Read Pahari, Mahasu इब्रा 10 Bible Online

इब्रा 10 - Pahari, Mahasu bible

इब्रा 10

¹मुसा रै नियम, सिरफ आशणै वाल़ी आच़्छ़ी च़िज़ेऊ री छ़ांई आ, तिंउदी असली च़िज़ै नाईं आ। हर बौरशै एक ज़िणी बौल़ी च़ौड़ाउणै रै ज़ौरिऐ, सै नियम भौक्ती कौरणै वाल़ेऊ केबी भी सिद्ध नाईं कौरी बौल़ै।

²अगर लोगु रौ परमेश्‍वरा री भौक्ती कौरणी तिऊं तिउंरै पापा कु सौच़्च़ी शुद्ध कौरा थौ, ता तिउंकै आपणै पाप कौरणै रौ कोई पश्ताव नाईं हुआ थौ, और तिंउऐ आपणै पापा लै बौल़ी च़ौड़ाउणी बन्द कौरणी थी।

³पर हर बौरशै बौल़ी च़ौड़ाउणौ लोगु कु तिउंरै पाप याद कौरावा थौ।

⁴कैलैकि इणौ हुणौ ता मुश्कल़ आ कि जानवरा रौ लोऊ पाप दूर कौरा सा।

⁵एथीलै ज़ेबी मसीह दुनिया दी आशा आ और परमेश्‍वरा लै बोला आ, “बौल़ी और भेंट ताइंऐ नाईं च़ाई, पर ताइंऐ मुकै बौल़ी च़ौड़णा लै एक शरीर तयार कियौ आ।

⁶होम-बौल़ी और पाप-बौल़ी कु तू खुश नाईं हुऔ।

⁷तैबै मुइंऐ बोलौ, ‘ओ परमेश्‍वर, देख हाऊं तेरी मौरज़ी पुरी कौरना लै, आशी ऐरौ ऊ, ज़िणौ कि पवित्रशास्त्रा दी मैरै बारै दी लिखौ औन्दौ आ।’ ”

⁸पैहलै मसीह ऐ इणौ बोलौ, “ना ताइंऐ बौल़ी और भैंटा और होम बौल़ीऊ और पाप बौल़ी च़ाई, और ना तू तिऊंकु खुश हुऔ,” कैलैकि इऐ बौल़ी ता मुसा रै नियमा रै मुताबिक च़ड़ावा ई।

⁹और इणौ भी बोलाई, “ओ परमेश्‍वर, देख हाऊं तेरी मौरज़ी पुरी कौरना लै आशी गो ऊ।” एथीलै सेऊ बौल़ी कौरणै रौ पैहलौ तरिकौ पोरु कौरीयौ, तेथरी ज़ागाह दी नौंवौ तरिकौ आणा सा।

¹⁰परमेश्‍वरा री इच़्छ़ा कु आमै यीशु मसीह रै शरीरा रै एकी बारै बौल़ी च़ौड़ाउणा रै ज़ौरिऐ सौदा लै पवित्र किऐ औन्दै ई।

¹¹हर एक याजक ता खौड़ै हुइयौ हर रोज़ सेवा कौरा सा, और एकी तरिकै कौरी घौड़ौ-घौड़ीयै बौल़ी च़ड़ावा आ, ज़ो पापु केबी भी दूर नाईं कौरी बौल़दै।

¹²पर आमारौ परधान याजक मसीह आपु ई पापा री ताइंऐ एकी बारै बौल़ी च़ौड़ी गौ, ज़ो बौल़ी सौदा लै आ। और आबै परमेश्‍वरा री सुल़टी भिलै बोशी ऐरौ आ।

¹³और मसीह तेबी कु इणौ लागौ औन्दौ ज़ागदै कि परमेश्‍वर तेसरै सारै दुश्मनु तेसरै वशा दी कौरा।

¹⁴कैलैकि तिणीऐ एकी बौल़ी कौरीऐ सै सौदा लै पाक्कै कौरी गौऐ, ज़ुण तेसलै अलग ई किऐ औन्दै।

¹⁵और पवित्र आत्मा भी आमुलै इणी ई गवाही दिआ। कैलैकि तिणीऐ पैहलै बोलौ थौ,

¹⁶“प्रभु बोला आ कि ज़ो वायदौ हाऊं तिऊं दीनु बासिऐ तिऊं आइलै कौरुलै, सै एज़ै ई, कि हाऊं आपणै नियम तिंउरै ज़िवा दी लिखाऊ, और तिंउरै ज़िवा दी पा ऊ।”

¹⁷तैबै सेऊ इणौ भी बोला आ, “हाऊं तिंउरै पाप माफ कौराऊ, और तिंउरै बुरै काम केबी भी याद नाईं कौरदौ।”

¹⁸और ज़ेबी परमेश्‍वरै तिउंरै पाप माफ कौरी गौऐ, ता तौंइऐ पापा लै बौल़ी री कोई ज़ुरत नाईं रौई।

¹⁹एथीलै ओ विश्वासी भाईओ, आबै आमै यीशु रै लोऊ रै ज़ौरिऐ पुरै विश्वासा आइलै सौरगा रै भौरी पवित्र ज़ागाह दी डेई बौल़ी ई।

²⁰यीशु मसीह री मौउतै एक पौरदै रै ज़ौरिऐ भौरी पवित्र ज़ागाह दी एक नौईं और ज़िन्दगी दैणै वाल़ी बाट खोली।

