Read Pahari, Mahasu इब्रा 11 Bible Online

इब्रा 11 - Pahari, Mahasu bible

इब्रा 11

¹आबै विश्वास आश कौरी ऐन्दी च़िज़ेऊ रौ पाकौ कियौ औन्दौ, और बिण देखी च़िज़ेऊ रौ सबूत आ।

²आमारै स्याणेऊ कै इणौ विश्वास थौ, सिरफ एथीई री वज़ाह कु परमेश्‍वर तिऊंकु खुश थौ।

³विश्वासा कौरी आमै ज़ाणी कि सारी सृष्टी परमेश्‍वरा रै वचना रै ज़ौरिऐ बौणी आ। एथीलै आमै ज़ो कुछ़ भी देखी ई सै तिऊं च़िज़ेऊ कु नाईं बौणै ज़ो नाईं दिशदै।

⁴विश्वासा कौरी आदमा रै छ़ोहरु हाबिलै आपणै बौड़ै भाई कैना कु आच़्छ़ी बौल़ी परमेश्‍वरा कै च़ड़ाई, और तेथी री वज़ाह कु परमेश्‍वरै सेऊ धौर्मी ज़ौणौ ज़िणौ अपणाऔ, और ज़ो बौल़ी हाबिलै च़ौड़ाई थी परमेश्‍वरै तेसरी बौल़ी कु खुश थौ। हाबिल आपणै मौरणै बासिऐ भी आमुकै शिखावा कि विश्वास किणौ च़ांई हुणौ।

⁵विश्वासा कौरी हनोक नावां रौ आदमी ज़िउंदौ सौरगा दी च़ुंगौ और सेऊ मौरौ नाईं, और तेसरौ कासी कै ठेऊ ना लागौ कि सेऊ किऐ डैऔ आ। कैलैकि परमेश्‍वरै सेऊ सौरगा दी च़ुंगी गौ थौ। तेसरै च़ुंगणै कु पैहलै तेसरै बारै दी इणौ थौ बोलौ औन्दौ कि, तिणीऐ परमेश्‍वर खुश कियौ आ।

⁶सिरफ विश्वास रै ज़ौरिऐ आमै परमेश्‍वर खुश कौरी बौल़ी ई। कैलैकि परमेश्‍वरा काऐ आशणै वाल़ेउऐ विश्वास कौरणौ च़ांई कि सेऊ आसती, ज़ुण तेस सौच़्च़ाई कौरी लोड़ाई, सेऊ तिउंलै तिऊंरौ इनाम दिया आ।

⁷विश्वासा कौरी ज़ेबी नूह नावां रै आदमी कै परमेश्‍वरै तिऐं बाड़ा रै बारै दी खौबरदार कियौ थौ, ज़ो तिणीऐ केबी नाईं देखी थी, खौबरदार और हुकम मानियौ आपणै टौबर बौच़ाउणा लै ज़हाज़ चाणौ। और नुहा रै विश्वासा काऐ बौच़ै औन्दै लोगुऐ ज़ुणिऐ विश्वास नाईं कियौ सै नाश हुऐ। परमेश्‍वरै नूह धौर्मी चाणौ कैलैकि तिणीऐ परमेश्‍वरा माथै भरोसौ कियौ।

⁸विश्वासा कौरी अब्राहम ज़ेबी परमेश्‍वरै एकी ज़ागाह दी डेउणा लै औटाऔ, ता सेऊ हुकम मानियौ तिऐं ज़ागाह लै डैऔ, ज़िऐ परमेश्‍वरै तेसकै तेसरै हक्‍का री ज़बीन दैणी थी। सेऊ इणौ नाईं ज़ाणा थौ कि हाऊं किऐ डेऊ लै तैबै भी सेऊ च़ाल पौड़ौ।

⁹ज़ेज़ी ज़ागाह रौ परमेश्‍वरै वायदौ कियौ थौ, अब्राहम तिऐ परदेशी ज़िणौ ताम्बु दी रौऔ। तेस आइलै तेसरौ छ़ोहरु इसहाक और कौनाल़डु याकूब ज़ासकै परमेश्‍वरा कु सेज़ौ वायदौ थौ मिलौ औन्दौ, सै भी तिऐ ताम्बु दी रौऐ।

¹⁰कैलैकि अब्राहम तिऐं सौरगा रै इलाकै दी रौइणा लै थौ ज़ागदै लागौ औन्दौ ज़ेथरौ नौक्शौ और इलाकै चाणनै वाल़ौ परमेश्‍वरै आ, ज़ो सौदा लै रौआ आ।

¹¹विश्वासा कौरी सारा नावां री छ़ेउड़ीऐ आपु बुढ़ी हुणा माथै भी गौरकड़ी हुणै री तागत पाई, कैलैकि तियांऐ विश्वास कियौ कि परमेश्‍वर आपणौ वायदौ पुरौ कौरा आ।

