहरु ई। और तौंइऐ तिणीऐ इऐ बूश कासी सौरगदूता लै नाईं बोली कि, “हाऊं तेसरौ बाब बौणा ऊ, और तू बौणा ई मैरौ छ़ोहरु।”

⁶और ज़ेबी परमेश्‍वरै आपणौ महान छ़ोहरु इऐं दुनिया दी भेज़ौ, ता सेऊ बोला आ, “परमेश्‍वरा रै सारै सौरगदूत तेसरी महिमा कौरा।”

⁷और सौरगदूता रै बारै दी इणौ बोला आ, “सेऊ आपणै दूतु लै बागुरा ज़िणै, और आपणै सेवक आगी रौ ज़ौहरा ज़िणौ चाणा आ।”

⁸पर छ़ोहरु रै बारै दी बोला आ, “ओ परमेश्‍वर तेरी राज़गाद्दी जुगा-जुगा झ़ांऊ रौआ आ। धार्मिकता आइलै तू आपणै राज़्य माथै राज़ कौरा ई।

⁹तांइऐ आच़्छ़ै कामा कु प्यार और बुरै कामा कु नफरत छ़ाड़ी। एथरी वज़ाह कु हाऊं, तैरै परमेश्‍वरै, तैरै साथीऊ कु बौड़ियौ खुशी रै तेला कौरी तैरौ अभिषेक कियौ।”

¹⁰और पवित्रशास्त्र भी बोला आ कि, “ओ प्रभु, सौभी कु पैहलै तांइऐ धौतरी चाणी, और सौरग तैरै हाथा री कारीगरी आ।

¹¹सै ता नाश हुणै ई। पर तू सौदा लै रौआ ई, और सै सारै जुड़कै ज़िणै पुराणै हुआई।

¹²और तू तिऊं च़ादरु बाशीऐ मेटा ई, और सै जुड़केऊ बाशीऐ बौदल़िआई पर तू केबी ना बौदलिंदौ और तू केबी भी खातम नाईं औन्दौ।”

¹³और परमेश्‍वरै सौरगदूतु मांझ़िऐ कु कासी लै केबी नाईं बोलौ कि, “तू मेरी सुल़टी भिलै इज़्ज़ता री ज़ागाह दी बोश, ज़ेबी झ़ांऊ कि हाऊं तैरै दुश्मनु तैरै वशा दी ना कौरु।”

¹⁴का सारै सौरगदूत सेवा टहल कौरना लै छ़ांटी ऐन्दी आत्माऐं नाईं, कि सै तिउंरी सेवा कौरा ज़ो छ़ुटकारौ पाइणै वाल़ेई?