²¹और एथीलै कि आमारौ इणौ परधान याजक आ ज़ुण परमेश्‍वरा रै घौरा रौ हक्कदार आ,

²²ता आशौ आमै सौच़्च़ै ज़िऊ और पुरै विश्वासा कौरी परमेश्‍वरा काऐ डेउलै, कैलैकि आमारै ज़िवा रै गुनाह माथै मसीह रौ लोऊ छ़िड़कौ आ, और शरीर शुद्ध पाणी कौरी धोई गौऐ ई, कि आमै शुद्ध बौणु।

²³आबै आमै बिण शका कौरीयौ आपणी तिऐं आशा दी पाक्कै रौऊ, ज़ो आमुऐ अपणाऔ आ, कैलैकि ज़ुणिऐ वायदौ कियौ आ, सेऊ विश्वास वाल़ौ आ।

²⁴आमै प्यार, और भौलै कामा बौड़ाउणा लै एकी दुजै री फिकर थाकी कौरदै लागी।

²⁵और एकी दुजै आइलै आराधना कौरना लै कौठै हुणौ नाईं छ़ाड़ौ, ज़िणौ कि कुछ़ लोग कौरा ई, पर एकी दुजै कै हौसलै दैंदै थाकौ लागी। और ज़िणौ-ज़िणौ तुमै प्रभु रै वापिस आशणै रौ दीन नज़दीक आशदै देखा लै, ता तिणौ-तिणौ तुमै एकी दुजेऊ रौ हौसलौ औज़ौ भी बौड़ाउंदै थाकौ लागी।

²⁶कैलैकि सौच़्च़ाई रै ज्ञान पाइणै बासिऐ अगर आमै ज़ाणी बुज़ियौ पाप कौरदै रौईलै, ता पापा लै तैबै कोई बौल़ी बाकी नाईं आसती।

²⁷ओ, सौज़ा रौ एक भयानक दीन और आगी री लुपी इबी रौई औन्दी आ ज़ो परमेश्‍वरा रै बिरोधिऊ रौ नाश कौरा सा।

²⁸ज़ैबै की मुसा रै नियम नाईं मानणै वाल़ौ, दुई या चीन ज़ौणेऊ री गवाही माथै, बिणा दया कौरी पोरु झ़ांगा थै,

²⁹ता सुंच़ौ कि सेऊ केती बौड़ी सौज़ा रै लायक बौणा, ज़ुणिऐ परमेश्‍वरा रौ छ़ोहरु बांगणै कौरी फेंच़ौ और वायदा रै लोऊ रौ, ज़ेथारै ज़ौरिऐ सेऊ पवित्र थौ बौणौ औन्दौ, अपवित्र ज़ाणौ आ, और बौड़ी दया री आत्मा बेइज़्ज़त की ई।

³⁰कैलैकि आमै तेस ज़ाणी आ, ज़ुणिऐ बोलौ, “बौदल़ौ निणौ मैरौ काम ई, हाऊं ई बौदल़ौ दियाऊ।” और तैबै इणौ, कि “प्रभु आपणै लोगु रौ फैसलौ कौरा सा।”

³¹ज़िउंदै परमेश्‍वरा रै हाथा दी पौड़नौ डराऊंदी बूश आ।

³²तुमै तिऊं पिछ़लै दीनु याद कौरौ, ज़ेबी तुमुऐ मसीह रै वचना रौ प्याशौ पाऔ आ ता तुमै दु:खा रै बौड़ै कौष्टा दी मज़बूत रौऐ।

³³कई बारै ता इणौ हुऔ कि तुमारी सारेऊ रै सामनै बेइज़्ज़ती हुई और तुमुऐ भौरी दु:ख सहन कियौ। और कई बारै तुमुऐ तिंउलै भौरी फिकर की ज़ास आइलै इणौ हुऔ थौ।

³⁴कैलैकि तुमै कैदीऊ रै दुखा दी भी दुखी हुऐ, और आपणी ज़यदाद भी खुशी कौरी लुटणै देई, इणौ ज़ाणियौ कि तुमुकै सौरगा दी एक औज़ौ भी खास और सौदा लै रौइणै वाल़ी ज़यदाद आ।

³⁵एथीलै ज़ेबी तुमु सौतावा ई ता तुमै हिम्मत कौरणी ई, कैलैकि तेथरौ इनाम बौड़ौ आ।

³⁶इणै बौगता दी तुमुलै ज़ुरत आ सौबरा री, कि ज़ेबी तुमै परमेश्‍वरा री इच़्छ़ा पुरी कौरीयौ ज़ो तुमुलै वायदौ आ कियौ औन्दौ सेऊ मिला।

³⁷कैलैकि ज़िणौ पवित्रशास्त्रा दी आ लिखौ औन्दौ कि, “आबै भौरी ई थोड़ौ बौगत रौई ऐरौ आ, ज़ैबै कि आशणौ वाल़ौ आशा सा और बेर नाईं पांइदौ।

³⁸पर मैरौ धौर्मी ज़ौणौ विश्वासा कौरी ज़िउंदौ रौआ आ। ज़ुण डौरीयौ विश्वास पोरु छ़ाड़ा आ ता हाऊं तेसकु खुश नाईं हुंदौ।”

³⁹पर आमै तिऊं बाशीऐ नाईं ज़ुण डौरीयौ परमेश्‍वरा कु दूर हुआई कि नाश हुआ लै, पर आमै तिऊं बाशीऐ ई ज़ुण विश्वासा रै ज़ौरिऐ ज़िन्दगी पा ई।