¹²ज़ेबी अब्राहम भौरी बुड़ौ थौ और मौरणै वाल़ौ थौ, तैबै तेसरौ सौरगा रै तारै और समुन्दरा रै बाल़ु रै ज़िणै अनगिनत वंश पैदै हुऐ।

¹³इऐ सारै लोग ज़ुणिऐ परमेश्‍वरा माथै विश्वास कियौ तिऊं वायदै री च़िज़ेऊ बिण हासिल कौरीऔ मौरी गौऐ। पर सै सौमझ़ी गौऐ थै कि परमेश्‍वर आशणै वाल़ै बौगता दी का कौरा आ। और सै इणौ भी सौमझ़ी गौऐ थै कि, “आमै धौतरी माथै परदेशी और बाइरा कु आशै औन्दै लोग ई।”

¹⁴ज़ो इणौ बोलाई कि सै इऐं धौतरी माथै परदेशी और बाइरा कु ई आशै औन्दै, सै कौबज़ौ कौरीयौ इणौ देखावा ई कि, “इयौ देश आमारौ आ।”

¹⁵ज़ेज़ै देशा कु सै आशै औन्दै थै, अगर तेस याद कौरालै ता तिउंलै वापिस डेउणै रौ मौकौ थौ।

¹⁶पर सै एक आच़्छ़ै मतलब सौरगा रै देशा री आश कौरा थै। एथीलै परमेश्‍वर तिऊंरौ परमेश्‍वर बोलणै दी खुश हुआ थौ, कैलैकि तिणीऐ तिऊं कालै एक इलाकौ तयार कियौ औन्दौ आ।

¹⁷ज़ेबी परमेश्‍वरै अब्राहम पौरखौ ता विश्वासा रै ज़ौरिऐ सेऊ इसहाका री बौल़ी च़ड़ाउणा लै त्यार हुऔ। इसहाक अब्राहमा रौ खास छ़ोहरु थौ। परमेश्‍वरै एस छ़ोहरु रै बारै दी अब्राहमा कु वायदौ थौ कौरौ औन्दौ कि, “एऊ इसहाका रै ज़ौरिऐ हुणौ आ कि तैरै वंशा री गिनती हुणी आ।” अब्राहमा कै पुरौ विश्वास थौ, कि परमेश्‍वर मौरै औन्देऊ ज़िउंदै कौरी सौका आ। और इणै कौरी अब्राहमा कै इसहाक मौरै औन्देऊ मांझ़िया कु ज़िउंदौ मिलौ।

²⁰विश्वासा कौरी इसहाकै आपणै दुई छ़ोहरु याकूब और एसावा लै वायदै री बुशेऊ रै बारै दी आशीष देई।

²¹विश्वासा कौरी याकुबै मौरदी बारै युसुफा रै दुई छ़ोहरु मांझ़िऊ कु एकी-एकी लै आशीष देई, और आपणै डिंगै रै सहारै कौरी परमेश्‍वरा री आराधना कौरी।

²²विश्वासा कौरी युसुफै, ज़ेबी सेऊ मौरणै वाल़ौ थौ, ता इस्राइल लोगु आइलै मिस्र देशा कु निकुल़णै रै बारै दी बुशै लाई, और तिणीऐ तिउंलै इणौ हुकम भी दैऔ कि, “ज़ेबी तुमै मिस्र देशा कु डियालै ता मैरै मौरणै बासिऐ मैरै हाड़कै भी आपु आइलै निएऊ।”

²³ज़ेबी मिस्र देशा रै राज़ै इस्राइल देशा रै छ़ोटै लोल़डेऊ झ़ांगणै रौ हुकम दैऔ ता विश्वासा कौरी मुसा रै मां-बाबै सेऊ, पैदै हुणै बासिऐ चीन मिहनै झ़ांऊ च़ोरी छ़ाड़ौ, कैलैकि तिंउऐ देखौ कि मांऊ भौरी खास आ, और सै राज़ा रै हुकम नाईं मानणै कु नाईं डौरै।

²⁴मिस्र देशा रै राज़ै री माइंऐ मुसा पाल़ी-पोसियौ बौड़ौ कियौ, विश्वासा कौरी मुसै बौड़ै हुइयौ राज़ै री मांई रौ छ़ोहरु बोलणै कु मौना कियौ।

²⁵एथीलै कि तेसकै पापा दी थोड़ै दिना रै सुख भोगणै कु परमेश्‍वरा रै लोगु आइलै दुःख भोगणौ भौरी आच़्छ़ौ लागौ।

²⁶तिणीऐ सुंच़ौ कि मसीह लै दु:ख उठाउणौ मिस्र देशा रै खौज़ानै कु भौरी आच़्छ़ौ आ, कैलैकि सेऊ ज़ाणा थौ कि इणै कौरणै कु परमेश्‍वर तेसलै सौरगा दी इनाम दिया आ।

²⁷विश्वासा कौरी राज़ा रै रोशा कु नाईं डौरीयौ मुसै मिस्र छ़ाड़ी गौ, कैलैकि तिणीऐ ज़ाणी ऐरौ कि सेऊ अणदेखौ परमेश्‍वर आ देखदै लागौ औन्दौ।

²⁸विश्वासा कौरी मुसै इस्राइली लोगु लै हुकम दैऔ कि सै जानवरा रौ लोऊ दारा माथै छ़िड़कियौ फसह रै साज़ै रौ रिवाज़ पुरौ कौरा, ताकी इस्राइला री पैहली सन्तानु नाश कौरणै वाल़ौ दूत, तिऊं छ़ुंई भी ना सौका।

²⁹विश्वासा कौरी इस्राइला रै लोग लाल समुन्दरा रै पारभिलै इणै कौरी डेई गौऐ, ज़िणौ की शुकै माटै माथै। पर ज़ैबै मिस्रिऊऐ तिणी ई कौरणै च़ाऔ ता सारै डूबिऔ मौरी गौऐ।

³⁰इस्राइली लोगु रै विश्वासा कौरी यरीहो शैहरा री शहरपनाह, ज़ैबै तिंउऐ सात दिना झ़ांऊ तिऐं दवाली रै फेरे लाई गौऐ, ता सै ढौल़ी गोई।

³¹विश्वासा कौरी राहाब वेश्या परमेश्‍वरा रै हुकम नाईं मानणै वाल़ेऊ आइलै नाश नाईं हुई, कैलैकि तिंआऐ इस्राइला रै भेदीऊ शान्ति कौरी आपणै घौरा कै छ़ाड़ै औन्दै थै।

³²आबै मुकै कुछ़ भी बोलणै री ज़ुरत नाईं ई। कैलैकि बौगत नाईं रौऔ कि गिदोना रौ, और बाराक और शिमशौना रौ, और यिफतहा रौ और दाऊद और शमुएला रौ और भविष्यवक्तु रै बारै दी बोलु।

³³इउंऐ विश्वासा रै ज़ौरिऐ राज़्य ज़ितै। सौच़्च़ै फैसलै आइलै राज़ किऔ। वायदा री च़िज़ै पाई। और ब्राग तिऊं खाई ना बौल़ै।

³⁴आगी रौ गेठौ तिऊं ज़ाल़ी ना सौकी। तलवारी री धारा कु सै नाईं मौरै। कमज़ोर हुइयौ भी सै शक्तिशाल़ी बौणै। लौड़ाई दी शूरवीर निकल़ै। आपणै दुश्मनु झ़ांगीयौ भौगाई।

³⁵कुछ़ छ़ेउड़ीउऐ आपणै मौरै औन्दै लोगु तौंइऐ ज़िउंदै देखै। केती ता मारा खान्दै-खान्दै मौरी गौऐ, और तिंउऐ आज़ाद हुणा लै परमेश्‍वरा माथै विश्वास कौरणौ नाईं छ़ाड़ौ, कैलैकि सै मौरणै बासिऐ दुजी बारै हुइयौ परमेश्‍वरा आइलै सौदा लै ज़िउणौ च़ाहा थै।

³⁶कुछ़ लोगुऐ ता मज़ाका बौणनै, और डिंगै खाणै पौड़ै, ज़ैबै कि कुछ़ ता बेड़िऊ दी बानियौ, कैदा दी पाऐ।

³⁷कुछ़ लोग ढोल़ियाऐ। सै आरै कौरी च़िरीयौ दुई हिस्सै किऐ, सै तलवारा कौरी झ़ांगै। सै गरीबी दी थै तिउंलै भौरी कौष्ट दै और तिऊं आइलै बुरौ बरताव कियौ। सै भेरी-बाकरीऊ रै खाल़ढै भिड़ीयौ ओरु-पोरु भटकदै थाकै लागी।

³⁸और शुनशान ज़ागाह, और टिरा, और डवारा दी, और धौतरी दी दरारा दी भौटकदै थाकै लागी।

³⁹इऐ बुरी दुनिया विश्वासी लोगु रै लायक नाईं थी। विश्वासा रै ज़ौरिऐ इऊं सौभी रै बारै दी परमेश्‍वर खुश हुआ आ, तैबै भी तिउंकै सै च़ीज़ नाईं मिली ज़ासरौ परमेश्‍वरै वायदौ थौ कियौ औन्दौ।

⁴⁰कैलैकि परमेश्‍वरा कै सिरफ तिउंलै आच़्छ़ी बूश नाईं थी पर आमुलै भी थी। परमेश्‍वर आमु आइलै तिऊं भी पाक्कै चाणनौ च़ाहा थौ।